15. मानता देश

सेंले आमी इस्राएली लोकहाल कनानाम, मानता देशाम परवास कोयना वेळ येनी. यहोशवाय कनानी शेहर यरीहो जी मोठ्या हिवेके हारा कोंला गोयला आता, तां बेन मायना लेनाराहाल एराहाठी दोवाड्या.त्याअ शेहरामाय रहाब नावा योक वेश्या रोती आती. त्येंय त्या मायना लेनाराहाल त्ये गोमे दोबाडी थव्या आन पासे त्याहाल नाअही पोडा हाठी मदत कोयी. तीअ ऐहेके कोया काहाका तीअ देवावोय बोरसो थोव्यो. जोवे इस्राएल माअहे यरोहो शेहरा नाश कोरी तोवे रहाब आन तीअ गोआ हारा राखाहाठी त्याहाय वचन देना. इस्राएलीहाल मानता देशाम जांहाठी यार्देन नोयी वोडाळीन जायना आता.

देवाय यहोशवाल आख्या, पोयला देवा सेवाकाल आगला जा दाअ. जोवे देवा सेवका पाग पांयाल लाग्या तोवे यार्देन नोयी उचेने येनारो जओरो बंद जायो आन इस्राएली माअहे उखाल्या दोरती वोरे त्याकानी जाय सक्ये. यार्देन नोयी त्याकानी गोये पासे, देवाय यहोशवाल आख्या का केहेके रिते त्त्याहाय मजबूत यरीहो शेहरावोय लडाई कोयना.

माअहाय देवा नियमा पालन कोया. देवाय आख्या त्यारीतेज बादा सैनिकाहाय आन देवा सेवकाहाय यरीहो शेहराल सोव दिही योक-योक वेळे फेरी मारी. पासे सातवा दिही. इस्राएलीहाय आजू सात वेले फेऱ्या माऱ्या.

सेंले वेले फेऱ्या माऱ्या तोवे सैनिकाहाय आवाज कोयो आन देवा सेवाकाहाय आपे पाव्यो वाजाड्या. पासे यरीहो शेहरा बितडे पोडये.

देवाय आज्ञा देन्या त्यारीतेके इस्राएलीहाय शेहरा नाश कोयो .त्याहाय फक्त राहाब आन तीअ कुंटूबाल जीवते थोव्ये, ज्ये पासे इस्राएला योक रोनारे बोन्ये. तोवे कनानाम रोनारे बीजे माअहे वोनाये का इस्राएलीहाय यरीहो शेहरा नाश कोयलो हेय, तोवे इस्राएली माअहे त्याहा आरी बी लोडी ऐहेके त्याहाल बिख लागी. देवाय इस्राएलीहाय आज्ञा गोठ कोयली आती का त्याहाय कनानी माअहा आरे शांती राखना नाय.

पेन गिबोनी नावा कनानामाने योक माअहा टोळी यहोशवाल ठोगीन बोल्ये त्याहाय आख्या का त्या कनानाहीने खूब दूर रोतहा. यहोशवाय त्याहाआरे शांती गोठ कोरा विनंती कोयी. यहोशवा आन इस्राएलीहाय गिबोनी माअहे येनले आते ई देवाल होदला आता नाय.

याहाठी यहोशवाय शांती गोठ कोयी. जोवे त्याहाल होमजाया का गिबोनी माअहाय त्याहाल ठोगी देनला हेय, तोवे त्याहाल खूब रोग चोडी, पेन तेबी त्याहाय गोठ पाळी काहाका त्याहाय देवा हुबूर त्याहाल वचन देनला आता. खूब वाआ पासे, कनानमाने बिजा माअहा टोळीअ राजहाय, अमोरी माअहे, वोनाये का गिबोनी माअहाय इस्राएली आरे गोठ कोयली हेय, तोवे त्याहाय त्याहा सैनिक योकठा कोयीन गीबोन्याहावोय चाल कोईन गोया. गिबोन्याहाय यहोशवाही आखी दोवाड्या आन त्याहाल मदत कोरा विनंती कोयी. याहाठी यहोशवाय इस्राएला सैनिक योकठा कोया आन गिबोन्याही पोचा हाठी पुरीरात चालता रोया.

हाकाळहे त्याहाय अमोरी सैनिकाहाल योकदाज धोको देनो आन त्याहावोय चाल कोयी. त्या दिही इस्राएलीहा ऐहेने देव स्वतः लोडयो.

त्याअ अमोरी माअहाम गडबड कोई देनी आन त्याहावोय मोठ्यो गाऱ्यो पोडयो,त्यामाय खूब अमोरी मोयी गोया. देवाय बी दिहाल वादळामाय योकाज जागावोय उबा राहाठी आज्ञा कोयी काहाका इस्राएलीहाल अमोऱ्याहा बादीरिते नाश कोरा वेल मिळे.

त्याडीही देवाय इस्राएलीहाल मोठी जीत कोय देनी. देवाय त्यां सैनिकाहाल आराडी देने पासे, खूब कनानी माअहा टोळा योकठो यीन इस्राएलावोय चोडी गोया.

यहोशवा आन इस्राएलीहाय त्यावोय लोडाई कोयीन त्याहा नाश कोयो. या लोडाई पासे देवाय इस्राएला बादा पोहोहाल मानता देश वाअटी देना.

त्यापासे देवाय इस्राएला बादी हिवहेवोय शांती हुजबाडी देनी. तोवे यहोशवा डाअयो ओअयो, तोवे त्याय बादा इस्राएली लोकहाल योखठे हाद्यें.

पासे यहोशवाय इस्राएली माअहाल देवाय त्याहाआरी कोयली गोठ ईतवी देनी का त्याहाय देवा आज्ञा पाळा.बादा माअहाय देवा आरी बोरसाकोय राअय आन त्याय आज्ञा पाळा वचन देना.