14. जोंगलामाय भटकुना

देवाय इस्राएली लोकहाल त्या नियमाहाल आखा पारवाड्या ज्याहाल त्याहा कोय वोचना पालन कोअना हेय. पासे त्याय सीनाय डोगावोरे आगला त्याहा वाट देखाडी. तोअ त्याहाल मानता देशांम लीअ जानारो आतो.या देशाल कानान बी आखतेहे. देव वादळा खांबांमाने त्याहा आगला-आगला चाल्यो,आन त्ये त्या पाहाला-पाहाला चाल्यो.

देवाय अब्राहम, इसाक आन याकूबाआरी मानता लेदला तीअ यीई मानता का तोअ मानता देश त्याहा पोहोहाल दिई, पेन यावेळे तां खूब जाती रोत्यो आत्या. त्याहाल कानानी आखे. येअ कानानी माअहे देवा सेवा नाय कोयते आते आन त्या आज्ञा नाय मानते आते. त्ये खोटया देवहा सेवा कोयते आते आन खूब खराब कामे कोयते आते.

देवाय इस्राएली लोकहाल आख्या, जोवे तुमा त्या मानता देशामाय जाहा तोवे त्यां बादा कानानियहा हीने सुटे ऐई जाजा.त्याहा आरी दोस्ती मा कोहाआन त्याहा आरे वोराड मा कोहा.तुमहाल त्याहा बादी मुर्तीही नाश कोय देयना हेय. जर तुमा मा आज्ञा नाय मानहा, तर तुमा मा विगर त्याहा देवा सेवा कोरा लागहा.

जोवे इस्राएली कानाना हिवेही पोअचे, मोशाय इस्राएला बादी जातीमाने योक-योक कोयीन बारा माअहे निवडये. त्याय त्याहाल जाईन त्या देशा मायनो लेहाठी इशारो देनो का ऐय का तोअ कोहोडो देश हेय. त्याहाल त्या कानानीयीहा मायनो बी लेयना आता का ऐय का त्या शक्तीवाळा हेय का अशक्त हेय.

त्या बारा माअहा पुरा कानानमाने जाईन चाळीस दिही चाल्या आन पासी त्यां फिरी येना. त्याहाय माअहाल आख्या, तोअ देश खूब पाकवाळो हेय आन पिके खूब पिक देनारे हेय! पेन दहा मायना लेनाराहाय आख्या, त्याहा शहरे खूब मजबूत हेय आन माअहे लांबे-लांबे हेय! जर आपा त्याहाआरी लडाई कोताहा, तर खोराज आमा आराय जाहू आन आमहाल माय टाकी.

ताबाडूज कालेब आन यहोशावा आन बिहीरा बेन मायना लेनाराहाय आख्या, यी खोरा हेय का कानाना माअहे उचे आन शक्तीवाळे हेय, पेन खोराज आपा त्याहाल आरवी सकतेहे! देव आपे हाठी लोडी!

पेन माअहें कालेबा आन यहोशवा नाय मान्ये. त्ये मोशो आन अहरनावोय रोग कोय येनी आन आख्या, तूअ आमहाल या कठीण जागावोय काहा ली येनहो? आमहाल मिसर मायज राअ जोजता.जर आपा त्या देशाम जाहू तर लडाईम मोय जाहू, आन कनाना माअहे आपे दोनारीहील आन पोहोहाल आवत्ये बोनाडी ली. त्ये माअहे त्याहाल पासी मिसरमाय ली जाहाठी योक बिहीरो पुढारी निवडूनारे आते.

जोवे त्या माअहाय ऐहेके आख्या तोवे देवाल खूब रोग कोय येनीली आती. तो मिळना मांडवाम येनो आन आख्या, तुमहाय मा विरूद काम कोयला हेय, याहाठी तुमहाल या जाडीम भटका पोडी. योका-योक जांअ जी वीस वोरहां नेते त्याअने वोदारे वय हेय ती मोय जाय आन कोवेबी त्या देशाम परवेस नाय कोरी जी आंय तुमहाल दाहू. फक्त कालेब आन यहोशवा परवास कोरी.

जोवे माअहाय देवाल ऐहेके आखता वोनायो, तोवे त्त्या दुखी जाया काहाका त्याहाय पाप कोयलो आतो. याहाठी त्याहाय कनाना माअहाआरी लोडाई कोरा ठरवी लेदा. मोशाय त्याहाल नाय जां हाठी आख्या काहाका देव त्त्याहा आरी नाय जाय, पेन त्याहाय त्या नाय वोनाया.

देव या लडाईम त्याहा आरी नाय गोयलो आतो, याहाठी कनानि लोकहाय त्याहाल आरावी देना आन त्याहामाने आरदाहाल मायी टाक्या. तोवे इस्राएली माअहे कनान माने फिरी येने. आगाढ्ये चाळीस वोरहे हुदी त्ये डोगाम ऐहे-तेऐ भटक्ये.

इस्राएली माअहा कोय जाडीम भटकुना चाळीही वोरहाम, देवाय त्याहा गरजा पुऱ्या कोया. त्याय त्याहाल होरगामाने मन्ना आखतेहे ती बाखे देनी. त्याय लावरीही टोळो बी (जी हारकाज आकारा चिडे रोतहे) त्याहा मांडवाही दोवाडये काहाका त्याहावोय खाहाठी माहा रोय. त्या बादी वेळे, देवाय त्याहा फाडके आन चापलाहाल फाटनाहीने वाचाडी राख्या.

यीही हुदी का देवाय त्याहाल पियांहाठी चमत्कार कोयीन खडकामाने पाई काअडया. पेन यीई बादा दीन बी, इस्राएली माअहाय देवा विरूद आन मोशा विरूद कायबी आखतेज रोये आन कुरकुर कोयी तेबी, देव बोरसावाळो आतो. त्याय जी मानता लेदला आता का तोअ अब्राहम, इसाक, आन याकूबा पोहोहा हाठी कोही त्याय ती कोया.

योक वेळ आजू जोवे त्या माअहावोय पांइ नाय आता, देवाय मोशाल आख्या, खडकाआरे गोठ कोअ, आन त्यामाने पांइ निगी. पेन मोशाय खडका आरे गोठ नाय कोयी. त्याकोयता त्याय, होटीके खडकावोय बेनदा ठोक्या. ऐहेके रिते त्याय देवा अपमान कोयो. बादहा पियांहाठी पांइते निगी येना, पेन देवाल मोशावोय रोग कोय येनी. त्याय आख्या, काहाका तूअ ऐहेके कोअला हेय, याहाठी तू मानता देशाम परवास नाय कोहे.

जोवे इस्राएली माअहे चाळही वोरहे जाडीम भटकी गोये, तोवे ज्याहाय देवा विरूद आखला आता त्ये बादे मोई गोयले आते. तोवे देवाय त्या माअहाल पासी त्या मानता देशा हिवेही हुदी ली गोयो. आमी मोशो खूब डाअयो ओय गोयलो आतो, याहाठी देवाय माअहाल वाट देखाडा हाठी त्या मदत कोराहाठी यहोशवाल निवड्या. देवाय मोशा आरे यी मानता लेदला आता का योक दिही तोअ त्या माअहाही मोशा रोको योक भविष्यो कोनारो दोवाडी.

तोवे मोशाल योका डोगा सेंडीम जांहाठी आख्या काहाका तो त्या मानता देशाल ऐय सकी. मोशाय त्या मानता देशाल देख्या पेन देवाय त्याल त्यामाय जां परवानगी नाय देनी. तोवे मोशो मोई गोयो, आन इस्राएल लोकहाय तीस दिही हुदी इदगो कोयो. यहोशवा त्याहा नवो वाट देखाडनारो बोनी गोयो. यहोशवा योक हारो वाट देखाडनारो आतो काहाका त्याय देवावोय बोरसो कोयो आन त्या गोठ मानी.