13. इस्राएला आरे देवा वोचन

इस्राएलीहाल लाल दोऱ्यामाने तिकानी लेजायन पासे, देव त्याहाल डोगामाने सीनाय आखतेहे त्या डोगाहे लीअ चाल्यो.ओ तो डोगो आतो जां मोशाय सिलगुता जाअडाल देखला आता.त्या माअहाय त्या डोगा निचे त्याहा मांडवा बोनाड्या.

देवाय मोशो आन इस्राएला बादा माअहाल आख्या, तुमहाय सदा मा गोठ मानना हेय आन जी वोचन आंय तुमेआरी लाहु त्याल इतवी राखना हेय. जर तुमा ऐहेके कोहा, तर तुमा मा बक्षिश पोयसा, सेवोकाहा राज, आन योक चोखी जाती उचबी.

देवा हीने त्या पाही याहाठी माअहाय तीन दिही हुदी स्वतःहाल तियार कोअया. तोवे देव सीनाय डोगा सेंडीमाने नीअचे उत्यो. जोवे तो येनो तोवे दोरती कापी उठी, बीज पोडी,धूवाय उठया, आन तुतारीही मोठो आवाज जायो. तोवे मोशो स्वतः डोगावोय चोडी गोयो.

तोवे देवाय माअहा आरी योक वोचन लेदा. त्याय आख्या, आंय तुअमे देव, योहवा हेय. आंयज हेय ज्याय तुमहाल मिसरा आवत्ये ओयनापाने सोडव्या.कोहाबी बिजा देवा सेवा नाय कोअते.

मुरत्यो नाय बोनाडाना आन त्याहा सेवा माअ कोअहा, काहाका आंय, यहोवा, तुमे योकूज देव हेय. खोटी रिते मा नावा वापर माअ कोयते. आठवडा दिहाल चोखो पाळा इत राखजा. बिहिरा शब्दाम, सोव दिहाम आपे बादा काम कोयना, सातवो दिही तुमेहाठी आराम कोयना आन मान इतवूना दिही हेय.

आपे आयही आन आबहा मान राखना. खून नाय कोयना. सीनाळा नाय कोयना. चोरी नाय कोयना. आपे शेजाऱ्या दोनारी, त्या गुअ, नेते कोहीबी वस्तूल ली लेयना मोन नाय कोयना.

तोवे देवाय या दहा आज्ञा दोगडा बेन पाट्याहा वोय लेखीन मोशेल देना. देवाय पाळाहाठी पासी खूब नियम देना. जर त्याहाय या नियमाहा पालन कोया तर देव त्यां माअहाल बोरकत दाअ आन त्याहा हारा राखा करार कोअया. पेन त्याय आख्या का जर त्याहाय त्या पालन नाय कोअया तर त्याहाल दोड मिळी.

देवाय इस्राएलीहाल योक मोठो मांडवो बोनाडा बी आख्या – मिळना मांडवो. त्याय त्याहाल हारा-हारा आख्या का त्या मांडवाल केहेके बोनाडना हेय, आन त्या माजे कोअहयो वस्तू थोवना हेय. त्याय त्याहाल त्या मांडवाल बेन गाळहाम जुदा कोरा हाठी योक मोठो पोडदो बोनाडाहाठी बी आख्या. देव त्या पोडदा पाहालाऱ्या गाळाम यीई आन तां रोय. जाअ देव आतो त्या गाळाम जाहाठी परवानगी योकुज सेवोकाहा-सेवकाल आती.

त्या माअहाल त्या मिळना मांडवा आगला योक वेदी बोनाडना आती. कादोबी जी देवा नियमा पालन नाय कोय तोअ त्या वेदीवोय योक जनावर ली येय. तोवे सेवक त्याल अर्पान कोरी आन वेदीवोय देवाहाठी अर्पना रुपाम सिलगाडी. देवाय आख्या का त्या जनावरा लोय त्या माअहा पापाल दोबाडी लीअ. ये रिते, आमी देव त्या पापाल नाय देखी. तीअ माअहु देवा नाजरीम चोखा उचबी. देवाय मोशा बाहा अहरनाल आन अहरना पोहोहाल सेवक ओराहाठी निवड्या.

देवाय त्या माअहाल ज्या नियम देनला आता त्या नियमाहा पालन कोरा तियार जाया. त्या फक्त देवा माअहे ओरा आन फक्त त्याज सेवा कोराहाठी तियार जाया.

वार दिही हुदी, मोशो सीनाय डोगा सेंडीमाय रोयो. तोअ देवाआरी गोठ कोय रोयलो आतो. पेन माअहे त्या पासी येयना वाट जोवी-जोवी थाकी गोये.त्याहाठी त्ये अहरनाही होना ली येने आन त्याल योक मूर्ती बोनाडा हाटी आख्या काहाका त्ये देवा वगर त्या सेवा कोय सके. यीई रिते, त्याहाय खूब मोठो रुपाम देवा विरूद पाप कोयो.

अहरनाय वासडा रोकी होना योक मूर्ती बोनाडी. त्या माअहाय त्या मूर्ती सेवा कोयना सुरवात कोय देनी आन त्याल अर्पान कोया! त्याहा पापा कोय देवाल रोग कोय येलली आती. तोअ त्याहाल नाश कोय देनारो आतो. पेन मोशाय त्याहाल नाय मारा देवाल विनंती कोयी. देवाय त्या विनंतील वोनायो आन त्याहाल नाश नाय कोया.

सेंले मोशो सीनाय डोगावोरे नीअचे उती येनो. तोअ त्या बेन पाटहील लेदला आता जीहीवोय देवाय दहा आज्ञेहेल लेखल्यो आत्यो. पासे त्याय त्या मूर्तील देख्या. त्याल ओली रग कोय येनी ती पाटही चुरो कोय देनो.

पासे मोशाय त्या मूर्तील तोडीन त्या चुरो कोय देना, आन चुराल पांअयाम मिळवीन त्यां माअहाल तीअ पांअ पाजी देना.देवाय त्या माअहावोय योक पिडा दोवाडी आन त्यामाने खूब माअहे मोय गोये.

ज्ये पाटहील मोशाय फोडी देनला आता त्याहा जागो लाहाठी मोशाय त्या दहा आज्ञाहा दोगडा नवी पाटी बोनाडी. तोवे तोअ पासी डोगावोय चडी गोयो आन पार्थना कोयी का देव त्या माअहाल माफ कोय. नवी पाटीवोय दहा आज्ञा लीन मोशो डोगावोरे नीअचे उती येनो. तोवे देवाय सीनाय डोगाहीने लीन मानता देशा हुदी इस्राएलीहाल वाट देखाडी.