12. जायना .

इस्राएली माअहे मिसर माने निगीन खूब खुश आते.त्ये आमी आवत्ये नाय आते, आन त्ये करारा देशांम जाय रोयले आते! जी काय बी इस्राएलीहाय माग्या, मिसऱ्याहाय त्याहाल बादाज काय देना, ईही हुदी का होना आन चांदी आन बिज्या किमती वस्तू. बिहरा देशा आरदा माअहाय देवावोय बोरसो थोवो आन जोवे इस्राएली माअहे मिसरमाने निग्ये तोवे त्ये बी त्याहा आरे चाल्ये.

आखा दीह्याम वादळा योक मोठो खांब त्याहा आगला-आगला चाले.आन राती वेळे ओ आगी खांबलो बोनी गोयो.देव जी काय त्या वादळा खांबामाय आतो,सदा त्याहा आरे आतो आन त्याहाय परवास कोयती वेळे त्याहाल वाट देखाडी.त्याहाल फक्त ओलहाज कोअना आंता का त्या पाहला चाले.

वायज वाअके पासे,फारो आन त्या माअहाय त्याहा मनाल बदली देना. त्या इस्राएलीहाल पासी आपे आवत्या बोनाडना विचार आतो. याहाठी त्याहाय इस्राएली लोकहा पाहला गोया. ओ देवूज आतो ज्याय त्याहा मनाल बदली देनला आता. त्याय ऐहेके याहाठी कोया काहाका त्या इच्छा आती का बादेज ई जायी लेय का फारो आन मिसऱ्याहा बादा देवहा कोअता तोअ यहोवा, खूब शक्तीवाळो हेय.

होमजाया का त्यां फारो सैनिक आन लाल दोरऱ्या विसमे अटकी गोये.त्ये खूब बीअ गोये आन रोअडा टेक्ये, आमहाय मिसराल काहा सोड्या? आमा मोयनारे हेय!

मोशाय इस्राएलीहाल आख्या, बीअन बंद कोअ देव आजे तुमेहाठी लोडी आन बोचाडी. तोवे देवाय मोशाल आख्या, या माअहाल लाल दोर्या ऐहे आगला जां आख.

तोवे देवाय त्या वादळा खांबाल लीन इस्राएली आन मिसऱ्याहा वीसमाय थोवी देना काहाका मिसरी माअहे इस्राएली लोकहाल ऐई नाय सक्ये.

देवाय मोशाल लाल दोर्यावोय आपे आथ थोवाहाठी आख्या. पासी देवाय वाराकोय दोऱ्या पांअयाल हुदू आन उलटी कानी कोय देना,ज्याकोय दोऱ्यामाने योक वाट बोनी गोयी.

इस्राएली माअहे त्याहा बेनी कानी पांअया कुडा आरे उखाली दोरतीवोरे दोऱ्यामाने आगला चाल्ये.

तोवे देवाय त्या वाटीमाने वादळाल उसली लेदा याहाठी का मिसरी माअहे इस्राएलीहाल बोचीन जाते ऐई. मिसरी लोकहाय त्याहाल दोराहाठी त्याहा पाहला जायना ठरवी लेदा.

सेंले त्याहाय दोऱ्या विसमाने त्या वाटीवोय इस्राएलीहा पाहला लाग्या, पेन देवाय मिसऱ्याहाल बियाडी देना आन त्याहा गाडल्यो रुकी देन्यो. त्यें बोंबला लाग्ये, नाहा! इस्राएली लोकहा ऐसने देव लोडी रोयलो हेय!

बादे इस्राएली दोऱ्या बिहिरी कानी पोची गोये.तोवे देवाय मोशाल आख्या का तोअ पासी पांअयावोय आथ थोवे.जोवे मोशाय ऐहेके कोअया, तोवे पांई मिसरी सैनिकाहा वोय यीन पोडया आन आपे तिज रितीम यी गोया. बादा मिसरी सैनिक बुडी गोया.

जोवे इस्राएली लोकहाय देख्या का मिसरी मोय गोयला आता तोवे त्याहाय देवावोय बोरसो कोअयो.त्याहाय बोरसो कोअयो क मोशो देवाहीने भविष्यो कोअनारो आतो.

इस्राएली माअहे याहाठी बी खूब खुश आते काहाका देवाय त्याहाल मोयना पाने आन आवत्ये ओयना पाने वाचाडी लेदले आते. आमी त्ये देवा सेवा कोरा आन त्या आज्ञा पाळा हाठी सुटे आते. इस्राएली लोकहाय सुटना सन वाळा हाठी आन देवा स्तुती कोराहाठी आरदे गाने आख्ये काहाका त्याय त्याहाल मिसरी सैनिकाहा हीने बोचाडला आता.

देवाय इस्राएलीहाल दर वोरही योक सन वाळा हुकूम देनो यी इतवाहाठी का केहेके देवाय मिसरी लोकहाल आरवी देना आन त्याहाल आवत्ये ओअना हीने सुटे कोअये ओ वोंनडाळना सन आखलो आतो.त्यामाय त्याहाल त्याहां सन वाळाहाठी योक चोखो मेंडो मायना आता, त्याल बुजना आता, आन त्याल बेखमीर बाखी आरे खायना आतो.