11. सण

देवाय मोशो आन अहरनाल फारोही यीई आखा दोवाड्या का इस्राएली लोकहाल जोअ देय.त्याहाय त्याल चेतवनी देनी का जर तो त्याहाल नाय जाअ दी. तर तर देव मिसरी माअहा आजू जनावरहा बादा पोयलाल माय टाकी. फारोय यीई वोनाय बी देवावोय बोरसो कोरा आन त्या गोठ माना नाय कोय देना.

देवाय त्यावोय बोरसो कोअनारा पोयला पोहाल वाचाडा हाठी योक योजना बोनाडी थोवी. बादा कुंटुंबाय योक मेंडो लीन त्याल माअना हेय.

देवाय इस्राएली लोकहाय त्या मेंडा लोय लीन त्याहा गोआ बाअनाही लावा आख्या. त्या माहाल बुजना आता आन पासे त्याल बेखमीरा बाखी आरे उतवाळ कोईन खायना हेय. त्याहाय त्या खायनाल खायीन पासे त्याहाल ताबाडूज मिसर सोडाहाठी तियार रोअ हाठी आख्या.

जेहेके कोराहाठी देवाय इस्राएलीहाल हुकुम देनलो आंतो त्याहाय त्यारीते बादाज काय कोया. भोर-राती देव योका-योक पोयला पोहाल माअतो मिसरा माजेमाने ओयीन गोयो.

इस्राएलीहा योका-योक गोआ बाअनाही लोय लागला आंता, त्याहाठी देवाय त्या गोअहाल सोडी देना. त्यामाजेने बादेज माअहे हारे आते.त्ये मेंडा लोया लीदे वाची गोअले आते.

पेन मिसरी लोकहाय देवावोय बोरसो नाय कोअलो आतो आन त्या हुकूमाल नाय मानला आंता.याहाठी देवाय त्याहां गोआल नाय सोड्या.देवाय मिसरी लोकहा योका-योक पोयला पोहाल माई टाक्यां.

जेलीमाने कैदयाहा पोहहा हीने लीन, फारो पोयला हुदी, योका-योक पोयला पोहाल मोयी गोया. त्याहा खूब दुखा लीदे मिसरा खूब माअहे रोडी रोयले आते आन बोंबली रोयले आते. त्या राती,

फारोय मोशाल आन अहरनाल हाद्या आन आख्या, इस्राएली लोकहाल लीन ताबाडूज मिसरमाने निगी जा! मिसरा माअहा बी इस्राएली लोकहाल ताबाडूज निगी जाहाठी टिनी कोअयी.