10. दहा पिडा

देवात मोशाल आन अहरनाल चेतावनी देनी का फारो खूब टिनीवाळो ओय जाय. जोवे त्या फारोही पाही गोया तोवे त्याहाय आख्या, इस्राएला देव यी आखहे का, मा माअहाल जाअ दे! पेन फारो त्याहा नाय वोनायो आन इस्राएलीहाल जाअ हाठी सुटेअ कोरा राअदीन त्याय त्याहाल आजू खूब कष्ट कोराहाठी लाव्या.

फारो त्या माअहाल जाअ दाहाठी पासीपासी नाय आखतो लाग्यो, याहाठी देवाय मिसर देशा वोय दहा हार्यानाय पिडा दोवाडया.यी पीडहीकोय, देवाय फारोल देखाड्या का तोअ फारो आन मिसरा देवाहा कोअता वोदारे शक्तीवाळो हेय.

देवाय नील नोयील लोयावाळी कोय देनी,पेन फारोय आमी बी इस्राएलीहाल जाअ नाय देना.

देवाय बादा मिसरमाय डेडके दोवाडये.फारोय देडके दूर कोराहाठी मोशाल विनंती कोयी. पेन बादा डेडके मोई गोये, फारोय आपे मनाल कठीण कोय लेदा आन इस्राएली हाल मिसर माने निगी नाय जाअ देना.

याहाठी देवाय जुवहा पिडा दोवाडी. त्या पासे त्याय मगहा पिडा दोवाडी. फारोय मोशाल आन अहरनाल हाद्या आन त्याहाल आख्या का जर ती पिडाल रोअकी देय तर इस्राएली मिसर सोडीन जाय सकतेहे. तोवे मोशाय पार्थना कोयी तोवे देवाय मिसरमाने मगहाल काडी टाक्ये.पेन फारोय त्याअ मन कठीण कोय लेदा आन त्यां माअहाल सुअटे ऐयीन जाअ नाय देना.

त्या आगला, देवाय मिसरीहया बादे पाळीव जनावरे रोग लागिन मोय जाअ देने.पेन फारो मन कठीण ओय गोयला आंता आन त्याय इस्राएलीहाल जाअ नाय देना.

तोवे देवाय मोशाल फारो हुबूर वाराम बूबऱ्या टाका आख्या. जोवे त्याय ऐहेके कोया तोवे मिसरमाने माअहा चाबडीवोय दुखनारा पोपिला निगी येना, पेन इस्राएलीहाल कायज जाया नाय. देवाय फारो मनाल कठीण कोय देना, आन फारोय इस्राएलीहाल सुटे ओययीन जाअ नाय देना.

त्या पासे, देवाय गाऱ्यो पाड्यो आन मिसरामाने बादेज पिके नाश कोय देने आन जो कादो बारे निग्यो त्याल माय टाक्या.फारोय मोशाल आन अहरनाल हाद्या आन त्याहाल आख्या, मांय पाप कोयोहो. तुमा जाय सकतेहे. सेंले मोशाय पार्थना कोयी, आन वादळामाने गाऱ्यो पोडना रुकाय कोयो.

पेन फारोय पासी पाप कोयो आन आपे मन कठीण कोय लेदा. त्याय इस्राएलीहाल सुटे ओयीन जाअ नाय देना.

सेंले देवाय मिसर वोय टोडाहा टोळाल याअ देना. या टोडहाय त्या बादा पिकहाल खाय लेदा ज्याहाल गारीहीकोय नाश नाय कोअला आंता.

पासे देवाय आंदारा कोय देना जी तीन दिही हुदी रोया.यीई ओलाअ भीट आंता का मिसरी माअहे आपे गोमेने नाय निगी सक्ये.पेन जां इस्राएली माअहे रोअते आंते ताअ उजवाडो आंतो.

या नोव पीडहा पासी बी, फारोय इस्राएलीहाल सुटे ओयीन जाहाठी नाय आखी देना. काहाका फारो नाय वोनालो आंतो याहाठी देवाय योक सेंले पिडा दोवाडाहाठी योजना बोनाडी.यीई फारो मनाल बदली दी.