9. देव मोशेल निवडी लेहे

युसुफ मोय गोयो पासे,त्या बादे जातुले मिसर देशाम रोते आते. त्ये आन त्याहां पोहे वार वोरहे ताअ रोये आन त्यांहाल खूब पोहे जाये.त्याहाल इस्राएली ऐहेके आखते आते.

होव वोरहा पासे इस्राएली माअहे खूब वादी गोये. युसुफाय कोयला काम मिसरी माअहे विहिराय गोये आमी इस्राएली माअहा बिख लागती लागी.काहाका त्ये खूब आते त्याहाठी तोवे मिसरावोय राज कोय रोयला फारोय इस्राएली माअहाल मिसरी माअहाल आवत्ये कोय थोव्ये.

मिसऱ्याहाय इस्राएलहाल खूब ओवालाहा बांधकाम आन मोठया-मोठया शेहराहाल तियार कोराहाठी जोबरदस्ती कोयी.ओहोडा कठीन कामहाके त्याहां जीवन खूब वोखा जाया, पेन देवाय त्याहाल बोरकत देनी आन आजू पोहे देने.

फारोय ऐअया ला इस्राएली माअहाल खूब पोहे एतेहे, याहाठी त्याय हुकुम देनो का इस्राएली माअहा पोहहाल नील नोयीम टाकी देअना.

योकी इस्राएली बाई योक पोहाल जन्म देनो. ती आन तीअ दोनाराय त्या पोहाल वार वाआं हुदी दोबाडा कोशीश कोअयी.

जोवे त्या पोहा आयोहो-आबहो त्याल दोबाडी सक्ये नाय, तोवे त्याहां त्या पोहाल मोअनापाने वाचाडा हाठी त्याल योकी जेपनारी सिबलीम थोवीन नील नोयी कडसावोय गुनद्यामाय थोवी.त्या पोहा मोठी बोअही त्या काय हूचबेहे तीअ ऐअती रोयी.

फारो पोही ती सिबली उगाडीन माअजे ऐअहे. तोवे तीअ त्याल त्ये पोहो बोनाडयो. तीय त्या पोहोल दुध पाजाहाठी योकी इस्राएली बाईल हाद्या, पेन तीअ त्या आयहो आती ई तील मालूम नाय आता. तोवे तीं पोहां मोठा जायां आन त्याल त्याल आयही दुधा गरज नाय आती, तोवे त्येंय त्याल फारो पोहयील देना,तीअ त्या नाव मोशे थोव्या.

योक दिही,जोवे मोशो मोठो जायो,तोवे त्याय योका मिसरी माअहाल योका यहूदी आवत्याल ठोकतां देख्या.मोशाय त्याअ इस्राएली बाहाल वाचाडा कोशिष कोअयी.

आपहाल कादा ऐअ नाय ई ऐयीन मोशाय त्या मिसऱ्याल माई टाक्या आन त्या कूडी पूरी. पेन मोशाय कोयला काम कुयें तेबू देखला आता.

जोवे फारोय मोशाय कोयला कामाबद्दल वोनायो तोवे त्याय त्याल मारा कोशीश कोयी. फारो राखवाळ्याहीने हारा राअहाठी मोशो मिसर देश सोडीन डोगाम नाअही गोयो.

मोशो आमी मिसर देशा पाने दूर डोगाम मेंढे चाअरा टेक्यो त्याय ताअज योकी बाई आरे वोराड कोअया आन त्याल बेन पोहा जाया.

योक दिही मेंढे चाऐ तोवे, मोशाय योक जाड सिलगुता देख्या. पेन ती जाड सिलगीन बूबऱ्या जाया नाय ऐहेके त्याल देखाय येना.पासे ती हारीरीते ऐरा तोअ त्यां जाडाही गोयो.तोअ त्या सिलगुनारा जाडाही जाय तोवे, देवा आवाज त्यां कानाम पोडयो, मोशा, तू तोअ पागहामाने चापले काड. काहाका तू पवित्र जागावोय उबो हेय.

देवाय आख्या, मायें मांअ माअहा दुख ऐअला हेय.आंय तुल फारोही मा माअहाल मिसऱ्याहा ताबामाने सोडवाहाठी दोवाडा हेय.आंय त्याहाल कनान देश देनोरो हेय, जी मायें अब्राहम, इसाक आन याकूबाल दांहाठी मानता कोयला आता.

मोशाय आख्या, जोवे माअहा मान होदया का तुल कुअ दोवाड्याहा, तोवे आंय त्याहाल काय आखू? देवाय आख्या,आंय हेय तो हेय.त्याहाल आख, आंय हेय यां मान तुमेही दोवाडला हेय. त्याहाल इंबी आख का, आंय त्याहां आगलाडायहा मनजे अब्राहाम,इसाक आन याकूबा देव हेय. यीज मा कायम नाव हेय.

मोशो खूब बीअ गोयो आन फारोही जाहाठी नाय आखतो लाग्यो काहाका त्याल हारीरीते बोलता येय नाय, याहाठी देवाय मोशा बाहा,अहरोन,याल त्या मदतीहाठी दोवाड्या.देवाय मोशो आन अहरोनाल आगलाज आखी थोवला का फारो टीनी कोरी.