8. देव युसुफ आन त्या कुंटूबाल वाचाडेहे .

वार वोर्हा पासे ,जोवे याकूब डायो ओय गोयो, तोवे त्याय आपे होकलालो पोहो युसुफाल त्या बाहाहां होदपुश कोराहाठी दोवाड्या ज्या जनावरहा टोळी देख-रेख कोअता आता.

युसूफा बाहा त्यावोय कुहुदाता आता काहाका त्याहां आबहो त्यावोय वोदारे माया कोअतो आतो आन याहाठी बी का युसुफ होपने ऐतो आतो का तोअ त्याहां राज कोअनारो ओय जाय. जोवे युसुफ त्या बाहाही येनो तोवे त्याहां त्याल गुलाम बोनाडी लेदो आन त्याल नोकराहा व्यापार कोअनाराहाल वेची देना.

गोअ पासे फिअरा पोयला युसुफा बाहाहाय युसुफा फाडके फाडीन बोकडी लोयामाय बिजवी देना. पासे त्याहांय तीं फाडका त्याहा आबहाल देखाड्या काहाका तोअ यी विचार कोय का योक्ता डोगामाने जनावाराय युसुफाल मायी टाकह्या. याकूब खूब नाराश आतो.

नोकराहा व्यापार कोअनारे माअहे युसुफाल मिस्रमाय ली गोये. नील नोयी कोडसाव बोठलो मिस्र देश योक मोठो आन शक्तीवाळो देश आतो. त्यां नोकराहा व्यापार कोअनाराहाय युसुफाल योका मातला सरकारी सांबा नोकरा रुपाम वेची देना. युसुफाय आपे मालका हारीरीते सेवा कोअयी, आन देवाय युसुफाल बोरकत देनी.

त्या मालका दोनारीय युसुफा आरे हूवाहाठी कोशीश कोयी , पेन युसुफाय ऐहेके देवा विरूद पाप कोयना नाय आख्या. तील रोग कोय येनी आन युसुफावोय खोटो गुनो लावी देनो. त्त्याहाठी त्याल दोयीन जेलीमाय दोवाडी देना. ईही हुदी का जेलीमाय बी, युसुफ देवा भक्तीम खोरो रोयो, आन त्याल देवाय बोरकत देनी.

बेन वोरहा पासे, युसुफ आमी बी जेलीमाय आतो, तोअ खोरो काहा नाय आतो तेबी. योक राती, फारो, जेहेके का मिश्री माअहे आपे राजाल हात कोअतेहे, आन बेन होपने देख्ये त्याहाके त्याल खागावागा कोय देना. त्या कोहोबी होमजाडनारो त्याल त्यां होपनाहा अर्थ नाय आखी सक्यो.

देवाय युसुफाल होपनाहा अर्थ आखाहाठी शक्ती देनी, त्याहाठी फारोय जेलीमाने त्याल पाही हाद्या. युसुफाय त्या होपनाहा अर्थ होमजाडयो आन आख्या, देव भोरपूर पिका वाळा सात वोरहा पासे काळा सात वोरहे दोवाडनारो हेय.

फारो युसुफाकोय ओलो खुश जायो का त्याय त्याल मिस्र बिहीरो शक्तीवाळो माअहु थोवी देनो.

युसुफाय हारा पिकावाळा सात वोरहाम खूब-खूब खायना गोळो कोरा आख्या. जोवे सात वोरहा काळ पोडयो तोवे युसुफ माअहाल तीअ खायना वेच्या काहाका त्यांहावोय वोदी खायना रोय.

तोअ काळ फक्तो मिस्र माअज नाय, पेन कानान माय बी खूब आतो जाअ याकूब आन त्यां कुंटूब रोय.

याहाठी याकूबाय आपे बादहाने मोठा पोहाल खायना वेचाता लाहाठी मिस्र माय दोवाडया.जोवे त्या खायना वेचाता लाहाठी युसुफा हुंबुर उबा रोया तोवे त्या बाहाहाय युसुफाल नाय वोळख्या.पेन युसुफाय त्याहाल वोळखी लेदा.

ई होमजाहाठी का त्या बदलाय गोयहा त्यांहा होदपुश कोयन पासे,युसुफाय त्याहाल आख्या,आंय तुमे बाहा युसुफ हेय. बिअता मा. जोवे तूम्हाय मान गुलामा रूपाम वेची देनेल तोवे तूम्हाय खोटा कोयना ठरवूला, पेन देवाय त्या खोटाकोय हारा कोरा वापर कोयो!या आन मिस्रमाय राअ काहाका आंय तुमा आन तुमे कुंटूबा खायना व्यावथा कोऊ.

जोवे युसुफा बाहा गोअ फिरी गोया आन आपे आबहो याकूब याल आख्या का युसुफ आमी बी जीवतो हेय तोवे तो खूब खुश जायो.

आमीते याकूब योक डाअयो माअहू आतो तेबी तोअ आपे कुंटूबा आरी मिस्रमाय निगी गोयो, आन त्ये तांज रोते लाग्ये. याकूबा मोरा पोयला, त्याय आपे बादा पोहोहाल बोरकत देनी.

वोचना तीअ मानता जी देवाय अब्राहमा आरी कोयला ती इसाकावोय आन त्या पासे याकूब,आन त्या पासे त्या बारा पोहा आन त्यांहा कुंटूबाय यी गोयी. त्यां बारा पोहोहा -पोहे इस्रायला बारा जाती बोनी गोया.