19. भविष्यो कोयनारो

देव सदा इस्राएलीहा पाही भविष्यो कोयनारा दोवाडी रोयलो आतो.भविष्यो कोयनारा देवाहीने गोठ वोनाता आता आन पासे माअहाल आखता आता.

जोवे अहाब इस्राएली राज्यावोय राजा आतो तोवे त्या वेले एलिया भविष्यो कोयनारो आतो. अहाब योक खराब माअहु आतो. त्याय खोटा बाल देवा सेवा कोराडाहाठी माअहाल ताबाम लेदला आता. त्याहाठी एलियाय अहाबाल आख्या का देव त्या माअहाल शिक्षा कोरा जाय रोयलो हेय. त्याय त्याल आख्या, जाव हुदी आंय आजू पांई पोडाहाठी नाय आखू तावू हुदी इस्राएलामाय पांई नाय पोडी आन नाय जाकळा पोडी. ई गोठीकोय अहाबाल रग कोआडी देनी का एलियाल माराहाठी ठरवी लेदा.

याहाठी देवाय एलियाल आख्या का तोअ जाडीम जायीन अहाबाहीने दोबी जाय. एलिया जाडीम त्या जोअरा पाही गोयो जाअ जाहाठी देवाय त्याल आखला आता. रोज हाकाळहे आन वेळेवोय, चिडे एलियाहाठी बाखे आन मांहा लीन येअते आते. या पुरा वेले, अहाब आन त्याअ सैनिक एलियाल होदता रोया, पेन त्याअ त्याल होदी नाय सक्या.

पांई नाय पोडो त्या वार वेले पासे तोअ जोअरो उखाय गोयो. याहाठी एलिया पाहीने योका देशांम निगी गोयो. त्या देशाम योक गरीब विधवा आती जीअ योक पोहो आतो. त्याहा पाअने खायना पारवाय गोयला आता काहाका ताअ कायज पिक नाय जायला आता. पेन तेबी बी, त्या बाई एलिया गावारी-चाकरी कोयी, याहाठी देवाय तीअ आन तीअ पोहोहा गरजा पुरी कोयी, याहाठी तीअ कुटा बासना आन तीअ तेला सीची कोदहीज रिअती नाय जायी. त्या पुरा काळावेले त्याहावोय खायना आता. एलिया वार वोरहे हुदी ताअ रोयो.

साडे तीन वोरहा पासे, देवाय एलियाल आख्या का तोअ पासी पांई पाडी. त्याय पासी इस्राएल राज्याम जायीन अहाबा आरी गोठ कोरा हाठी आख्या. याहाठी एलिया अहाबाही गोयो. जोवे अहाबाय त्याल देख्या तोवे त्याय आख्या, हारा तूअ हेय, संकट लीअ येनारो! एलियाय उतर देना, संकट लीअ येनारो ते तूअ हेय! तूअ यहोवाल सोडी देनला हेय. तोज खोरो देव हेय, पेन तू बआला सेवा कोय रोयलो हेय. आमी तुल इस्राएला बादा माअहाल कर्मेल डोगावोय ली येयना हेय.

सेंले बादे माअहे कर्मेल डोगावोय गोये. त्ये माअहे बी येने जी आखते आते का त्याअ बाला गोठ आखतेहे. येए बाला भविष्यो कोयनारे आते.त्ये बादे ४५० आते.एलियाय माअहाल आख्या, कोवे हुदी तुमा आपे मोनाल फिरवी राखहा? जर यहोवा देव हेयते त्या सेवा कोआ! जर बआल देव हेय, ते त्याअ सेवा कोआ!

तोवे एलियाय बाला भविष्यो कोयनाराहाल आख्या, योका बैला अरपन कोयीन त्या माहां चडवाहाठी योकी वेदीवोय थोवा, पेन आग मा लावहां. त्यां पासे आंय बी ऐहेकेज कोही, आन योक बिजी वेदीवोय आंय माहां थोवही. तोवे जर देव वेदीवोय आग पाडनारो हेय तर तुमा होमजी लेजा का तोअ खोरो देव हेय. तोवे बाला भविष्यो कोयनाराहाय योक अरपन तियार कोया पेन आग नाय लावी.

तोवे बाला भविष्यो कोयनाराहाय बालाही पार्थना कोयी, ओ बआल, आमे वोनाय! आखो दिही त्याहाय पार्थना कोयी आन आवाज आन ईही हुदी का सोवताहाल सुरीके वाडी लेदा, पेन बालाय उत्तर नाय देना, आन त्याय काय आग नाय लावी.

बाला भविष्यो कोयनाराहाय बालाही पार्थना कोरा लगबग पूरो दिही काडी देनो.सेंले त्याहाय पार्थना कोयना बंद कोया. तोवे एलियाय बिहरा बैला माहां देवा वेदीवोय थोवी देना. त्याय पासे, त्याय माअहा कोय पांअया मोठा बासनाहाल त्या अरपनावोय तावू हुदी टाकाहाठी आख्या जाउ हुदी का मांहा, लाकडे,आन इही हुदी का वेदी जागेजागेने दोरती पुरीरोका बिजी नाय जाय.

तोवे एलियाय पार्थना कोयी, ओ यहोवा,अब्राहम, इसाक, आन याकूबा देवा, आमहाल देखाड का तूअ इस्राएला देव हेय आन इही हुदी का आंय तोअ नोकर हेय. मान उतर दे ज्याकोय येए माअहे होमजी लेय का तूअज खोरो देव हेय.

ताबाडूज, वादळामाने आग पोडी आन त्याय मांहा लाकडे, दोगडा, कादू, आन इही हुदी का वेदी जागेजागेने पांई बी सिलगाडी टाक्या. जोवे माअहाय ई देख्या, त्ये दोरतीवोय पोडये आन बोल्ये, यहोवाज देव हेय! यहोवाज देव हेय!

तोवे एलियाय आख्या, बाला योक बी भविष्यो कोयनारो बचीन नाय जाअ जोजे! याहाठी माअहाय बाला भविष्यो कोनाराहाल दोय लेदा आन त्याहाल ताअने जुदा ली गोया आन त्याहाल माई टाक्या.

तोवे एलियाय अहाब राजाल आख्या, माहारी आपे गोअ नाअही जोअ,काहाका पांई पोडनारो हेय. ताबाडूज वादळामाय चेलाय येना, आन खूब पांई पोडा सुरु ओय गोयो. यहोवा त्या उखालाल पारवाडी रोयलो आतो. याकोय जाण जायी का यहोवा ओज खोरो देव हेय.

जोवे एलियाय आपे कामाल पारवाडी देना, तोवे देवाय एलीशा नावा योक माअहाल आपे भविष्यो कोयनाराहाठी निवडयो. देवाय एलीशा कोय खूब चमत्कार कोया. योक चमत्कार नामाना आरी जायो. तोअ योक विरोदयाहा सैनिकाहा सरदार आतो, पेन त्याल चाबडी योक खराब रोग लागी कोयलो आतो. नामानाय एलीशा बद्दल वोनायो, याहाठी तोअ एलीशाही पाही येनो आन त्याय त्याल हारा कोराहाठी विनंती कोयी.एलीशाय नामानाल आख्या जायीन यार्देन नोयीमाय सातदा बुडी लेजे.

नामानाल रग कोयी येनी. त्याय ऐहेके कोराहाठी नाय आखी देना, काहाका ई मूर्खो काम लागता आता. पेन पासे त्याय त्या मन बदली देना आन जायीन यार्देन नोयी पांईयाम सातदा बुडी निग्यो.जोवे सेंली वेले तोअ पांईयामाने बारे निग्यो तोवे देवाय त्याल हारा कोय देना.

देवाय इस्राएल माअहा पाही बिहीरा खूब भविष्यो कोयनारा दोवाडया.त्या बादा माअहाय मुर्तीही सेवा कोअरा बंद कोराहाठी आख्या. त्याकोयता, त्याहाय योक-बिजा आरी हारो व्यवहार कोरा जोजे आन योक-बिजा वोय दया कोरा जोजे. त्या भविष्यो कोयनारा माअहाल आख्या का त्याहाल खोटे कामें कोयना बंद कोय देयना हेय आन त्याअ कोयता देवा गोठी पालन कोयना हेय. जर त्या माअहाय ऐहेके नाय कोया ते देव त्याहाल गुनेगार मानीन त्याहा न्याय कोरी, आन त्याहाल वोखो देखाडी.

वोदारे वेले, त्या माअहाय देवा आज्ञा पाळन नाय कोया. वारदा त्याहाय भविष्यो कोयनाराहा आरी खराब व्यवहार कोयो आन इही हुदी का कदही –कदही त्याहाल माई टाक्या. योकदा, त्याहाय यीर्मया भविष्यो कोयनाराल उखाली वेअयीम टाकी देना आन त्याल ताअ मोरा हाठी सोडी देनो. पेन तो वेअयीम माजे चीखल्याम गुती रोयो. पेन तोवे राजाल त्याय दया येनी आन त्त्याय आपे सैनिकाहाल हुकुम देनो का यीर्मया मोरा पोयला त्याल वेंयीमाने बारे खेची लेय या.

भविष्यो कोयनाराहाय देवा ऐहेने बोला चालुज राख्या जर त्याहाय विरोद कोयो. त्याहाय माअहाल आख्या का जर त्याहाय पश्चाताप नाय कोअयो तर देव त्याहाल नाश कोई दिअ.त्याहाय माअहाल यीबी ईत कोआडया का देवाय त्याहा पाही मसीहा दोवाड्ना बी मानता लेद्ला हेय.