20. गुलाम आन सुटको

इस्राइलाय राज्याय आन यहूदा राज्याय या बेन्याहाय देवा विरूद पाप कोयो. त्याहाय त्या वोचनान तोडी देना जी देवाय त्याहा आरी सीनाय वोय कोयली आती. देवाय त्याहाल ईत कोरा आन पासी त्याय सेवा कोरा हाठी आखी देना का आपे भविष्यो कोयनाराहाल दोवाडया, पेन त्याहाय त्यांहा गोठल मानाहाठी नाय आखी देना.

सेंले देवाय त्याहा विरोदयाहाल त्याहा नाश कोराहाठी मजबूत कोअया बेनी राज्याहाल वोखो देखाडयो. अश्शर योक देश आतो जी खूब शक्तीवाळो ओय गोयला आता. त्ये बिहीरा देशा कोयता खूब खराब बी आते. त्याहाय यीन इस्राएला राज्याहाल नाश कोय देना. अश्शुरीयाहाय यीन इस्राएल राज्यामाने खूबज माई टाक्ये, जी मिळ्या त्याल लुटी लेदा, आन देशा आर्दा हिसहाल सिलगाडी देना.

अश्शुरीयाहाय बादा पुढारी, मातले माअहे, आन ओहोडे माअहे का जी मोगी वस्तू बोनाडी सकतेहे योकारीज योकठा कोया आन त्त्ये त्याहाल अश्शूर देश लीअ गोये. इस्राएलाम फक्त वायज गरीब इस्राएली वाचाला आता.

पासी अश्शुरी माअहे त्या देशांम राअय हाठी पारकाहाल लीअ येना. त्या पारकाआहाय त्या शेहराहाल पासी बोनाडये. ज्या इस्राएली त्याअ वाचाला आता त्याहा आरी त्याहाय वोराड कोया. त्या माअहा पोहोहाल सामरी आखतेहे.

यहूदा राज्य माअहाय देख्या का केहेके देवाय त्यावोय बोरसो नाय कोये आन त्या गोठील नाय माने तोवे इस्राएला राज्या माअहाल वोखो देखाडयो. पेन तेबी बी त्याहाय कनानीयीहा देवहा मुर्तीही सेवा कोयी.देवाय त्याहाल आखी दाअ हाठी भविष्यो कोयनाराहाल दोवाडया. पेन त्याहाय वोनाया हाठी नाय कोय देना.

लगबग १०० वोरहा पासे अश्शुरीयाहाय इस्राएला राज्या नाश कोयी देनो. देवाय बेबीलोना राजा, नबूकदनेस्सराल यहूदा राज्यावोय लोडाई कोरा हाठी दोवाडया. बेबीलोन योक शक्तिवाळा देश आता.यहूदा राजा नबूकदनेस्सरा आवत्यो बोना आन दर वोरही त्त्याल खूब बाअदा पोयसा खोरचा हाठी राजी ओय गोयो.

पेन वार वोरहा पासे, यहूदा राजाय बेबीलोना विरूद काम कोया.सेंले बेबीलोनियाहाय पासी यीन यहूदा राज्यावोय लोडाई कोय देनी.त्याहाय यरुशलेम शेहरावोय कबजो कोय लेदो,मंदिराल नाश कोय देना, आन शेहरा आन मंदिरा खजानो लुटी लेदो.

खोटा कोया याहाठी यहूदा राजाल वोखो कोराडा हाठी, नबूकदनेस्सरा सैनिकाहाय राजा पोहाल त्या हुबूरुज माई टाक्या आन पासे त्याल आंदळो कोयी देनो. त्या पासे, त्ये राजाल लीअ गोये काहाका तोअ बेबीलोना जेलीमाय मोयी जाय.

नबूकदनेस्सर आन त्याअ सैनिक यहूदा राज्या लगबग बादाज माअहाल बेबीलोन लीअ गोया,फक्त खूब गरीब माअहाल पाहाला सोडी गोया काहाका त्ये रानाम पिक पाकाडे. या दिहाहाल गुलाम आखला हेय ज्यामाय देवा माअहाल मानता देशाम निगी जाहाठी जोबरजस्ती कोयली गोयली आती.

जोरी देवाय त्याअ माअहाल त्याहा पापा हाठी गुलामीमाय लीअ जायना कोय वोखो कोआडो, तेबी तोअ त्याहाल आन आपे मानाताल नाय विहरालो आतो. देवाय आपे माअहा देखरेख कोरा चालू राख्या आन आपे भविष्यो कोयनाराहा कोय त्याहाआरी गोठयो कोयतो रोअयो. त्याय मानता सत्तर वोरहा पासे, त्ये पासी मानता देशाम फिरी येने.

लगबग सत्तर वोरहा पासे, पारसा राजा कोरेशाय बेबीलोनाल आरवी देना, याहाठी बेबीलोनावोय राज्य कोरा कोयता पारसा राज्याय वार देशाहा वोय हुकूम कोयो. इस्राएली माअहे आमी यहुदी आखते आते. त्यामाने खूब जाहांय त्याहा पुरा जीवन बेबीलोनामाय काडी देनला आता. फक्त कमीज डाअया यहुदी लोकहालूज यहूदा देश ईत आतो.

पारसी माअहे खूब शक्तिवाळे आते, पेन त्याहाय आपहाय जीतला माअहा वोय माया आती. पारसी माअहा राजा बोनीन वायज वेले पासे, कोरेशाय योक हुकुम देनो का कोहाबी यहुदी जी यहूदामाय जानारा हेय, त्ये पारस माने निगीन पासी यहुदाम जाय सकतेहे. इही हुदी का त्याय त्याहाल मंदिराल बोनाडा हाठी पोयसा बी देना .सेंले गुलामा सत्तर वोरहा पासे, यहुदीयाहा योक हानो टोळो यहूदा यरुशलेम शेहरामाय फिरी येनो.

जोवे त्ये माअहे यरुशलेम पोअचे तोवे त्याहाय मंदिराल आन शेहरा चारीचोमखीने बितडे पासी बोनाडये. पारसी माअहे आमी बी त्याहा वोय राज कोयते आते पेन योकदा पासी त्त्ये मानता देशाम रोअते आते आन मंदिरामाय सेवा कोयते आते.