21. पोरमेहेर मसीहा देयना वायदो कोअहे.

जोवे पोरमेहेराय दुनिया बोनाडली, तो जाआय का या पासे कोअहे बी दिही मसीहाल दोवाडा पोडी. त्याय आदाम आने हव्वा आरी वायदो कोअयो का तो ऐहेके कोरी. त्याय आख्या का हव्वा हीने योक वंश जन्माल यीई जी हापा टोलपा चेंदी. ज्या हापाय हवाल ठोगी देनला तो खोराखोर सैतान आतो. पोरमेहेरा अर्थ आतो का मसीहा पुरीरीते सैतानाल आरवी.

पोरमेहेराय अब्राहमा आरी वायदो कोअलो का त्या दुवारे दुन्या बाद्यो जात्यो बोरकोत पामी. पोरमेहेर यापासे कोअहे बी समये मसीहाल दोवाडीन वायदो पुरो कोरी. तो मसीहा दुन्या योका-योक जातीमाने माअहाल त्याहा पापामाने सोडवी.

देवाय मोशे आरी वायदो कोअलो का येनारा दिहह्याम तो मोशे रोको योक भविष्यद्वक्ता दोवाडी. ओ भविष्यद्वक्ता मसीहा ओरी. यारीते, पोरमेहेराय पासे वायदो कोअयो का तो मसीहा दोवाडी.

पोरमेहेराय राजा दाविदा आरी वायदो कोअलो का त्या योक वंशामाने मसीहा ओरी. तो राजा ओरी आने पोरमेहेरा माअहावोय सदाकाळ राज कोरी.

पोरमेहेराय यीर्मया भविष्यद्वक्ता आरी गोठ कोअयी आने आख्या का योक दिही तो योक नोवो करार कोअय. ती नोवो करार इस्राएला आरी सीनाय डोगावोय कोअलो त्या जुना करारा रोको नाय ओरी. जोवे माअहा आरी नोवो करार कोअय, तोवे तो त्याहावोय स्वताःल त्याज रुपामाय प्रगट ओरी. योका-योक त्यावोय माया राखी आने त्या नियमाहा पालन कोरा इच्छा राखी. पोरमेहेराय आख्या का ई त्या नियम हृद्यावोय लिखी देयना रोका ओरी. त्यें त्या माअहे ओरी, आने पोरमेहेर त्याहा पापहाल माफ कोरी. तो मसीहा ओरी तो त्याहा आरी नोवो करार कोअय.

पोरमेहेर भविष्यद्वक्ताहाल ऐहेके बी आख्या का मसीहा योक भविष्यद्वक्ता ओरी. योक भविष्यद्वक्ता ती माअहु हेय जी देवा वचनाल वोनाडेहे आने पासे माअहावोय पोरमेहेरा संदेशाहा घोषणा कोअहे. ज्याल दोवाडना पोरामेहेराय वायदो कोअलो तो योक खोरो मसीहा आने खोरो भविष्यद्वक्ता ओरी. मोनजे तो मसीहा पोरमेहेरा संदेशाहाल हारीरीते वोनायी, आने तो माअहाल त्या संदेशाहाल हारीरीते हिकाडी.

इस्राएली याजकाय माअहाहाठी पोरमेहेरा आगला अर्पण कोअना चालूज थोव्या. ई अर्पण माअहा पापहाहाटी त्याहाल पोरमेहेरापाने शिक्षा देयना जागावोय अर्पण कोअला. याजकाहाय माअहाहाटी प्रार्थना बी कोअयी. पेन मसीहा खोरो महायाजक ओरी जो पोरमेहेराल दाआहाटी योक खोरा बोली रुपामाय स्वता:ल अर्पण कोअय दी. मोनजे तो कोवेज पाप नाय कोअय, आने जोवे तो स्वता:ल अर्पणा ओराहाटी दी, तोवे दुनियाल कोअहाबी बिहीरा अर्पणा गरज नाय ओरी.

माअहा टोळावोय राजा आन प्रधान राज कोअताहा, आने कोवे-कोवे त्या चुक्यो कोअताहा. राजा दाविदाय फक्त इस्राएली लोकहावोय राज कोअया, पेन राजा दाविदा वंश मसीह पुरा दुनियावोय राज कोरी, आने तो सदाकाळहाटी राज कोरी. त्याकोअता, तो कायम न्याया कोअय राज कोरी, आन खोरा फेसला ली.

पोरमेहेर भविष्यद्वक्ताहाय मसीहा बारेमाय खुबज गोठ्यो आख्यो. दाखलाहाटी, मलाखीय आख्या का मसीहा येयना पोयला योक बिहीरो भविष्यद्वक्ता यी. तो भविष्यद्वक्ता खुब खास रोय. याकोअता, यशया भविष्यद्वाक्ताय लेख्या का मसीहा योक कुवारीपाने जन्म ली. आने मिखा भविष्यद्वक्ताय आख्या का मसीहा बेथलेहेम शेहरामाय जन्म ली.

यशया भविष्यद्वक्ताय आख्या का मसीहा गालीला भागामाय रोय. ज्यें माअहे खुब दु:खी हेय मसीह त्याहाल शांती दि. तो कैद्याहा बी सुटका कोरी. मसीहा बिमाऱ्याहाल आने ज्यें वोनाय नाय सोके, ऐअय नाय सोके, बोली नाय सोके, नेते चाली नाय सोके त्याहाल बी हारो कोअय.

यशया भविष्यद्वक्ताय ई बी आख्या का माअहे मसीहावोय रग थोवी आने त्याल स्विकार कोराहाटी नाकार कोई दी. बिजा भविष्यद्वक्ताहाय आख्या का मसीहा योक हेंगात्यो त्याय विरूद उठी. जखर्या भविष्यद्वक्ता आख्या का तो ओ हेंगात्यो ऐहेके कोराहाटी बिजा माअहावोरे चांदी तीस सिक्का ली. याकोअता, आजू बिजा भविष्यद्वक्ताहाय आख्या का माअहे मसिहाल माई टाकी, आने ई बी का त्या फाडकाहाहाटी पाते रोवी.

भविष्यद्वक्ताहाय ई बी आख्या का मसीहा केहेके मोअरी. यशयाय भविष्यद्वाणी कोअयी का माअहे मसीहावोय थूपी, त्या मज्जाक उडवी, आने त्याल ठोकी. त्ये त्या खुकीमाय भोसकी आने तो खुब पिडा आने दु:खा मोई जाय, ईका तो कायज खाराब नाय कोअय तेबी.

भविष्यद्वक्ताहाय ई भी आख्या का मसीह पाप नाय कोअय. तो खोरो ओरी. पेन तो याहाटी मोई का पोरमेहेर त्याल बिजा लोकहालिदे पापहाहाटी शिक्षा कोरी. त्या मोई जायना कोअय लोक पोरमेहेरा आरी मेल कोरा लायक ओरी. याहाटी पोरमेहेराल जरुरी हेय का मसीह मोअय.

भविष्यद्वक्ताहाय ई बी आखला का पोरमेहेर मसीहाल मोअलाहामाने जीवतो कोरी. ई देखाडेहे का बादो नोवो करार कोअना पोरमेहेरा योजना आती, काहाका तो त्या माअहाल वाचाडी सोके ज्याहाय त्याय विरूद पाप कोयला हेय.

पोरमेहेराय भविष्यद्वक्तावोय मसीहा बारेम खुबूज गोठ्यो प्रकट कोय्यो, पेन मसीहा त्या भविष्यद्वक्ताहामाने कादा बी जीवनाम नाय येनो. यो भविष्यवाण्यो कोअल्यो त्यापाने ४०० कोआता वोदारी वोरहा पासे, नेमला समयावोय पोरमेहेरा मसीहाल या दुनियाम दोवाडना.