23. यीसू जन्म

योसेफ नावा योक सेवा कोअनारा माअहा आरी मरिया मागनी ओय गोयली आती. जोवे तो वोनायो का मरियमाल मोयना हेय तोवे तो जाआय का ती त्या पोहा नाय हेय. पेन तो मरियमा आब्रू नाय दोवाडा आतो, याहाटी त्येवोय तीवोय कृपा करां आने तील ठाकाज फारगुती देयना विचार कोअयो. पेन त्या पोयला तो ऐहेके कोअतो, योका होरगा दूताय त्या होप्नामाय येयने त्याआरी गोठ कोअयी.

त्या होरगा दूताय आख्या, “ओ योसेफ, मरियमाल तो दोअनारी बोनाडीन लेय याहाटी मा बियहे. ती डेडीमाय जी पोहा हेय ती पवित्र आत्मापाने हेय. ती योका पोहाल जन्म दी त्या नाव येशू थोवजे (त्याय अर्थ हेय, यहोवा वाचाडेहे), काहाका तो माअहाल त्याहा पापाहामाने वाचाडी.’’

सेल्ले योसेफाय मरिया आरी वोराड कोअया आने तील त्या दोअनारी कोअयने गोअ लेययेनो, पेन ती पोहाल जन्म देनो तावहुद तो तीआरी नाय हूतो.

जोवे मरियमा जन्म देयना समय पाही आतो, तोवे त्येय आने योसेफाय बेथलेहेमाल जाआहाटी योक लांबो प्रवास कोअयो. त्याहाल ता जायनाज आतां काहाका रोमा अधिकारी इस्राएलाम रोनारा बादा लोकहा गोणती कोअनारो आतो. त्याहाल लागे का बादे माअहे ता जाय त्याहा आगला डाया रोता आता. राजा दाविदा जन्म बेथलेहेमाय जाअलो आतो, आने तो मरियम आने योसेफा बेनह्या वडील आतो.

मरिया आने योसेफ बेथलेहेमाय गोये, पेन ता जनावरहा गोठाल सोडीन त्याहाल राअहाटी केसेज जागो नाय आतो. तोज जागो आतो जा मरियमाय त्ये पोहाल जन्म देना. त्याल त्याहाय गोवायीम हुवाड्यो काहाका ता त्याहाटी कायज पाथना नाय आता. त्याहाय त्या नाव येशू थोव्या.

त्यें राती, ता जागेज रानामाय आर्दा मेंडे चाअनारा त्याहा मेंडहा टोळी राखवाळी कोअता आतां. योकदम, योक चमकुनारो होरगा दूत त्याहावोय प्रगट जायो, आने त्या बिई गोया. त्या होरगा दूताय आख्या, “बिईहा मा, काहाका मावोय तुमेहाटी हारी गोठ हेय. बेथलेहेममाय मसीहा, मालीका जन्म जायलो हेय!’’

जायीन त्या पोहा होद काडा, आने तुमा त्याल फाडकामाय गुटाडळा आने गोवायीमाय हुतलो देखहा.’’ योकदाज, जुग होरगा दूतहा कोअय बोराय गोया. त्या पोरमेहेरा स्तुती कोअय. त्याहाय आख्या, “बादी महिमा होरगामाय गादीवोय बोठला पोरमेहेराल मिळे. दोरतीवोय त्या लोकहामाय शांती ओय ज्याहा तो चिंता कोअहे!’’

तोवे होरगा दूत निंगी गोया. त्या मेंडपाळ बी त्या मेंडहाल सोडीन त्या पोहाल ऐरा गोया ताबाडूज त्या त्याअ जागावोय पोच्या जा येशू आतो आने त्याहाय त्याल गोवायीमाय हुतलो देख्यो, जेहेके का त्या होरगा दूताय आखला. त्याहाल खुब खुशी आती. तोवे त्ये मेंडे चाअनारा पासी तांअ फिरी गोया, जां त्याहा मेंडे आते. त्या जी कायबी वोनाया आने देख्या त्या बादाहाटी त्या पोरमेहेरा स्तुती कोअयी.

पूर्वमाय दूर योका देशामाने चांदालाहा अभ्यास कोअनारा लोक आतां. त्याहाय चांदालाहा आभ्यास कोअयो आने त्या खुब ओकळीवाळा आतां. त्याहाय योक खुब महत्वा चांदालो वादळामाय देख्यो. त्याहाय आख्या का या अर्थ हेय का यहूदीयाहा योका नवा राजाय जन्म जायहो. याहाटी त्या पोहाल ऐराहाटी त्या त्याहा देशामाने प्रवास कोअना फेसलो कोअयो. योका लांबा प्रवासा पासे, त्या बेथलेहेमाय येना आने ती गुऊ मिळ्या जा येशू आने त्या आयहो-आबहो रुकाले आते.

जोवे त्या माअहाहाय येशूल त्या आयही आरी देख्यो ते त्याहाय गुडगा टेकिन त्या स्तुती कोअयी. त्याहाय येशूल किंमती भेट देना. पासे त्या गोअ फिरी गोया.