24. योहान येशूल बाप्तिस्मा देहे.

अलिशिबा आन जखर्या पोहो योहान, मोठो ओयन योक भविष्यद्वक्ता बोनी गोयो. तो जंगलामाय रोय, आने जंगलामाने मद आने टोडा खाय, आने उंटहा चाबडा बोनले फाडके पोवे.

खुबूज माअहे योहाना गोठयो वोनायाहाटी जंगलामाय निंगी येने. त्याय ई आखीन त्याहाल प्रचार कोअयो, “पश्चाताप कोआ, काहाका होरगा राज पाही हेय!’’

जोवे लोक योहना संदेश वोनाया, तोवे त्याहामाने खुब लोक त्याहा पापहापाने पश्चाताप कोअया, आने योहानाय त्याहाल बाप्तिस्मा देना. योहानाल ऐराहाटी खुब धार्मिक अगुवा बी येना, पेन त्याहाय त्याहा पापहा पश्चाताप आने स्वीकार नाय कोअया.

योहनाय धार्मिक अगुवाहाल आख्या, “ओ जेरीवाळा हापहाय! पश्चाताप कोआ आने तुमे वागना बदला. पोरमेहेर हारा फळ नाय देय ओहडा बादा जाडाहाल खांडी टाकी, आने तो त्याहाल आगीमाय टाकी दी.” जी भविष्यदवक्ताहाय आखला योहानाय पुरा कोअया, “ऐ माहारुज आंय तो आगला मा संदेश आखनाराल दोवाडही जो तोहाटी वाट तियार कोरी.’’

धार्मिक अगुवाहाय योहानाल होद्या का काय तू मसीहा हेय. योहानाय उत्तर देना, “आंय मसीहा नाय हेय, पेन तो मा पासे येय रोयलो हेय. तो ओलो मोठो हेय का आंय त्या चांपलाहा दोर्यो सोडा बी लायक नाय हेय.’’

आगले दिही, येशू बाप्तिस्मा लाहाटी योहानाही येनो. जोवे योहानाय त्याल देख्या, तोवे त्याय आख्या, “ऐरा! देवा मेंडा जी दुन्या पापाहाल उसलीन ली जाय.’’

योहनाय येशूल आख्या, “आंय तुल बाप्तिस्मा दाहाटी लायक नाय हेतो. याकोअता या गरज हेय का तू मान बाप्तिस्मा दे.’’ पेन येशूय आख्या, “तुल मान बाप्तिस्मा दा जोजे, काहाका कोराहाटी खोरा काम ईज हेय.’’ सेल्ले योहानाय त्याल बाप्तिस्मा देना, काहाका येशूय कोदहिज पाप नाय कोअला.

बाप्तिस्मा देय देना पासे जोवे येशू पाअंया बारे येनो, तोवे पोरमेहेरा आत्मा कबुतरा रुपामाय प्रगट जाया आने नीचे येयन बोही गोया. त्या समये, पोरमेहेराय होरगामाने गोठ कोअयी. त्याय आख्या, “तू मा पोहो हेय. आंय तोवोय माया कोअहू, आने आंय तोकोय खुब खुश हेय.’’

देवाय योहानाल आखला, “पवित्र आत्मा निचे येयन ज्या कादावोय उबा रोय जाय, त्याल तू बाप्तिस्मा देहे.’’ तोज पोरमेहेरा पोहो हेय पोरमेहेर योकूज हेय. पेन जोवे योहानाय येशूल बाप्तिस्मा देना, तोवे पोरमेहेर पिताल गोठ कोअता वोनायो, जो येशू हेय, आने त्याय पवित्र आत्माल देख्या.