33. योका शेतकऱ्या गोठ

योक दिही, ईसू तळावा कोडसा पाही आतो. तो माअहा योक खूब मोठी गर्दील हिकाडी रोयलो आतो. त्याल वोनाया हाटी ओलेबादे माअहे येने का ईसूल पाही त्या बादहा आरी गोठ कोराहाटी जागो नाय वाचायो. याहाटी तो पांअयामाय उबी उडी वोय चोडी गोयो. तांअ तो बोही गोयो आने माअहाल हिकाडया.

ईसूय त्याहाल ई गोठ आखी, “योक शेतकरी बियांरो वोराहाटी बारे निग्यो. जोवे तो आथाकोय बियांराल फोकी रोयलो आतो तोवे आरदो बियांरो वाटीवोय पोडयो. पेन चीडहाय येयन त्या बियांराल खाय लेदा.’’

“बिहीरो बियांरो दोगडाली दोरती वोय पोडयो जांअ खूब कोमी कादू आतो. दोगडाली दोरती वोय बियांरो खूब माहारी हूकराय येनो, पेन त्याहा मुळे दोरतीमाय माअजे जाअ हारे नाय आते. जोवे दिही निग्यो आने तोप ओअयो तोवे त्ये रोपे कोमाय गोये आने मोई गोये.’’

‘’आजू बिहीरो बियांरो जाडहा माअजे पोडयो. त्या बियांराय वोदा सुरुवात कोअयी, पेन काटहाय त्याहाल दाबी देना. याहाटी काटावाळी दोरती वोय पोडला बियांरा माने निगले रोपे कायबी धान्य पाकाडी नाय सोक्या.’’

‘’बिहीरो बियांरो हारी दोरतीवोय पोडयो. तो बियांरो वोदयो आने बियांरो वोओलो आतो त्याकोयता तीस, साठ, होव पट धान्य पाकाडया. जी कादाबी पोरमेहेरा पाहाला चाला मागहे, ती ई गोठी वोय द्यान देय जी आंय आखी रोयलो हेय!’’

ये गोठीकोय चेलहाल काय होमजाया नाय. याहाटी ईसूय दाखलो आख्यां, “तो बियांरो पोरमेहेरा वचन हेय ती वाट योक ओहोडा माअहू हेय जी पोरमेहेरा वचनाल वोनायेहे, पेन त्याल होमजे नाय. तोवे सैतान त्या पायने वचन उठावी लेय जाहे. मोनजे सैतान त्याल वचन होमजूना हीने दूर थोवतो हेय.’’

“ती दोगडाली दोरती ओहोडा माअहू हेय जी पोरमेहेरा वचन वोनाहयेहे आने खुशीके त्याल स्वीकार कोअहे. पेन जोवे कठीन समय येहे, नेते, जोवे बिहिरे माअहे त्याल खिजवाडतेहे, तोवे तो पोरमेहेरा हीने दूर निंगी जाहे. मोनजे तो पोरमेहेरा वोय बोरसो कोरा बंद कोई देहे.’’

“ती काटावाळी दोरती ओहोडा माअहू हेय जी पोरमेहेरा वचन वोनायेहे. पेन ती खूब बादया गोठही बदल चिंता कोयना सुरुवात कोय देहे. काही समया पासे, आमी तो पोरमेहेरावोय माया कोरा खोरो नाय हेय. याहाटी जी त्याहाय पोरमेहेरा वचना कोय हिकला आता तो त्या पोरमेहेराल खुश कोअना माय खोरा नाय कोई रोयलो हेय. तो गोंवहा बुहटा रोको हेय जी कायबी धान्य पाकाडी नाय सोके.’’

“पेन हारी दोरती तीं माअहू हेय जी पोरमेहेरा वचनाल वोनायेहे, त्यावोय बोरसो कोअहे, आने फळ पाकाडहे.’’