50. ईसू पासी फिरी यी

लगबग बेन ओजार वोरहे, दुनिया माय बादा जागाहा वोय वोदारीने वोदारी माअहे ख्रिस्त ईसू बदल हाऱ्यो गोठ्यो वोनाय रोयले आते. मंडळी वोदी रोयली आती. ईसूय वायदो कोअलो हेय का तो दुनिया सेंलीमाय पासी फिरी यी. पेन तो आमी फिरी नाय येनलो हेय, तेबी तो त्या वायदो पुरो कोरी.

जोवे का आमा ईसू पासी फिरी येयना वाट जोवतेहे, पोरमेहेर आमहाल ऐहकोय रिते जीवन जीवा इच्छा कोअहे जी पवित्र हेय आने ज्या त्या मान कोअताहा. जोवे ईसू दोरती वोय रोय रोयलो आतो तोवे त्याय आख्यां, ‘’मा चेला दुनिया माय बादाज जागाहा वोय माअहाल पोरमेहेरा राज्या बदल हारी गोठी प्रचार कोअहा, आने तोवे सेल्लो समय यी लागी.’’

खूब जातीहीय आमी हुदी ईसू बदल नाय वोनाला हेय. होरगामाय फिरी जांअ पोयला, ईसूय ख्रिस्ती माअहाल हारी गोठ आखा आखी ज्याहाय ई कोदहीज नाय वोनाला हेय. त्याहाल आखा, ‘’जा आने बादी जाती लोकहाल चेला बोनाडा!’’ आने ‘’वाडनी कोराहाटी रान पाकी गोयला हेय!’’

ईसूय ई बी आख्यां, “कोअहाबी माअहा सेवक त्या मालकाने मोठा नाय रोय. या दुनिया महत्वा माअहाय मा नाकर कोअई, आने मा कोअता त्यें तुमहाल बी सताडी आने माई टाकी. या दुनियामाय तुमा पिडीत ओअहा, पेन मजबूत बोना, काहाका माये सैतानाल आरवी देनला हेय जो या दुनिया वोय राज कोअहे. जर तुमा सेले हुदी मावोय बोरसो कोअनारे बोनी राहा, तर पोरमेहेर तुमहाल बोचाडी!’’

ईसूय त्या चेलहाल ई होमजा हाटी योक गोठ वोनाडी का जोवे दुनिया नाश ओरी तोवे माअहा आरी काय ओरी. त्याय आख्यां, “कोअहा माअहू त्या रानामाय हारो बियांरो वोअयो. जोवे तो हुवी रोयलो आतो तोवे त्या विरुदयो येनो आने गोंवहा बियांरा माय जंगली बियांरो वोई देनो, आने पासी तो निगी गोयो.’’

‘’जोवे रोप निगे तोवे सेवकाय त्या माअहाल आख्यां, “ओ सायब, तुयें ते आपे रानामाय हारो बियांरो वोअलो आतो. ते पासे यामाय जंगली जाडे काहा हेय? ‘त्या माअहाय उतर देना, फक्त मा विरुद्या त्याल वोरा कोअनारा ई मा योगदो विरुदयो हेय त्यांय ऐहकोय कोअला हेय.’’

‘’त्या सेवकाहाय त्या मालकाल उतर देना, “काय आमहाल जाडीमाने पिके उपडी टाका जोजे? त्या मालकाय आख्यां, नाय. जर तुमा ऐहकोय कोअहा ते तुमा आरदा गोंवहाल बी उपडी टाकहा. वाडनी समय हुदी वाट जोवा. तोवे जंगली पिके खाडामाय योकठां कोय ला काहाका तुमा त्याल सिलगाडी सोकहा. पेन गोंवहाल मांअ खोळामाय लेय या.’’

चेलहाल ई गोठी अर्थ नाय होमज्यो, याहाटी त्याहाय ईसूल होमजाडां विनंती कोअयी. ईसूय आख्यां, “हारो बियांरो वोअनारा माअहू ख्रिस्ता काम कोअहे. रान दुनिया हेय. हारो बियांरो पोरमेहेर राज्या माअहा काम हेय.’’

“जंगली पिके त्या खराब माअहा, सैताना माअहा काम हेय. त्या माअहा विरुदयो सैताना काम कोअतो हेय, ज्याय जंगली पिके वोई देनले आते. वाडनी या दुनिया नाश हेय, आने वाडनी कोअनारो पोरमेहेर होरगोदूतहा काम कोअहे.’’

“जोवे दुनिया नास ओरी तोवे होरगादूत त्या बादा माअहाल योकाज जागावोय योखठां कोरी जी सैताना हेय. त्या होरगादूत त्याहाल योका खूब सिलगुती आगीमाय टाकी दिअ. तांआने त्यें माअहे मोठा सतावाके रोडी आने त्याहा दात कोकडावी. पेन जी माअहू सेवा कोअनारा हेय, ज्याहाय ईसू रोका जीवला हेय, त्ये माअहें पोरमेहेर आबा राज्यामाय दिहया रोके चमकी.’’

ईसूय ई बी आख्यां का तो दुनिया नाश ओरा पोयला दोरती वोय यी. तो त्या रिते पासी यी जेहकोय तो गोयलो हेय. मोनजे, त्यावोय खोराज आंग रोय, आने तो वादळा वोय बोहीन यी. जोवे ईसू फिरी यी, तोवे दरेक ख्रिस्ती जी मोई गोयला हेय मोअला माने जीवी उठी आने त्याल वादळामाय मिळी.

जोवे जी ख्रिस्ती आमी बी जीवता हेय त्यें वादळा माय उसली लेदले जाय आने त्या बिहीरा ख्रिस्ती माअहा आरी मिळी जाय जी मोअला माने जीवता उठला हेय. त्यें बादे ईसू आरी रोय. त्यापासे, ईसू त्या माअहा आरी रोय. जोवे त्यें योकठेज रोय तोवे त्याहा पांय कायम हाटी पुरी शांती रोय.

ईसूय त्यावोय बोरसो कोअनारा दरेक जाआ योक मुकुट देयना करार कोअला हेय. त्ये बारीमासा हाटी पोरमेहेरा आरी दरेक वस्तू वोय राज कोरी. त्यापांय खोरी शांती रोय.

पेन पोरमेहेर त्या बादहा न्याय कोरी जी ईसू वोय बोरसो नाय कोएत. तो त्याहाल नोरकामाय टाकी दिअ. तांअ त्यें रोडी आने त्याहा दात कोकडावी, आने त्यें कायमा पिडा बोगतें रोय. कोदहीज नाय उलानारी आग त्याहाल लगातार सिलगाडती रोय, आने किडे त्याहाल खाहाटी कोदहीज रुकायी नाय.

जोवे ईसू फिरी, तोवे तो पुरी रिते सैतान आने त्या राज्याल नास कोअई दिअ. तो सैतानाल नोरका आगीमाय टाकी दिअ. तांअ सैतान कायमा हाटी सिलगुतो रोय, त्या बादहा आरी ज्याहाय पोरमेहेरा गोठयो माना कोअता सैताना पाहाला चालां निवडूला हेय.

काहाका आदाम आने हवाय पोरमेहेरा आज्ञा नाय मानली आती आने पापाल या दुनिया माय लेय येनले आते, पोरमेहेरांय त्याहाल हाराप देनो आने त्याल नाश कोरा निर्णय कोअयो. पेन योक दिही पोरमेहेर योक नोवो होरगो आने नोवी दोरती बोनाडी जी खोरी ओरी.

ईसू आने त्या माअहे त्या नोवी दोरती वोय रोय, आने तो बादी वस्तूहू वोय राज कोरी. तो माअहा डोळहा माने दरेका रोज्ये नुही दिअ. आमी कादा बी पिडीत आने दुखी नाय रोय. त्यें रोडी नाय. त्यें बिमार नाय ओरी आने मोई नाय. आने तांअ कायबी खराब नाय रोय. ईसू आपे राज्या वोय न्यायाकोय, आने शांती कोय आरी राज कोरी. तो सदाकाळ त्याअ माअहा आरी रोय.