49. यहोवा पोरमेहेरा नोवा वचन

योका होरगादुताय योकी जुवान बाईल मरियाल आख्यां का ती पोरमेहेरा पोहाल जन्म दिअ. ती आमी कुवारी आती, पेन पवित्र आत्मा त्ये पाही येना आने त्येल मोयना ओअया. त्येय योका पोहाल जन्म देनो ज्या नाव त्येय ईसू थोव्या. याहाटी पोरमेहेर आने माअहू बेनी हेय.

यीसूय खूब चमत्कार कोया जी ऐयतेहे का तोअ देवा पोहो हेय. तोअ पांया वोय चाल्यो आन तुफानाल शांत कोया. त्याय खूब भिमार माअहाल हारा कोया आन खूब माअहा माने खराब आत्मे काडी टाक्ये. त्याय मोयला माअहाल जीवते कोय देने, आन त्याय पाच बाख्यो आन बेन मासहाल ५,००० मांअहाल खावाडा हाठी खूब खायनाम बदली देना.

यीसू योक मोठो शिक्षक बी आतो. जी कायबी त्याय हिकाड्या, तीअ त्याय खोरा कोयीन हिकाड्या. जी तोअ माअहाल कोरा हाठी आखतो हेय तीअ त्याहाय कोरा जोजे काहाका तोअ देवा पोहो हेय. दाखला हाठी, त्याय हिकाड्या का तुमा बिहीरा मांअहाल यारीते माया कोयना गरज हेय का जेहेके तुमा स्वताहा वोय माया कोयतेहे.

त्याय ईबी हिकाड्या का तुमहाल बादी वस्तूहू कोयता वोदारी आन आपे मिळकती कोयता बी वोदारी देवा वोय माया कोरा जोजे.

ईसूय आख्या का दुनिया माने कोहीबी वस्तूल मिळवा कोयता वोदारी हारा हेय का देवा राज्याम ओयना. त्या राज्याम परवास कोरा हाठी गरज हेय का देव तुमहाल तुमे पापाहीने बोचाडे.

यीसूय आख्या का काअही माअहे त्याल स्वीकार कोरी. देव त्या माअहाल बोचाडी. पेन बिहिरे माअहे त्याल स्वीकार नाय कोरी. त्याय ईबी आखला का काअही माअहे हारी दोरती रोके हेय, काहाका त्ये यीसू बदल हार्या गोठया स्वीकार कोय लेतहे, आन देव त्याहाल बोचाडी लेहे. पेन काअही माअहे वाटी कठीन दोरती रोके हेय. देवा वचन बियांरा रोका वाटीवोय पोडी जाहाय, पेन ताअ कायज बी नाय उदे. ये माअहे यीसू बदल वचनाल स्वीकार नाय कोएत. त्ये त्या राज्याम परवास कोरा नाय कोय देतेहे.

ईसूय हिकाड्या का देव पापी माअहा वोय खूब माया कोअहे. तोअ त्याहाल माफ कोरा मागतो हेय आन त्याहाल आपे पोहे बोनाडा मागहे.

ईसूय ईबी आख्या का देव पापहाल विटाळ कोयतो हेय. काहाका आदम आन हवाय पाप कोअयो, याहाठी त्याहा बादा पोहोहाय बी पाप कोअया. याअ दुनियाम रोयनारा दरेक जाआ पाप कोयता हेय आन देवाहीने दूर हेये. दरेक जाआ देवा विरूद्या हेय.

पेन देवाय याअ दुनियामाय रोयनारा दरेक जाआल यारीते माया कोई: त्याय त्याहाल त्याअ योखलो पोहो दी देनो काहाका देव त्याहाल दंड नाय देय जी त्यावोय बोरसो कोयते हेय. त्या कोयता, त्ये त्याहा आरी बारीमासा आरी रोयी.

तुमा मोअना योग्य हेय, काहाका तुमहाय पाप कोअलो हेय. तुमहा कोय देवाल रोग ओअना खोराज हेय, त्या इच्छा, तो यीसू वोय रोग कोअयी. त्यांय ईसूल क्रुसा वोय मरन देयन दंड देनो.

ईसूय कोदहीज पाप नाय कोअयो, पेन त्याय देवाल त्याल दंड दांअ देनो. त्याय मोई जायना स्वीकार कोअया. यारीते, तुमे पापहाल याअ दुनियाम रोयनारा दरेक जाआ पापहाल उसली लीअ जांहाटी तो योक खोरो अरपन आतो. यीसूय स्वताहाल देवा हाठी अरपन कोई देना, याहाठी देव कोहाबी पापाल, ईही हुदी का मोठा पापाल बी माफ कोअहे.

जर तुमा खूब हारे कामहाल कोअते ओरी, तर त्याकोय देव तुमहाल नाय बोचाडी. त्या आर्यो बोना हाठी ओहोडा कायबी नाय हेय जी तुमा कोय सकतेहे. त्या इच्छा इ हेय का, तुमहाय बोरसो कोयना हेय का यीसू देवा पोहो हेय, आन तो तुमे बदले क्रुसा वोय मोई गोयो, आन ईबी का देवाय त्याल पासी जीवतो कोई देनो. जर तुमा यावोय बोरसो कोअहा, तर देव तुमे पापाहा माफी दी.

देव दरेक जाआल बोचाडी जी ईसू वोय बोरसो कोअहे आन त्याल आपे प्रभू स्वीकार कोय्तो हेय. पेन तोअ त्याहाल नाय बोचाडी जी त्यावोय बोरसो नाय कोए. ई काय महत्त्वा नाय हेय का तुमा धनवान हेय का गरीब हेय, माअहु हेय का बाई हेय, डाअया हेय का जुवान हेय, नेते तुम केसे रोतहे. देव तुमहा वोय माया कोअहे का तुमा ईसू वोय बोरसो कोआ का तोअ तुमे आऱ्यो बोनी जाय.

यीसू तुमहाल हादी रोयलो हेय का त्यावोय बोरसो कोआ आन बाप्तिस्मा लाअ. काय तुमा बोरसो कोयतेहे का देवा योखलो पोहो, यीसूज मशीहा हेय? काय तुमा बोरसो कोयतेहे का तुमा योक पापी हेय आन ई का तुमा देवा कोय तुमहाल दंड देयना योग्य हेय? काय तुमा बोरसो कोयतेहे का तुमे पापहाल मिटाडां हाटी ईसू क्रुसा वोय मोअयो?

जर तुमा यीसू वोय आन जी काय त्याय तुमेहाठी कोयला हेय त्यावोय बोरसो कोयतेहे, तर तुमा योक ख्रिस्ती हेय! सैतान त्याअ आंदारा राजमाय आमी तुमहा वोय राज नाय कोए. आमी देव त्याअ उजवाडा राजमाय तुमहा वोय राज कोअहे. त्याय तुमहाल पाप कोरा रुकी देनला हेय, जीं तुमां कोअते आते. त्याय तूमहाल योक नोवां, हारां जीवन देनला हेय.

जर तुम योक ख्रिस्ती हेय तर जी यीसूय कोयला हेय त्या कोयता देवाय तुमे पापहाल माफ कोय देनला हेय. आमी, देव योका विरूद्या रोको नाय, तुमहाल योक खूब हारो आऱ्यो मानतो हेय.

जर तुमा देवा आर्ये हेय आन प्रभू ईसू सेवक हेय तर तुमा त्या गोठी पालन कोआना इच्छा कोहा जी ईसू तुमहाल हिकाडेहे. जरका तुम ख्रिस्ती हेय, सैतान आमी बी पाप कोराहाठी तुमा परीक्षा कोरी. पेन देव बारीमास तीअ कोहे जी तोअ आखहे का तोअ कोरी.तोअ आखहे का जर तुमा तुमे पापहाल मानी लाहा, तोवे तुमहाल माफ कोय दिअ. तोअ तुमहाल पापा विरूद लोडा शक्ती दिअ.

देव तुमहाल प्रार्थना कोरा आन त्या वचन वाचा हाठी आखतो हेय. तोअ तुमहाल बिहीरा ख्रिस्ती माअहा आरी मिळीन त्याय आराधना कोरा हाठी बी आखतो हेय. तुमहाल बिहीरा माअहाल बी आखना हेय का त्याय तुमे हाठी काय कोयला हेय. जर तुमा याअ बादा कामहाल कोहा, तर तुमा त्याय योक खोरे आर्ये बोनी जाहा.