48. ईसू ओ करार कोयलो मशीहा हेय

जोवे पोरमेहेरांय दुनिया बोनाडी तोवे बादाज काय हारां आतां. कायबी पाप नाय आतो. आदाम आने हवा योक-बिजा वोय माया कोअते आते, आने त्यें पोरमेहेरांवोय माया कोअते आते. कायबी बिमारी आने मोराण नाय आतां. पोरमेहेर ऐहकोयज दुनियाल रांअ मागतो आतो.

सैतानाय हापा रुपामाय वाडीमाय हवा आरी गोठ कोअई, काहाका तो त्येल ठोगनारो आतो. तोवे हवा आने आदामाय पोरमेहेरा विरूद पाप कोअयो. काहाका त्याहाय पाप कोअलो आतो याहाटी दोरती वोय रोनारे बादे माअहे मोई जातहे.

काहाका आदाम आने हवाय पाप कोअलो आतो, याहाटी काय आजू बी खोटा ओअया. त्यें पोरमेहेरा विरुद कोअनारे बोनी गोये. ज्याकोय जायला आतां, तोवे बादा जाअहाय पाप कोअलो हेय. दरेक जांआ जल्मा माने पोरमेहेरा विरुदया हेय. पोरमेहेर आने माअहा विसमाय शांती नाय आती. पेन पोरमेहेर शांती देनारो आतो.

पोरमेहेरांय मानता कोअया का हवा योक पोहो सैताना टोलपा फोडी. त्याय ई बी आख्यां का सैतान त्या पाटलील चावी. बिहीरा शब्दामाय, सैतान मशीहाल माई टाकी, पेन पोरमेहेर त्याल पासी जीवतो कोई दि. त्यापासे, मशीहा सैताना शक्तील कायमा हाटी नास कोई दि. खूब वोरहा पासे, पोरमेहेरांय प्रकट कोअया का तो मशीहा हेय.

पोरमेहेरांय त्या रेलीकोय त्या परिवाराल बोचाडया ज्याल तो लेय येनारो आतो. नोहाल योक उडी बोनाडा आख्यां का तो ये रिते पोरमेहेरांय त्या माअहाल बोचाड्या ज्या त्यावोय बोरसो कोअताहा. ये रीते, त्ये बादेज पोरमेहेरा कोय माई टाका योग्य आते काहाका त्याहाय पाप कोअलो आतो. पेन पोरमेहेरांय त्या बादहाल वाचाडा हाटी ईसूल दोवाडया ज्ये त्यावोय बोरसो कोअतेहे.

होव वोरहे हुदी, याजक पोरमेहेरा हाटी अर्पण कोअता रोया. ई देखाडहे का माअहाय पाप कोअयो, आने ई का त्यें पोरमेहेरा कोय त्याहाल दंड ओअना योग्य आते. पेन त्या अर्पणा कोय त्याहा पापहाल माफ नाय कोय सकते आते. ईसू बादहाने मोठो याजक हेय. त्याय ई कोअया जी कोहोबी याजक नाय कोई सोके. त्याय तीं योकूज अर्पण ओअरा हाटी सोवताहाल देय देना जी दरेका पाप मिटाडी सकते आते. त्याय स्वीकार कोअया का पोरमेहेर त्या बादा पापहा हाटी त्याल दंड देय. याहाटी, ईसू खोरो माहायाजक आतो.

देवाय अब्राहमाल आख्या, आंय तोअ कोय दुनिया बादी जातील बोरकत दीअही. यीसू याअ अब्राहमा जाती आतो. पोरमेहेरांय अब्राहमा कोय बादी जातील बोरकत देहे, काहाका जी यीसू वोय बोरसो कोहे पोरमेहेर त्या बादहाल पापा माने बोचाडेहे. जोवे माअहे यीसू वोय बोरसो कोयतेहे, तोवे पोरमेहेर त्याहाल अब्राहमा पोहे मानहे.

पोरमेहेरांय अब्राहमला आख्या का तोअ आपे प्रिय पोहो, त्याहाठी अरपन कोई दिअ. पेन पासी पोरमेहेरांय इसाका बदले अरपन कोरा हाठी योक मेंडो देनो. आमा बादे आपे पापहा हाठी माई टाका योग्य आते! पेन पोरमेहेरांय आमे जागा वोय मोरां हाठी ईसूल अरपना रुपाम देना. याहाठी आमा ईसूल पोरमेहेरा मेंडा आखतेहे.

जोवे देवाय मिसर माय सेंली पिडा दोवाडी तोवे त्याय दरेक इस्राएली परिवाराल आख्या का त्या योका मेंडाल अरपन कोये. त्या मेंडा माय कायज खराबी नाय ओरा जोजे. तोवे आपे बाअना चौकटाही उचे आन भोगलाम त्याहाल त्या लोयाल लावना आता. तोवे पोरमेहेरांय त्या लोयाल देख्या तोवे तोअ आगला निगी गोयो आन त्याहा पोयला पोहाल नाय माअया. जोवे ई ओया तोवे पोरमेहेरांय त्याल वोलाडना सन आख्या.

ईसू वोलाडना सना योक मेंडा रोको हेय. त्याय कोवेबी पाप नाय कोयो, याहाठी त्यामाय कायज चुकी नाय आता. तोअ वोलाडना सना वेले वोय मोअयोजोवे कादो ईसूय बोरसो कोहे, तोवे यीसू लोय त्या माअहा पापा बोदलो चुकाडेहे. ई ऐहेके हेय जेहेके का पोरमेहेर त्या माअहा हिने आगला निगी गोयो, काहाका तोअ त्याल दंड नाय देय.

पोरमेहेरांय इस्राएली माअहा आरी योक करार कोअयो, काहाका त्या ओहोडे माअहे आते ज्याहाल पोरमेहेरांय आपे ओरा हाठी निवडी लेदला आता. पेन आमी पोरमेहेरांय योक ओहोडो करार कोअलो हेय का बादहा हाटी हेय. जर कोहीबी जाती कोहाबी जाआ या नावा मानताल स्वीकार कोहे, तर तोअ पोरमेहेर माअहाम बेडाय जातो हेय.तोअ ऐहेके याहाठी कोअतो हेय काहाका तोअ ईसू वोय बोरसो कोयतो हेय.

मोशो योक ओहोडो भविष्य कोयनारो आतो ज्याहाय देवा वचनाल मोठी शक्ती कोय प्रचार कोयला आता. पेन यीसू बादा भविष्य कोयनाराहा माय मोठो आतो. तो पोरमेहेर हेय, याहाठी जी कायबी त्याय कोया आन आख्या तोअ पोरमेहेरा काम आन वचन आतो. याहाठी पवित्र-शास्त्र ईसूल पोरमेहेरा वचन आखतो हेय.

पोरमेहेरांय राजा दाविदा आरी करार कोअलो आतो का राजा रुपाम त्या योक पोहोहामाने पोरमेहेरा माअहा वोय बारीमासा हाटी राज कोरी. ईसू पोरमेहेरा पोहो आन मशीहा हेय, याहाठी तोअ राजा दाविदा पोहोहा माने हेय जो कायम हाठी राज कोरी.

दावीद तर इस्राएला राजा आतो, पेन ईसू बादा दुनिया राजा हेय! तोअ पासी यी आन कायम हाठी राज न्यायाकोय आन शांती कोय आरी राज कोरी.