10. दस विपत्तियाँ
परमेश्वरे मूसा और हारून ने चेतावनी दिदी के फिरौन बोत ही हठीलो वेई जाएगा। पसे जेरां वा फिरौन रे कोडे ग्या तो वणां केयूं के, "इस्राएल रो परमेश्वर यूं किये है, के मारे लोगां ने जावा दे!" पण फिरौने वणांरी वात ने नी हुण्यी और इस्राएलियां ने जावा रे लिए आजाद करवा रे बजाए वणीं वणांने और ज्यादा कठिन काम करवा रे लिए मजबूर किदा।
फिरौन वणां लोगां ने जावा देवा हूं लगातार इनकार करतो रेयो, अणीं वाते परमेश्वरे मिस्र पे दस भयंकर विपत्तियां ने भेज्यी। और अणीं विपत्तियां रे द्वारा, परमेश्वरे फिरौन ने दिखायो के वो फिरौन और मिस्र रा सब देवताओं हूं अधिक शक्तिशाली है।
परमेश्वरे नील नदी रा पाणी ने लोई मे बदली दिदो, पण फिरौने अबार भी इस्राएलियां ने जावा नी दिदा।
परमेश्वरे पुरा मिस्र मे डेटकां भेज्या। और फिरौने डेटकां ने छेटी करवा रे लिए मूसा हूं निवेदन किदो। पण सब डेटकां रे मरी जावा रे बाद, फिरौने आपणां मन ने पासो कठोर कर लिदो और इस्राएलियां ने मिस्र हूं बाण्णे नी जावे दिदा।
अणीं वाते परमेश्वरे कुटकियां री विपत्ति ने भेज्यी। और वणारे बाद वणीं डाँसां री विपत्ति भेज्यी। पसे फिरौने मूसा और हारून ने बुलाया और वणांहूं केयूं के यदि वा वणी विपत्ति ने रोकी देईं तो मुं इस्राएलियां ने मिस्र हूं जावे दूँगा। और जेरां मूसाए प्रार्थना किदी तो परमेश्वरे मिस्र पे हूं डाँसां ने हटाई दिदी। पण फिरौने आपणां मन ने पासो कठोर कर लिदो और वणां लोगां ने आजाद वेईन जावे नी दिदा।
अणांरे आगे, परमेश्वरे मिस्रियां रा सब पालतू जनावरां ने बीमार वेईन मरी जावे दिदा। पण फिरौन रो मन पासो कठोर वेई ग्यो हो अणीं वाते वणीं इस्राएलियां ने जावे नी दिदा।
परमेश्वरे मूसा ने फिरौन रे हामे वायरा मे रकोडो नाखवा रे लिए केयूं। और जेरां वणीं असो किदो तो मिस्र रे लोगां री त्वचा पे भयानक फोडा-फूंसी निकलीं आया, पण इस्राएलियां ने कईस नी वेयो। पसे परमेश्वरे फिरौन रा मन ने कठोर करी दिदो, अणीं वाते फिरौने इस्राएलियां ने आजाद वेईन जावे नी दिदा।
अणांरे बाद, परमेश्वरे कडा गिराया और मिस्र री अधिकांश फसलां ने नष्ट कर दिदी और ज्यो कोई भी घेर हूं बाण्णे निकल्यो वणांने मारी नाख्यो। पसे फिरौने मूसा और हारून ने बुलाया और वणांहूं केयूं के, "मई थांने रोकिन पाप किदो है। और थां लोग अबार जाई सको हो।" अणीं वाते मूसाए प्रार्थना किदी, और आकाश हूं कडा गिरणां बन्द वेई ग्या।
पण फिरौने फेर हूं पाप किदो और आपणां मन ने कठोर कर लिदो। और वणीं इस्राएलियां ने आजाद वेईन जावे नी दिदा।
अणीं वाते परमेश्वरे मिस्र पे टिड्डियाँ रा दलां ने आवणे दिदा। और अणीं टिड्डियाँ वणीं पुरी फसलां ने खाई लिदी जणीने कडां नाश नी किदी ही।
पसे परमेश्वरे पुरा मिस्र मे अंधारो कर दिदो ज्यो तीन दनां तक बण्यो रेयो। और यो अंधारो अतरो भयानक हो के मिस्री लोग आपणें घेर हूं नी निकली सक्या। पण जटे इस्राएली लोग रेता हा वटे अजवालों हो।
अणीं नौ विपत्तियां रे बाद भी, फिरौने इस्राएलियां ने आजाद वेईन जावे देवा हूं इनकार कर दिदो। चूँकि फिरौने परमेश्वर री वात ने नी मान्यी ही अणीं वाते परमेश्वरे एक आखरी विपत्ति ने भेजवा री योजना वणाई। ज्या फिरौन रा मन ने बदल देगा।
निर्गमन अध्याय 5-10 हुं एक बाइबल री कहाणी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।