9. परमेश्वर मूसा ने बुलावे है

यूसुफ रे मरवा रे बाद वणांरा सब रिस्तेदार मिस्र मेईस वसी ग्या हा। और वा और वणांरा वंशज बोत सालां तक मिस्र मेईस रेया और वणां बोत सी संतानां उत्पन्न किदी। और वा सब इस्राएली केवाणां।

बोत सालां रे बाद, इस्राएलियां री संख्या बोत ही बढ़ी ग्यी ही। और मिस्री लोग अबार अणीं वात रे लिए आभारी नी हा के वणांरी मदद करवा रे लिए यूसुफे बोत कुछ किदो हो। अणीं वाते वा इस्राएलियां हूं समकी ग्या हा क्योंकि वा संख्या में बोत ही अधिक हा। अणीं वाते वणां समय मिस्र पे शासन करवा वालां फिरौने इस्राएलियां ने मिस्रियां रा दास वणावी दिदा।

मिस्रियां इस्राएलियां ने बोत सी इमारतां और अटे तक के बोत सा नगरां ने वणावां रे लिए मजबूर किदा। और वणा कठिन परिश्रमे वणांरे जीवनां ने बोत ही अधिक दुखदायी वणांवी दिदा हा, पण परमेश्वरे वणांने आशीष दिदी और वणांरे और अधिक संतानां उत्पन्न वी।

फिरौने देख्यो के इस्राएलियां री बोत संतानां उत्पन्न वेई रेयी हीं, अणीं वाते वणीं आपणें लोगां ने इस्राएलियां रा सब बेटां ने नील नदी मे नाखिन मारी नाखवा रो आदेश दिदो।

एक विशेष इस्राएली स्त्रीए एक बालक ने जनम दिदो। और पसे वणीए और वणीरे पतिए जतरो वणांहूं वेई सक्यो हो वणां बालक ने हपाड़ी राख्यो।

जेरां वणां बालक रे माता-पिता वणाने और ज्यादा दनां तक हपाडिन नी राखी सक्या, तो वणां वणाए मारया जावा हूं वचाडवा रे लिए एक तरवा वाली टोकरी मे रखिन पसे नील नदी रा किनारा पे सरकंडां रे वच मे रख दिदो। पसे वणारी बड़ी बेहने यो देखवा रे लिए वणारी निगरानी किदी के वणांरे हातीं कई वेगा।

फिरौन री बेटिये वणीं टोकरी ने देखिन वणीं मे देख्यो। और जेरां वणींए एक बालक ने देख्यो तो वणींए वणां बालक ने आपणां बालक रे रूप मे लेई लिदो। पसे वणींए एक इस्राएली स्त्री ने वणांने दूध पिलावा रे लिए काम पे रख दिदी, और यो वना जाण्ये के वा स्त्री वणां बालक री वास्तविक माता ही। और जेरां वो बालक अतरो बडो वेई ग्यो के अबार वणांए आपणीं माता रा दूध री आवश्यकता नी ही, तो वणींए वणां बालक ने फिरौन री बेटी रे कोडे भेज दिदो, और वणां बालक रो नाम मूसो हो।

एक दन, जेरां मूसो बडो वेई ग्यो हो, तो वणीं देख्यो के एक मिस्री आदमी एक इस्राएली ने कुटी रेयो है। पसे मूसाए आपणां हाती इस्राएली ने वचाडवा रो प्रयास किदो।

जेरां मूसाए होस्यूं के वणांए कोई नी देखेगा तो वणीं वणां मिस्री आदमी ने मारी नाख्यो और वणांरी लाश ने मिट्टी मे गाडी दिदी। पण मूसाए ज्यो किदो हो वणांने कणींक देखी लिदो हो।

फिरौन ने पतो चाली ग्यो के मूसाए कई किदो है। अणीं वाते वणीं वणांए मारी नाखवा रो प्रयास किदो, पण मूसो मिस्र रा मंगरां मे भाग ग्यो। और फिरौन रा सैनिक वणांने वटे नी होजी सक्या।

मिस्र हूं छेटी मंगरां मे मूसो एक चरवाहों वणीं ग्यो हो। और वणीं वटे एक स्त्री हूं विवाह कर लिदो और वणीं दो बेटा उत्पन्न किदा।

मूसो आपणें ससुर री भेड़ां रे झूंड री देखभाल करतो हो। एक दन वणीं एक बलतीं हकी झाडी ने देख्यी ज्या भस्म थाया वना बलीं रेयी ही। अणीं वाते वणींने देखवा रे लिए वो वणीं झाडी रे निकट ग्यो। और जेरां वो वणीं झाडी रे बोत ही निकट हो तो परमेश्वरे वणांहूं वात किदी। और वणांहुं केयूं के, "हे मूसा, थूं आपणें जूतां ने उतार दे, क्योंकि थूं एक पवित्र जगा पे उबो है।"

परमेश्वरे और केयूं के, "मईं आपणें लोगां रा दुख ने देख्यो है। अणीं वाते मुं थने फिरौन रे कोडे भेजूंगा ताकि थूं इस्राएलियां ने मिस्र रा दासत्व हूं निकालिन लावे। और मुं वणांने कनान देश दूँगा, और वो देश जणांरो मईं अब्राहम, इसहाक और याकूब हूं वायदो किदो हो।"

मूसा पुछयूं के, "अगर लोग मई हूं यो पुछे के थने कणीं भेज्यो है तो पसे मुं कई केऊँगा?" पसे परमेश्वरे केयूं के, "ज्यो मुं हूं सों हूं। और वणांहूं केजे के, 'मई तई वणां कोडे भेज्यो है।' और वणांहूं यो भी केजे के, ' मुं थांरे बाप-दादां रो अर्थात् अब्राहम, इसहाक और याकूब रो परमेश्वर यहोवा हूं।' और मारो यो नाम सदा रो है।"

मूसो डरतो हो और फिरौन रे कोडे नी जाणों चावतो हो, क्योंकि वणीं होस्यूं हूं के वो अच्छी तरह हूं नी बोल सकेगा, अणीं वाते परमेश्वरे मूसा रा भाई, हारून, ने वणारी मदद करवा रे लिए भेज्यो।