12. निर्गमन

इस्राएली लोग मिस्र हूं निकलवा पे बोत ही खुश हा। क्योंकि अबार वा दास नी हा, पण अबार वा वायदा रा देश मे जाई रेया हा! और ज्यो कई भी इस्राएलियां माँग्यो हो, मिस्रियां वणांने वो सब कुछ देई दिदो, और अटे तक के होनुं और रूपुं और बिजी सब किमती चीजां भी। और बिजा देशां रा थोडा घणां लोगां परमेश्वर पे विश्वास किदो और जेरां इस्राएली लोग मिस्र हूं निकल्या हा तो वा भी वणां हातीं वेई ग्या हा।

दन रा समय मे वादलां रो एक बडो खम्बो वणांरे आगे-आगे चाल्यो। और रात रा समय मे यो खम्बो एक आग रो खम्बो बणी ग्यो। और परमेश्वर ज्यो के वणा वादलां रा खम्बा मे और आग रा खम्बा मे हो, हमेशा वणांरे हातीं हो और वणांरी यात्रा मे वणांरी अगुवाई करतो हो। और वणांने केवल अतरो करणों हो के वा वणांपे पुरो विश्वास करीन वणां हातीं चालीं।

थोडाक समय रे बाद, फिरौन और वणांरे लोगां आपणां मन ने बदली दिदो। क्योंकि वा इस्राएलियां ने पासा आपणें दास वणावणां चावता हा। अणीं वाते वणां इस्राएलियां रो पिछो किदो। और यो परमेश्वर हो जणीं वणांरे मनां ने बदली दिदा हा। और वणीं असो अणीं वाते किदो, क्योंकि वो चावतो हो के हर एक लोग यो जाणीं लिए के फिरौन हूं और मिस्रियां रा सब देवताओं हूं वो,यहोवा, अधिक शक्तिशाली है।

जेरां इस्राएलियां मिस्र री सेना ने आवती हकी देख्यी तो वणांने यो पतो हो के वा फिरौन री सेना और लाल समुद्र रा वच मे फसी ग्या हीं। अणीं वाते वा बोत ही समकी ग्या और रोवे लागा के, "माँ मिस्र ने क्यों छोड्यो? माँ अबार मरवा वालां हां!"

मूसे इस्राएलियां हूं केयूं के, "थां डरणों बंद करो! क्योंकि परमेश्वर आज थांरे लिए लडेगा और थांने मिस्रियां रे हाथ हूं वचाएगा।" और पसे परमेश्वरे मूसा हूं केयूं के, "अणां लोगां हूं लाल समुद्र री ओर आगे बढवा रे लिए के।"

पसे परमेश्वरे वणां वादलां रा खम्बा ने लेईन इस्राएलियां और मिस्रियां रे वच मे रखी दिदो, ताकि मिस्री लोग इस्राएलियां रे कोडे नी जाई सके।

परमेश्वरे मूसा हूं समुद्र पे आपणों हाथ बढ़ावणां रे लिए केयूं। और पसे परमेश्वरे वायरा हूं समुद्र रा पाणी ने अटी हुं वटी करी दिदो, जणांहु के समुद्र हुं वेईन एक वाट वणीं ग्यी।

इस्राएली लोग आपणें दोई तरफ पाणी री दीवार रे हातीं, हुकी जगा पे समुद्र हूं वेईन आगे बढ़ी ग्या।

पसे परमेश्वरे वणीं वाट हूं वणां वादलां ने उठावी लिदो ताकि मिस्री लोग इस्राएलियां ने वचिन जातां हकां देखीं। और पसे मिस्रियां वणांने पकडवा रे लिए वणांरो पीछो करवा रो निर्णय किदो।

अणीं तरह वणां समुद्र रे वचे वणीं वाटे इस्राएलियां रो पीछो किदो, पण परमेश्वरे मिस्रियां ने घबरावीं दिदा और वणांरे रथां ने अटकावीं दिदी। अणीं वाते वा चिल्लावे लागा के, "भागो! क्योंकि इस्राएलियां री ओर हूं परमेश्वर लड़ी रेयो है!"

अणीं तरह हुं इस्राएली लोग समुद्र रे दुसरी तरफ पोंछी ग्या। और पसे परमेश्वरे मूसा हुं केयूं के वो फेर हूं पाणी पे आपणों हाथ बढ़ावे। और जेरां मूसे असोस किदो, तो समुद्र रो पाणी मिस्री सेना पे आवी पड्यो और पासो आपणें सामान्य अवस्था मे आवी ग्यो। और अणीं तरह हुं पुरी मिस्री सेना समुद्र मे डूबी ग्यी।

जेरां इस्राएलियां देख्यो के सब मिस्री लोग मरी ग्या हीं तो वणां परमेश्वर पे विश्वास किदो। और वणां यो विश्वास किदो के मूसो परमेश्वर री ओर हूं बोलवा वालो हो।

इस्राएली लोग अणीं वाते भी बोत ही खुश हा, क्योंकि परमेश्वरे वणांने मरवा हुं और दास वेवा हुं वचावी लिदा हा। अणीं वाते अबार वा परमेश्वर री आराधना करवा और वणांरी आज्ञा रो पालन करवा रे लिए आजाद हा। और पसे इस्राएलियां आपणीं आजादी रो उत्सव मनाडवा रे लिए और परमेश्वर री प्रशंसा करवा रे लिए बोत सा गीत गाया, क्योंकि वणीं वणांने मिस्र री सेना हुं वचाया हा।

परमेश्वरे इस्राएलियां ने हर साल एक पर्व मनावणा रो आदेश दिदो और यो याद करवा रे लिए के कणीं तरह हुं परमेश्वरे मिस्रियां ने हरावी किदा हा और वणांने दास वेवा हुं आजाद किदा हा। और यो पर्व फसह रो पर्व केलायो हो। और अणा पर्व मे वणांने उत्सव मनाडवा रे लिए एक स्वस्थ मेम्ना ने बलि करणों हो, और वणांने आग मे हेकणों हो, और वणाने वना खमीर वालां रोटां रे हातीं खाणों हो।