13. इस्राएल रे हातीं परमेश्वर री वाचा
इस्राएलियां ने लाल समुद्र रे पार लेजावा रे बाद, परमेश्वर वणांने मंगरां मे हुं वेईन सीनै वालां पर्वत री ओर लेईन चाल्यो। और यो वोइस पर्वत हो जटे मूसे बलती हकी झाड़ी ने देख्यी ही। और पसे वणां लोगां वणां पर्वत रे नीचे आपणें तम्बुआं ने स्थापित किदा।
परमेश्वरे मूसा हूं और इस्राएल रा सब लोगां हुं केयूं के, "थांने हमेशा मारी वातां ने माननी हीं और ज्या वाचा मुं थांरे हातीं बांधू हूं वणीने वणाविन राखणी है। और यदि असो करोगा, तो थां मारो पुरस्कार और बहुमूल्य धन, और याजकां रो राज्य, और एक पवित्र जाति ठेरोगा।"
परमेश्वर द्वारा वणांरे कोडे आवणां रे लिए लोगां तीन दन तक खुद ने तैयार किदा। और पसे परमेश्वर सीनै पर्वत री चोटी पे हुं नीचे उतरयो। और जेरां वो आयो तो भूकम्प थायो, और विजलियाँ चमकी, और धूँओ उठ्यो, और तुरहियां रो जोरदार शब्द वियो। और पसे मूसो खुद पर्वत पे उपरे चढ़ी ग्यो।
पसे परमेश्वरे लोगां रे हातीं एक वाचा बाँध्यी। और वणीं केयूं के, "मुं थांरो परमेश्वर, यहोवा हूँ। और मुंस हूं जणी थांने मिस्र रा दासत्व हुं छुड़ाया हीं। अणीं वाते अबार थां कणां ओर देवी-देवताओं री उपासना मत करजो।"
मूर्तियां नी वणावणीं हीं और नी वणांरी उपासना करणीं है, क्योंकि मुं,यहोवा, थांरो एकमात्र परमेश्वर हूं। और अनुचित रीति हुं मारे नाम रो उपयोग मत करजो। और सब्त रा दन ने पवित्र मानवा रे लिए याद राख्जो। अर्थात् बिजां शब्दां मे, छः दनां मे आपणें सब कामां ने करणा हीं पण सातवो दन थांरे लिए विश्राम करवा और मने याद करवा रो दन है।
आपणे माता और पिता रो आदर करजो। और हत्या मत करजो। और चोरी मत करजो। और आपणें पड़ोसी री लाडी, और वणांरा घर, या वणांरे कणां भी सामान ने लेई लेवा री इच्छा मत करजो।
पसे परमेश्वरे अणीं दस आज्ञाओं ने भाटां री दो पट्टियां पे लिखिन मूसा ने देई दिदी। और परमेश्वरे पालन करवा रे लिए लोगां ने और भी बोत सी व्यवस्थाएँ दिदीं। और यदि वणां अणीं व्यवस्थाओं रो पालन किदो, तो परमेश्वरे वणां लोगां ने आशीष देवा और वणांरी सुरक्षा करवा रो वायदो किदो। पण वणीं यो भी केयूं के यदि वणां अणांरो पालन नी किदो तो वो वणांने दंडित करेगा।
परमेश्वरे इस्राएलियां हुं एक बड़ा तंबू वणावणां रे लिए भी केयूं अर्थात् मिलाप वालों तंबू। और वणीं वणांने ठीक-ठीक वताड्यूं के अणां तंबू ने किस्तर वणावणो है, और वणांरे माइने कणीं चीजां ने राखणीं हीं। और वणीं वणांने वणां तंबू ने दो कमरां मे विभाजित करवा रे लिए एक बड़ा पडदा ने वणावणां रे लिए भी केयूं। और परमेश्वर वणां पडदा रे पाछे वालां कमरा मे आएगा और वटे रेगा।और जटे परमेश्वर हो वणां कमरा मे जावा री अनुमति केवल महायाजक नेस ही।
वणां लोगां ने वणा मिलाप वालां तंबू रे हामे एक वेदी ने वणावणी वेगा। और कोई भी ज्यो परमेश्वर री व्यवस्था रे विरुद्ध कोई काम करे, तो वो वणीं वेदी पे एक जनावर ने लेईन आवे। और पसे याजक वणांने बलि करेगा और वेदी पे परमेश्वर रे लिए बलि रे रूप मे चढ़ाएगा। और पसे परमेश्वरे केयूं के वणां जनावर रो लोई वणां व्यक्ति रे पापां ने ढाँपी लेगा। और अणीं रीति हुं अबार परमेश्वर वणां पाप ने नी देखेगा। और वो व्यक्ति परमेश्वर री दृष्टि मे "शुद्ध" ठेरेगा। और पसे परमेश्वरे मूसा रा भाई हारून ने और हारून रे वंशजाँ ने आपणां याजक वेवा रे लिए चुन लिदा।
और परमेश्वरे वणां लोगां ने ज्या नियम दिदा हा, वा वणांरो पालन करवा रे लिए सेहमत थाया। और वा केवल परमेश्वर रा लोग वेवा ने और केवल वणांरिस आराधना करवा रे लिए सेहमत थाया।
बोत दनां तक, मूसो सीनै पर्वत री चोटी पेइस रेयो। और वो परमेश्वर हुं वात करी रेयो हो। पण लोग वणां कोडे पासो लौटवा री इन्तजार करतां-करतां थाकी ग्या। अणीं वाते वा हारून रे कोडे होनू लेईन आया और वणाहुं एक मूर्ति वणावणां रे लिए केयूं, ताकि वा परमेश्वर रे बजाए वणारी उपासना करी सकीं। और अणीं रीति हुं, वणां भयंकर रूप हूं परमेश्वर रे विरुद्ध पाप किदो।
हारूने बछड़ा रा आकार मे होना री एक मूर्ति वणायी। और वणां लोगां वणीं मूर्ति री उपासना करणी आरंभ करी दिदी और वणींने बलि चढ़ायी! और वणांरे अणां पाप री वजह हूं, परमेश्वर वणांहुं बोत ही क्रोधित वियो हो। और वो वणांने नष्ट करी देणों चावतो हो। पण मूसे वणांने नी मारवा रो परमेश्वर हूं अनुरोध किदो। और परमेश्वरे वणांरा अनुरोध ने हुण्यो और वणांने नष्ट नी किदा।
आखिरकार मूसो सीनै पर्वत हूं नीचे उतरी आयो। और वो वणीं दो भाटां री पट्टियां ने भी हातीं लायो हो, जणीं पे परमेश्वरे दस आज्ञाओं ने लिख्यी ही। और पसे वणीं वणी मूर्ति ने देख्यी। और वो अतरो क्रोधित थायो के वणीं पट्टियां ने भी तोडिन चकनाचूर करी दिदी।
पसे मूसे वणी मूर्ति ने पीसिन वणींरो बुरादो वणावी दिदो, और पसे वणां बुरादा ने पाणी मे मलाविन वणां लोगां ने वो पाणी पिलावी दिदो। और परमेश्वरे वणां लोगां पे एक विपत्ति ने भेज्यी और वणांमे हुं बोत सा लोग मरी ग्या।
जणीं पट्टियां ने मूसे तोड़ी दिदी ही वणींरो स्थान लेवा रे लिए मूसे वणीं दस आज्ञाओं री भाटां री नवी पट्टियां ने वणायी। और पसे वो पासो सीनै पर्वत पे चढ़ी ग्यो और प्रार्थना किदी, के हे परमेश्वर वणां लोगां ने माफ करी दे। और पसे परमेश्वरे वणांरी प्रार्थना ने हुणींन वणांने माफ करी दिदा। और नवी पट्टियां पे दस आज्ञाओं ने लिखाड़िन मूसो सीनै पर्वत हुं नीचे उतरी आयो। और पसे परमेश्वरे सीनै पर्वत हुं लेईन वायदा रा देश कनान तक इस्राएलियां री अगुवाई किदी।
निर्गमन अध्याय 19-34 हुं एक बाइबल री कहाणी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।