27. दयालुं सामरी री कहाणी

एक दन, यहूदी धर्मगुरु प्रभु यीशु मसीह रे कोडे आयो। और वो सब लोगां ने यो देखावणों चावतो हो, के प्रभु यीशु गलत रीति हुं शिक्षा देई रेयो हो। अणीं वाते वणीं केयूं के, "हे गुरु, अनन्त जीवन पावा रे लिए मुं कई करूँ?" पसे प्रभु यीशुए वणांने जवाब दिदो के, "परमेश्वर री व्यवस्था मे कई लिख्यो है?"

वणीं व्यक्तिए केयूं के, "परमेश्वर री व्यवस्था यो किये है, के थूं आपणां परमेश्वर हुं आपणां पुरा मन, प्राण, सामर्थ्य, और बुद्धि हुं प्रेम राख। और आपणें पड़ोसी हुं आपणें समानुस प्रेम राख।" पसे प्रभु यीशुए केयूं के, "थूं एकदम सई किये है! यदि थूं भी असोस करेगा, तो थने अनन्त जीवन प्राप्त वेगा।"

पण वो धर्मगुरु लोगां ने दिखाणों चावतो हो, के वणांरे जीवन जीवणां रो तरीकों बिल्कुल सई हो। अणीं वाते वणीं प्रभु यीशु हुं पुछयूं के, "ठीक है, तो मारो पड़ोसी कुण है?"

प्रभु यीशुए वणां धर्मगुरु ने एक कहाणी वताडवा रे द्वारा जवाब दिदो। के "एक यहूदी मनक हो, ज्यो एक सड़क हुं वेतो हको यरूशलेम हुं यरीहो नगर री यात्रा करी रेयो हो।"

पण थोडाक डाकुआं वणांने देख्यो और वणांपे हमलो कर दिदो। और वणां वणांरो सब कुछ लेई लिदो और वणांए लगभग मरवा तक मारयो-पीट्यो। पसे वणांए अधमरो करीन परा ग्या।"

वणांरे तुरन्त बाद, एक यहूदी याजक वणीं सड़क हुं वेईन गुजरयो। पसे वणीं याजके वणां व्यक्ति ने सड़क पे पड्यो हको देख्यो। और जेरां वणीं वणांए देख्यो, तो वो सड़क री दूसरी ओर जाईन आगे बढ़ी ग्यो। और वणीं वणांए पुरी तरह हुं अनदेखो कर दिदो।

अणांरे बाद थोडाक समय रे वीतवा पे, एक लेवी वणीं सड़क पे आयो। (और लेवी यहूदियां रो एक गोत्र हो जणीं मंदिर मे याजकां री मदद किदी ही।) पसे वो लेवी भी सड़क री दूसरी ओर हुं निकल ग्यो। और वणीं भी वणां व्यक्ति ने अनदेखो कर दिदो।

अगलो व्यक्ति ज्यो वणीं सड़क पे आयो हो, वो सामरिया रो एक आदमी हो। और (सामरी और यहूदी एक बिजा हुं बोत ही नफरत करता हा।) और वणीं सामरीए सड़क पे वणां व्यक्ति ने देख्यो। पसे वणीं देख्यूं के वो व्यक्ति एक यहूदी हो, पण तौभी वणीं वणांपे तरस खादो। पसे वो वणां कोडे ग्यो और वणांरे घावां पे पट्टियां बाँध्यी।

पसे वणीं सामरीए वणां व्यक्ति ने आपणां गधा पे डाल्यो और वणांए वणीं सड़क हुं उठाविन पसे एक सराय मे लेईन ग्यो। जटे वणीं वणांरी देखभाल करणों जारी राख्यो।

बिजे दन, वणां सामरी ने आपणीं यात्रा ने जारी राखवा री आवश्यकता ही। तो वणीं वणां सराय रा प्रभारी व्यक्ति ने थोडाक पईसा दिदा। पसे वणांहुं केयूं के, "अणां व्यक्ति री देखभाल करजे। और यदि अणां पईसां रे अलावा थारे धन ओर खर्च वे, तो पासो आवता समय मुं थारे वणां खर्चा रो भुगतान करी देऊँगा।"

पसे प्रभु यीशुए वणां धर्मगुरु हुं पुछयूं के, "थां कई होचो हो? अणां तीन लोगां मे हुं कुंण वणां व्यक्ति रो पड़ोसी है, जणांए लूट्यो और कुट्यो ग्यो हो?" पसे वणीं जवाब दिदो के, " वोईस व्यक्ति ज्यो वणांपे कृपालुं हो।" पसे प्रभु यीशुए वणांहुं केयूं के, "थूं जा और थूं भी असोस कर।"