26. प्रभु यीशु आपणीं सेवा आरम्भ करे है

शैतान री परीक्षा पे जय प्राप्त करवा रे बाद, प्रभु यीशु पासो गलील रा क्षेत्र मे आयो। और योईस वो क्षेत्र हो जटे वो रेतो हो। और पवित्र आत्मा वणांए बोत ही सामर्थ्य देई रेयो हो, और प्रभु यीशु एक जगा हुं, बिजी जगा मे ग्यो और सब लोगां ने परमेश्वर रे स्वर्ग राज्य री शिक्षा दिदी। और सब लोग वणांरी शिक्षा ने हुंणता हा और वणांरी तारिफ करता हा।

प्रभु यीशु नासरत नगर मे ग्यो। और यो वो गाँव है, जटे वो आपणां बचपन मे रेतो हो। पसे वो सब्त रे दन आराधनालय मे ग्यो। पसे अगुवां वणांने यशायाह रे संदेशां री एक किताब दिदी। और वा चावता हा के वो वणीं किताब मे हुं भणे। और पसे प्रभु यीशुए वणीं किताब ने खोलिन वणींमे हुं एक भाग ने लोगां रे लिए भण्यो।

प्रभु यीशुए भण्यूं के, "परमेश्वरे मने आपणों आत्मा दिदो है, ताकि मुं कंगालां ने सुसमाचार प्रचार कर सकूँ। और वणीं मने अणीं वाते भेज्यो के ताकि कैदियां ने आजाद करूँ, और आँधां ने दृष्टि प्रदान करूँ, और वणांने छुटकारो देऊँ जणांने बिजा लोग कुचलीं रेया हीं। और यो वो समय है जेरां परमेश्वर आपांपे कृपालु वेगा और आपणीं सहायता करेगा।"

पसे प्रभु यीशु मसीह बैठ ग्यो। और सब लोग वणांए बोत ही ध्यान हुं देखी रेया हा। क्योंकि वा जाणता हा के पवित्र शास्त्र रो ज्यो भाग वणीं अबार भण्यो हो, वो मसीह रे बारा मेस हो। पसे प्रभु यीशुए केयूं के, "ज्या वात अबार मईं थांरे लिए भण्यी है, वा वात अणां समय घटी रेयी है।" और सब लोग चकित हा। पसे वणां केयूं के, "कई यो यूसुफ रो बेटो नी है?"

पसे प्रभु यीशुए केयूं के, "यो सई है के लोग कणां असा व्यक्ति ने कदी स्वीकार नी करीं हीं, ज्यो वणांरे नगर मेईस पल्यो-बढ्यो वे। और एलिय्याह रा समय मे भी, बोत सी विधवा महिला रेती ही। पण जेरां साढ़ा तीन साल तक सांटां नी आया, तो परमेश्वरे एलिय्याह ने इस्राएल मे कणीं ओर विधवा री सहायता करवा रे लिए नी भेज्यो। लेकिन अणांरे बजाए वणीं एलिय्याह ने कणां ओर देश री विधवा रे कोडे भेज्यो।"

प्रभु यीशुए केणों जारी राख्यो, "और एलीशा रा समय मे, इस्राएल देश मे और भी बोत सा लोग चमडी री बीमारियाँ हुं पीडित हा। पण एलीशे वणांमे हुं कणांने चंगा नी किदा। लेकिन केवल वणीं इस्राएल रे शत्रुआं रा सेनापति नामान नेस चंगो किदो।" पण ज्या लोग प्रभु यीशु ने हुणीं रेया हा वा लोग यहूदी हा। अणीं वाते जेरां वणां वणांए यो केतां हकां हुंण्यो तो वा वणांपे क्रोधित वेई ग्या।

नासरत रा लोगां प्रभु यीशु ने पकड़ी लिदो पसे वणांए आराधना रा स्थान हुं घसीटिन बाण्णे लेईन ग्या। पसे वणांए मारी नाखवा रे लिए नीचे फेंकवा हारू एक चट्टान रा सिरा पे लेई ग्या। पण प्रभु यीशु वणीं भीड़ मे हुं निकलिन नासरत नगर ने छोडिन परो ग्यो।

पसे प्रभु यीशु पुरा गलील रा क्षेत्र मे ग्यो, और बोत सी भीड़ वणां कोडे आयी। और वा बोत सा लोगां ने लेईन आया ज्या बीमार और विकलांग हा। और वणांमे हुं बोत सा लोग तो देखी भी नी सकता हा और नी हुणीं सकता हा। पसे प्रभु यीशुए वणां सब बीमारां ने चंगा किदा।

अणांरे अलावा, बोत सा असा लोग प्रभु यीशु रे कोडे लाया ग्या जणांमे दुष्ट आत्मा ही। पसे प्रभु यीशुए दुष्टआत्माओं ने वणांमे हुं निकल जावा रो आदेश दिदो। पसे वा दुष्टआत्मा ऊँची आवाज हुं चिल्लावे लागी और केवे लागी के, "थूं परमेश्वर रो बेटो है!" और भीड़ रा लोग बोत ही चकित हा, पसे वणां परमेश्वर री स्तुति और महिमा किदी।

पसे प्रभु यीशुए बारह व्यक्तियां ने चुन्या जणांने वणीं आपणें चेला केया। और वणां चेलां वणां हातीं यात्राएं किदी और वणांहुं शिक्षा प्राप्त किदी।