4. अब्राहम रे हाते परमेश्वर रो वायदों

बाढ़ रे बोत सालां रे बाद, अणा जगत मे बोत सा लोग रेता हा, और वणां फेर हुं परमेश्वर रे और एक दूजां रे विरुद्ध पाप किदो। क्योंकि वा सब एकुस बोली बोलता हा, अणी वाते वा एक हातीं इकट्ठा वेया और अणा जगत ने भरी देवा रे परमेश्वर रा आदेश रे बजाए वणां एक नगर ने वणायो।

वा बोत ही घमंडी लोग हा,और वणांने कसो जीवन जीवणो चावे अणां बारा मे वा परमेश्वर रे आदेश रो पालन करणां नी चावता हा। और अटे तक के वणां एक असी मिनार ने वणावणीं शुरू किदी ज्या स्वर्ग तक पोंचे। पसे परमेश्वरे देख्यूं के अगर वा एक हातीं मलिन बुराई करता रेगा, तो वा लोग बोत सा पापी कामां ने करी सकी हीं।

अणी वाते परमेश्वरे वणांरी भाषा ने बोत सी अलग-अलग भाषाओं मे बदल दिदी और वणां लोगां ने पुरा जगत मे फैलावी दिदा। और जणा नगर ने वणां वणावणों शुरू किदो हो वो नगर बाबेल केवाणों, जणारो अर्थ है "गड़बड़ी"।

बोत सा सालां रे बाद, परमेश्वरे अब्राम नाम रा एक मनक हुं वात किदी। परमेश्वरे वणांहुं केयूं के, आपणां देश और आपणां परिवार ने छोडिन वणां देश मे परो जा ज्यो मुं थने दिखाउंगा। मुं थने आशीष दूंगा और थारे हुं एक बडी जाति वणाउंगा। मुं थारो नाम महान करुंगा। और ज्यो थने आशीष देगा मुं वणांने आशीष दूंगा, और ज्यो थने हराप देगा वणांने मुं हराप दूंगा। और थारे कारण अणां जगत री सब जातियां आशीष पाएगा।

और अब्रामे परमेश्वर री वात ने मान्यी। और वणीं आपणें सब दासां और आपणीं पुरी सम्पत्ति रे हातीं आपणीं लाडी सारै ने लिदी और वणां देश ने,अर्थात् कनान देश मे परो ग्यो ज्यो परमेश्वरे वणांने दिखायो हो।

जेरां अब्राम कनान पोंच्यो तो परमेश्वरे वणांहुं केयूं के, "आपणें चारी ओर देख। मुं थने यो पुरो देश दूंगा और थारा वंशज हमेशा रे लिए अणां पे अधिकार राखेगा।" और पसे अब्राम वणां देश मे वसी ग्यो।

मलिकिसिदक नाम रो एक आदमी थो ज्यो सर्वोच्च परमेश्वर रो याजक हो। एक दन जेरां अब्राम युद्ध करवा रे बाद पासो आवी रेयो हो तो वो और अब्राम मल्या। और मलिकिसिदके अब्राम ने आशीष दिदी और केयूं के, " परमेश्वर ज्यो स्वर्ग और पृथ्वी रो स्वामी है वो थने आशीष दिए।" पसे अब्रामे युद्ध में जीती हकी सब चीजां रो दशवांश मलिकिसिदक ने दिदो।

पसे बोत सा साल विती ग्या, पण अबार तक अब्राम और सारै रे कोई बच्चां नी हा। परमेश्वरे अब्राम हुं वात किदी और फेर हूं वायदों किदो के वणांरे एक बेटो उत्पन्न वेगा और जिस्तर आकाश मे तारा हीं वणीस तरह हू वणांरे बोत सा वंशज वेगा। अब्रामे परमेश्वर रा वायदा पे पुरो विश्वास किदो। और परमेश्वरे घोषणा किदी के अब्राम एक धर्मी मनक हो क्योंकि वणीं परमेश्वर रा वायदा पे पुरो विश्वास किदो हो।

पसे परमेश्वरे अब्राम हुं एक वाचा बाँध्यी। सामान्य रूप हुं, एक वाचा दो दलां रे वच मे एक दूजां रे लिए कामां ने करवा रो एक हमझौतो वे है। परमेश्वरे अब्राम हूं वो वायदों जेरां किदो हो जेरां अब्राम हुई रेयो हो, पण वो हुतो हको भी परमेश्वर री वाणी ने हुणीं सकतो हो। परमेश्वरे केयूं के, " मुं थारा शरीर हूं उत्पन्न करिन थने थारो एक निज बेटो देऊँगा। और मुं थारे वंशजाँ ने यो कनान देश देऊँ हूँ।" पण अबार भी अब्राम रे कोई बेटो नी हो।