40. प्रभु यीशु ने क्रूस पे चढ़ायो जाए है

प्रभु यीशु रो ठट्टो करवा रे बाद, सैनिक वणांने क्रूस पे चढ़ावा रे लिए लेईन ग्या। पसे वणां क्रूस ने वणां हुंस तोकायो जणांपे वो मरेगा।

वा सैनिक प्रभु यीशु ने वणीं जगापे लेईन आया ज्या खोपड़ी केवाती हीं और वणांरे हातां और पगां ने खिलां हुं क्रूस पे ठोकी दिदा। पण प्रभु यीशुए केयूं के, "हे पिता, थूं अणांने माफ कर दे, क्योंकि या लोग नी जाणीं हीं के वा कईं कर रिया हीं।" पसे वणां एक तख्ता ने भी वणांरे सिर रे ऊपरे टांग दिदो। और वणांपे लिख्यो हो, "यहूदियां रो राजा।" क्योंकि पिलातुसे वणांने योईस लिखवा रे लिए केयूं हूँ।

पसे सैनिकां प्रभु यीशु रे कपड़ां रे लिए चिट्ठियाँ डाल्यी। और जेरां वणां असो किदो तो वणां वणीं भविष्यद्वाणी ने पुरी किदी ज्या केती ही के, "वणां मारे कपड़ां ने आपस मे वाँट लिदा, और मारे कपड़ां रे लिए चिट्ठियाँ डाल्यी।"

वटे दो डाकू भी हा, जणांने सैनिकां वणींस समय पे क्रूस पे चढ़ाया हा। और वणां वणांने प्रभु यीशु री दोई तरफ राख्या हा। और वणांमे हुं एक डाकुए प्रभु यीशु रो मजाक उड़ायो, पण बिजे केयूं के, "कईं थूं नी समके के परमेश्वर थने दंड देगा? क्योंकि आपां तो बोत सा बुरा कामां ने करवा रा दोषी हां, पण यो मनक बिल्कुल निर्दोष है।" पसे वणीं प्रभु यीशु हुं केयूं के, "जेरां थूं आपणें राज्य मे आवे तो कृपया मने भी याद राखजे।" पसे प्रभु यीशुए वणांने जवाब दिदो के, "आजुस थूं मारे हातीं स्वर्गलोक मे वेगा।"

यहूदी अगुवां और भीड़ रे बिजां लोगां प्रभु यीशु रो मजाक उड़ायो। और वणां प्रभु यीशु हुं केयूं के, "यदि थूं परमेश्वर रो बेटो है, तो क्रूस हुं नीचे उतरी आव और खुद ने वचावी ले! जेरां मां थारा पे विश्वास करांगा।"

पसे वणां पुरा देश रो आकाश पुरी तरह हुं कालों वेई ग्यो। भलेई वो दोपहर रो समय हो। और यो आकाश दोपहर रा समय मे कालों वियो हो। और तीन घंटा तक असोस रेयो हो।

पसे प्रभु यीशुए ऊँची आवाज मे पुकारिन केयूं के, "पुरो वियो! हे पिता, मुं आपणीं आत्मा थारे हातां मे होंपू हूँ।" पसे वणीं आपणें सिर ने झुकायो और आपणां प्राण ने त्यागी दिदो। और जेरां वो मरयो तो एक भूकम्प आयो। और मंदिर रो वो पड्दो ज्यो परमेश्वर री उपस्थिति हुं लोगां ने अलग करतो हो ऊपर हुं नीचे री ओर फाटिन दो भाग वेई ग्या।

आपणीं मृत्यु रे द्वारा, प्रभु यीशुए लोगां रे लिए परमेश्वर रे कोडे आवणां रो मार्ग खोल दिदो। और जेरां प्रभु यीशु री निगरानी करवा वालें एक सैनिके ज्यो कई भी वटे वियो हो वणां सबने वणीं देख्यो तो पसे वणीं केयूं के, "निश्चित रूप हुं, यो मनक निर्दोष हो। और यो परमेश्वर रो बेटो है।"

पसे यूसुफ और नीकुदेमुस नाम रा दो यहूदी अगुवां आया। और वा यो विश्वास करता हा के प्रभु यीशुस आवणां वालों मसीह हो। पसे वणां पिलातुस हुं प्रभु यीशु रो शरीर माँग्यो। और वणांरा शरीर ने कपड़ां मे लपेट्यो। पसे वा वणांने एक चट्टान मे हुं काटिन वणांई ग्यी कब्र मे लेईन ग्या और वटे वणांरा शरीर ने रख दिदो। और वणां कब्र रा द्वार ने बंद करवा रे लिए एक बड़ा भाटां ने लुढ़कावीं दिदो।