41. परमेश्वर प्रभु यीशु ने मृतकां मे हुं जीलावे है

सैनिकां रे द्वारा प्रभु यीशु ने क्रूस पे चढ़ाई देवा रे बाद, यहूदी अगुवां पिलातुस हुं केयूं के, "वणीं झूठे, प्रभु यीशुए केयूं हुं के वो तीन दनां रे बाद मृतकां मे हुं पासो जीवी उठेगा। अणीं वाते कणांक ने यो निश्चित करवा रे लिए वणांरे कब्र री निगरानी करणीं वेगा, ताकि वणांरे चेलां वणांरा शरीर ने चुराविंन नी ले जाई सकीं। और यदि वा असो करेगा तो पसे आपांहुं केगा के वो मृतकां मे हुं पासो जीवी उठ्यो है।"

पिलातुसे वणांहुं केयूं के, "थोड़ाक सैनिकां ने लेईन जाओ, और जिस्तर थां कर सको हो वणीं तरह हुं वणांरे कब्र री निगरानी करो।" अणीं वाते वणां वणांरी कब्र रा प्रवेशद्वार पे वणां बड़ा भाटां पे एक मोहर लगावी दिदी। और वणां यो निश्चित करवा रे लिए वटे सैनिकां ने बैठाईं दिदा, ताकि वणांरा शरीर ने कोई भी नी चुरावी सके।

प्रभु यीशु रे मरवा रे बाद रो दन सब्त रो दन हो। और कोई भी सब्त रे दन काम नी कर सकतो हो, अणीं वाते प्रभु यीशु रो कोई भी मित्र कब्र पे नी आयो हो। पण सब्त रे बाद रा दन मे, सुबह भोर वेतांस, थोड़िक स्त्रियाँ प्रभु यीशु री कब्र पे जावा रे लिए तैयार वेयी। क्योंकि वा वणांरे शरीर पे और भी मसालां ने लगाणीं चावती ही।

वणीं स्त्रियाँ रे पोंचवा हुं पेले, कब्र पे एक बड़ों भूकम्प वियो। और स्वर्ग हुं एक स्वर्गदूते आविन वणां भाटां ने लुढ़कावीं दिदो, ज्यो कब्र रा प्रवेशद्वार ने ढाँकीं रेयो हो और वणां भाटां पे वो स्वर्गदूत बैठ ग्यो। और यो स्वर्गदूत एकदम अजवालां रे समान चमकीं रेयो हो। और कब्र पे ज्या सैनिक हा वणां स्वर्गदूत ने देख्यो हो अणीं वाते वा अतरा समकीं ग्या हा के मृतकां रे समान जगापे पड़ी ग्या।

जेरां वा स्त्रियाँ कब्र पे पोंच्यी तो वणीं स्वर्गदूते वणीं स्त्रियाँ हुं केयूं के, "मत समको। प्रभु यीशु अटे नी है। वो मृतकां मे हुं पासो जीवी उठ्यो है, जिस्तर के वणीं केयूं हूँ के वो पासो जीवी उठेगा! थां कब्र मे होजो और देखो।" पसे वणीं स्त्रियाँ कब्र मे जाईन और जटे प्रभु यीशु रा शरीर ने रख्यो हो वटे खुब होज्यो और देख्यो पण वणांरो शरीर वटे नी हो!

पसे वणीं स्वर्गदूते वणीं स्त्रियाँ हुं केयूं के, "जाईन वणांरे चेलां ने वतावो के, 'प्रभु यीशु मृतकां मे हुं पासो जीवी उठ्यो है और वो थांरे आगे-आगे गलील ने जाएगा।'"

वा स्त्रियाँ बोत ही अचम्भित वेयी और बोत ही आनन्दित वेयी। पसे वा स्त्रियाँ चेलां ने यो शुभ संदेश हुणांवां रे लिए दौड़्यी।

जेरां वा स्त्रियाँ चेलां ने यो शुभ संदेश वतावा रे लिए मार्ग पेईस ही, तो प्रभु यीशु वणीं स्त्रियाँ पे प्रकट वियो। वा स्त्रियाँ वणांरे पगांपे पड़ी ग्यी। पसे प्रभु यीशुए केयूं के, "मत समको। लेकिन जाईन मारे चेलां हुं गलील जावा रे लिए कियो। क्योंकि वा वटे मने देखेगा।"