42. प्रभु यीशु स्वर्ग मे लौट जाए है

जणें दन परमेश्वरे प्रभु यीशु ने मृतकां मे पासो जीवित किदो हो, वणांरे दो चेला पास रास गाँव मे जाई रेया हा। और जातां हकां वा प्रभु यीशु रे हातीं ज्यो वियो हो। वणांरे बारा मे वातां करी रेया हा, और वणांने या आशा ही के वो आवणां वालों मसीह हो, पण तौभी वो मार डाल्यो ग्यो हो। और अबार वा स्त्रियाँ केईं हीं के वो मृतकां मे हुं पासो जीवी उठ्यो है। अणीं वाते वा नी जांणता हा के कणीं वात पे विश्वास करणों है।

प्रभु यीशुए वणां कोडे आविन पसे वणां हातीं चालणों आरम्भ कर दिदो हो, पण वा वणांए पेचाणीं नी सक्या हा। पसे वणीं पुछयूं के वा कणांरे बारा मे वात करी रेया हा। पसे वणां प्रभु यीशु रे हातीं ज्या घटना घटी ही वणींरे बारा मे वणांने वतायो। और वा होची रेया हा के वा कणांक परदेशी रे हातीं वात करी रेया हा ज्यो नी जांणतो हो के यरूशलेम मे कई वियो हो।

पसे प्रभु यीशुए वणांने हमझाया के परमेश्वर रो वचन मसीह रे बारा मे कई किये है। बोत समय पेले,परमेश्वर री ओर हुं बोलवा वालां लोगां केयूं हूँ के बुरा लोग मसीह ने पीड़ित करेगा और वणांने मार डालेगा। और वणां यो भी केयूं हूँ के वो मृतकां मे हुं तीसरे दन पासो जी उठेगा।

जेरां वा वणां नगर मे पोंच्या जटे वा दो जणां ठेरणां चावता हा, और जणीं समय लगभग हाँज वेई ग्यी ही। अणीं वाते वणां प्रभु यीशु ने आपणें हातीं ठेरवा रे लिए आमंत्रित किदो, पसे वो वणां हातीं एक घर मे ग्यो। और हाँज रो भोजन खावा रे लिए वा बैठ ग्या। पसे प्रभु यीशुए एक रोटी ने लेईन वणींरे लिए परमेश्वर रो धन्यवाद किदो। और पसे वणीं रोटी ने तोड्यी। पसे वणां जाणीं लिदो के यो प्रभु यीशु हो। पण वणींस समय, वो वणांरी आँखां हुं ओझल वेई ग्यो।

वणां दोई जणां एक बिजा हुं केयूं के, "वो प्रभु यीशु हो! अणीं वाते जेरां वणीं आपांने परमेश्वर रा वचन हमझायो हो तो आपां बोत ही उत्साहित हा!" पसे वा तुरन्तुस वटे हुं पासा यरूशलेम मे ग्या। और जेरां वा वटे पोंच्या तो वणां चेलां ने वतायो के, "प्रभु यीशु जीवित है! और मां वणांने देख्यो है!"

जेरां चेला आपस मे वात करी रेया हा, तो प्रभु यीशु अचानक हुं वणां कमरा मे वणांरे हातीं प्रकट वियो। और वणीं केयूं के, "थांने शान्ति मिलें!" और चेलां होस्यो के वो कोई भूत हो, पण प्रभु यीशुए केयूं के, "थां क्यूँ समको हो? और थां यो क्यूँ नी होचो हो के यो सईं मे, मुं यीशु हूँ? मारे हातां और पगां ने देखो। क्योंकि भूतां रे कोडे असो शरीर नी वे है जसो मारे कोडे है।" और यो दिखावा रे लिए के वो कोई भूत नी हो, वणीं खावा रे लिए कईक माँग्यो। पसे वणां माछलीं रो एक टुकड़ों दिदो, और वणीं वणांने खाई लिदो।

प्रभु यीशुए केयूं के, "मारे बारा मे परमेश्वर रो वचन ज्यो कई भी किये है वो घटित वेगा। और मईं थांने पेलांस वताई दिदो हो के अणांरो वेणों अवश्य है।" पसे प्रभु यीशुए वणांने परमेश्वर रा वचन हुं और भी बढ़िया तरिका हुं हमझाया। पसे वणीं केयूं के, "बोत सालां पेले परमेश्वर री ओर हुं बोलवा वालां लोगां लिख्यो हो के मसीह ने दुःख उठाणों वेगा, और मरणों वेगा और पासो तीसरे दन मृतकां मे हुं जी उठणों वेगा।"

वणां यो भी लिख्यो हो के मारे चेला परमेश्वर रा वचन री घोषणां करेगा। और वा हर एक ने पश्चाताप करवा रे लिए वताएगा। और यदि वा असो करीं हीं, तो परमेश्वर वणांरे पापां ने माफ करेगा। और मारे चेला अणां संदेश रो प्रचार करणों यरूशलेम हुं आरम्भ करेगा। पसे वा सब जगा और सब जातियाँ मे जाएगा। और थां लोग मारी हर एक वात और काम रा गवाह हो ज्यो मई केयूं और किदूं हूँ, और वणां सबरो भी ज्यो मारे हातीं वियो।

अगला चालीस दनां रे दौरान, प्रभु यीशु आपणें चेलां पे बोत बार प्रकट वियो। एक बार तो वो एकुस समय पे 500 हुं भी अधिक लोगां पे प्रकट वियो! और वणीं आपणें चेलां पे कई तरीकां हुं साबित किदो के वो जीवित हो, और वणीं वणांने परमेश्वर रा राज्य रे बारा मे शिक्षा दिदी।

प्रभु यीशुए आपणें चेलां हुं केयूं के, "परमेश्वरे मने स्वर्ग और पृथ्वी रा हर एक व्यक्ति पे शासन करवा रो अधिकार दिदो है। अणीं वाते अबार मुं थां हुं केऊँ हूँ के, जाईन सब जातियाँ रा लोगां ने मारे चेला बणाओ। और असो करवा रे लिए, थांने वणांने पिता, पुत्र, और पवित्र आत्मा रे नाम हुं बपतिस्मा देणों है। और ज्या कई भी मईं थांने आज्ञा दिदी है वणीं सब वातां ने माननो भी थांने वणांने हिकाणों है। और याद राखो, मुं हमेशा थांरे हातीं रेऊँगा।"

प्रभु यीशु रे मृतकां मे हुं जी उठवा रे चालीस दनां रे बाद, वणीं आपणें चेलां हुं केयूं के, "जेरां तक के मारो पिता थांने सामर्थ्य नी दिये अतरे तक थां यरूशलेम मेईस ठेरया रेजो। और वो थां पे पवित्र आत्मा भेजवा रे द्वारा असो करेगा।" पसे प्रभु यीशु स्वर्ग मे परो ग्यो, और एक वादलें वणांने वणांरी दृष्टि हुं छिपाई लिदो। और स्वर्ग मे प्रभु यीशु सब चीजां पे शासन करवा रे लिए परमेश्वर रे दाईनी ओर बैठ ग्यो।