47. फिलिप्पी मे पौलुस और सीलास

जेरां शाऊले पुरा रोमी साम्राज्य मे यात्रा किदी, तो वणीं आपणें रोमी नाम "पौलुस" रो उपयोग करणों आरम्भ कर दिदो हो। एक दन, पौलुस और वणांरो मित्र सीलास फिलिप्पी नगर मे प्रभु यीशु रे बारा मे शुभ संदेश हुंणावा रे लिए ग्या। पसे वा नगर रे बाण्णे नदी रे किनारे एक स्थान पे ग्या जटे लोग प्रार्थना करवा रे लिए इकट्ठा हा। और वटे लुदिया नाम री एक स्त्री हुं मिल्या ज्या एक व्यापारी ही। पण वा परमेश्वर हुं बोत ही प्रेम करती ही और वणांरी आराधना और उपासना करती ही।

परमेश्वरे लुदिया ने प्रभु यीशु रे बारा मे वणांरा संदेश पे विश्वास करवा मे सक्षम किदी। पसे पौलुस और सीलासे वणींने और वणींरे परिवार ने बपतिस्मा दिदो। और वणींए पौलुस और सीलास ने आपणां घर मे ठेरवा रे लिए आमंत्रित किदा, अणीं वाते पसे वा वटे ठेरी ग्या।

पौलुस और सीलास लोगां हुं अक्सर वणां स्थान पे मिलता हा, जटे यहूदी लोग प्रार्थना करता हा। और रोज जेरां वा वटे जाता हा, तो एक दासी छोरी ज्या दुष्टात्मां रे द्वारा नियंत्रित ही वणांरो पीछो करती रेती ही। और अणीं दुष्टात्मां रे माध्यम हुं वे लोगां रो भविष्य वतायो करती ही, अणीं वाते वे भविष्य वतावा वालीं रे रूप मे आपणें स्वामियां रे लिए बोत सो धन कमाती ही।

वणांरे जाती समय ये दासी छोरी ऊँची आवाज हुं चिल्लायो करती ही के, "या परम प्रधान परमेश्वर रा सेवक हीं। और या थांने उद्धार पावा रो मार्ग वताई रेया हीं!" और वे रोज असोस करती ही जणांहु पौलुस नाराज वेई ग्यो।

अंत मे, एक दन जेरां वणीं दासी छोरिये चिल्लाणों आरम्भ किदो, तो पौलुसे वणींरी तरफ मुड़िन वणींमे री दुष्टात्मां हुं केयूं के, "प्रभु यीशु रे नाम हुं अणींमे हुं निकल जा।" और वणींस समय वणीं दुष्टात्माए वणींने छोड़ दिदी।

वणीं दासी छोरी रा स्वामी बोत ही क्रोधित वेई ग्या। क्योंकि वणांने पतो चाली ग्यो के वना दुष्टात्मां रे वे दासी छोरी लोगां रो भविष्य नी वताई सकती ही। और अणांरो अर्थ हो, के लोग अबार वणींरे स्वामियां ने पईसा नी देगा के वे वणांने भविष्य वतावे के वणांरे हातीं कई वेगा।

अणीं वाते वणीं दासी छोरी रा स्वामी पौलुस और सीलास ने रोमी अधिकारियां रे कोडे लेई ग्या। पसे वणां पौलुस और सीलास ने खुब कुट्या, और पसे वणांने जेलखाना मे डाल दिदा।

वणां पौलुस और सीलास ने जेलखाना रे एक हिस्सा मे राख्या जटे सबहुं अधिक सिपाई हा। और अटे तक के वणां वणांरे पगां ने भी लाकड़ां रा बड़ा टुकड़ां मे जोड़ दिदा। पण पौलुस और सीलास आधी रात रे समय, परमेश्वर री स्तुति रा गीत गाई रेया हा।

अचानक हुं, एक भयंकर भूकम्प वियो! और जेलखाना रा सब द्वार खुल ग्या, और सब कैदियां री जंजीरां खुलिन गिर ग्यी।

पसे दरोगो जाग ग्यो। और वणीं देख्यो के जेलखाना रा सब द्वार खुल्या हका हा। अणीं वाते वणीं होस्यो के सब कैदी वचिन भाग ग्या हा। और वो एकदम समकीं ग्यो के वणांरे भाग जावा रे कारण रोमी अधिकारी वणांने मार डालेगा, अणीं वाते वो खुद ने मार डालवा रे लिए तैयार वेई ग्यो! पण पौलुस वणांने देखिन ऊँची आवाज हुं चिल्लायो के, "रुक जा! और खुद ने कोई नुकसान मत पोंचाव। क्योंकि मां सब अटेस हां।"

वणीं दरोगे काँपता हकां पौलुस और सीलास रे कोडे आविन पुछयूं के, "उद्धार पावा रे लिए मुं कई करूँ?" पसे पौलुसे वणांने जवाब दिदो के, "प्रभु यीशु पे विश्वास कर, तो थूं और थारे घरानों उद्धार पाएगा।" पसे वो दरोगो पौलुस और सीलास ने आपणें घर लेई ग्यो और वणांरे घावां ने धोया। पसे पौलुसे वणांरे घर रा सब लोगां ने प्रभु यीशु रे बारा मे शुभ संदेश हुंणायो।

दरोगे और वणांरे पुरा परिवारे प्रभु यीशु पे विश्वास किदो, अणीं वाते पौलुस और सीलासे वणांने बपतिस्मा दिदो। पसे दरोगे पौलुस और सीलास ने भोजन करायो, और वा एक हातीं आनन्दित विया।

बिजे दन नगर रे अगुवां पौलुस और सीलास ने जेलखाना हुं आजाद कर दिदा और फिलिप्पी हुं बाण्णे परा जावा रे लिए कयूं। पसे पौलुस और सीलास लुदिया और थोडाक बिजां मित्रां हुं मिल्या और वणांरे बाद फिलिप्पी नगर हुं निकल ग्या। और अणीं तरह हुं प्रभु यीशु रे बारा मे शुभ संदेश सब जगां फैलतो ग्यो, और कलीसिया बढ़ती ग्यी।

पौलुस और बिजां मसीही अगुवां बोत सा नगरां री यात्रा किदी। और वणां लोगां ने प्रभु यीशु रे बारा मे शुभ संदेश हुंणायो। और वणां कलीसियां रा विश्वासियां ने प्रोत्साहित करवा और वणांने वचन री शिक्षा देवा रे लिए बोत सा पत्र भी लिख्या। और अणां पत्रां मे हुं थोडाक पत्र बाइबल री किताबां वणीं ग्यी।