46. पौलुस मसीही विश्वासी वणीं जाए है

शाऊल नाम रो एक व्यक्ति हो जणीं प्रभु यीशु पे विश्वास नी किदो हो। और जेरां वो जवान हो, तो वणीं स्तिफनुस ने मारवा वालां लोगां रे कपड़ां री निगरानी किदी ही। और बाद मे, वणीं विश्वासियां ने बोत ही सताया हा। और वणीं यरूशलेम मे घर-घर जाईन पुरुष और स्त्री दोयां ने गिरफ्तार करिन जेलखाना मे डाल दिदा हा। पसे महायाजके शाऊल ने दमिश्क नगर मे जावा री अनुमति दिदी। और वणीं वटे रा विश्वासियां ने गिरफ्तार करवा और वणांने पासा यरूशलेम मे लेईन आवणां रे लिए शाऊल हुं केयूं।

अणीं वाते शाऊले दमिश्क जावा री यात्रा ने आरम्भ किदी। और वणां नगर मे पोंचवा हुं थोडांक पेले, वणांरे चारी ओर आकाश हुं एक उज्जवल प्रकाश चमक्यो, और वो जगापे गिर पड्यो। पसे शाऊले कणांक ने यो केतां हकां हुण्यो के, "हे शाऊल! हे शाऊल! थूं मने क्यूं सताई रेयो है?" पसे शाऊले पुछयूं के, "हे प्रभु, थूं कुंण है?" पसे प्रभु यीशुए वणांने जवाब दिदो के, "मुं यीशु हूँ! थूं मने सताई रेयो है।"

जेरां शाऊल उठ्यो, तो वो आपणीं आँखां हुं देखी नी सकतो हो। और वणांरे मित्र वणांने दमिश्क मे लेईन ग्या हा। और शाऊले तीन दनां तक नी तो कई खादो और नी पीदो हो।

दमिश्क मे हनन्याह नाम रो एक चेलो हो। और परमेश्वरे वणांहुं केयूं के, "वणां घर मे जा जटे शाऊल रुक्यो हको है। और जाईन आपणें हातां ने वणांपे रख, ताकि वो फेर हुं देखवा लागे।" पण हनन्याए केयूं के, "हे प्रभु, मईं हुण्यो है के अणीं व्यक्तिए विश्वासियां ने कसाक सताया हा।" पसे परमेश्वरे वणांने जवाब दिदो के, "जा! क्योंकि मईं वणांने यहूदियां मे और बिजी जातियाँ रे लोगां मे मारे नाम री घोषणां करवा रे लिए चुन लिदो है। और वो मारे नाम रे लिए बोत ही कष्ट सहेगा।"

अणीं वाते हनन्याह शाऊल रे कोडे ग्यो, और आपणें हातां ने वणांपे रख्या, और केयूं के, "प्रभु यीशुए, ज्यो अटे आवणां रे समय थारे मार्ग मे थारापे प्रकट वियो हो, वणीं मने थारे कोडे भेज्यो है ताकि थूं फेर हुं देखवा लागे, और पवित्र आत्मा थने भर दिये।" पसे तुरन्तुस शाऊल फेर हुं देखवा मे सक्षम वेई ग्यो, और हनन्याए वणांने बपतिस्मा दिदो। पसे शाऊले भोजन किदो और फेर हुं बलवंत वेई ग्यो।

जेरां हुंस, शाऊले दमिश्क मे रेवा वालां यहूदियां मे प्रचार करणों आरम्भ कर दिदो। और वणीं केयूं के, "प्रभु यीशु परमेश्वर रो बेटो है!"और यहूदी लोग अचम्भित हा, क्योंकि शाऊले तो पेले विश्वासियां ने मार डालवा रो प्रयास किदो हो, पण अबार वणीं प्रभु यीशु पे विश्वास किदो हो। और शाऊले यहूदियां रे हातीं वाद- विवाद किदो। और वणीं दिखायो के प्रभु यीशु मसीह हो।

बोत दनां रे बाद, यहूदियां शाऊल ने मार डालवा री योजना वणांई। और वणां वणांने मार डालवा रे लिए नगर रा मुख्य फाटक पे लोगां ने भेज्या। के वा वणांरी निगरानी करीं पण शाऊले वणीं योजना रे बारा मे हुंण लिदो हो, और वणांरे मित्रां वचिन निकलवा मे वणांरी मदद किदी। और एक रात वणां वणांने टोकरी मे बिठाईंन नगर री दीवार हुं वणांने नीचे उतार दिदो। पसे दमिश्क हुं वचिन निकलवा रे बाद शाऊले प्रभु यीशु रे बारा मे प्रचार करणों जारी राख्यो।

शाऊल चेलां हुं मिलवा रे लिए यरूशलेम मे ग्यो, पण वा वणांहुं समकता हा। पसे बरनाबास नाम रो एक विश्वासी शाऊल ने चेलां रे कोडे लेईन ग्यो। और वणीं वणांने वतायो के शाऊले किस्तर साहसी वेईन दमिश्क मे प्रचार किदो हो। वणांरे बाद, चेलां शाऊल ने स्वीकार कर लिदो।

थोड़ाक विश्वासी ज्या यरूशलेम रा सताव हुं भाग ग्या हा वा अंताकिया नगर मे परा ग्या हा और प्रभु यीशु रे बारा मे प्रचार करता हा। अंताकिया मे रेवा वालां लोग अधिकतर यहूदी नी हा, पण पेली बार, वणांमे हुं बोत सा लोग विश्वासी वणीं ग्या हा और बरनबास और शाऊल अणां नवा विश्वासियां ने प्रभु यीशु रे बारा मे और अधिक हिकावा रे लिए वटे ग्या और कलीसिया ने मजबूत किदी। और प्रभु यीशु पे विश्वास करवा वालां पेली बार अंताकिया मेस "मसीही" केवांणा।

एक दन, अंताकिया मे विश्वासी लोग उपवास रे हातीं प्रार्थना करी रेया हा। जेरां पवित्र आत्मा वणांहुं केयूं के, "मारे लिए बरनबास और शाऊल ने वणां काम ने करवा रे लिए अलग कर दो जणांने करवा रे लिए मईं वणांने बुलाया हीं।" अणीं वाते अंताकिया री कलीसियाए बरनबास और शाऊल रे लिए प्रार्थना किदी और वणांपे आपणां हातां ने राख्या। पसे वणां वणांने बिजी बोत सी जगापे प्रभु यीशु रे बारा मे शुभ संदेश रो प्रचार करवा रे लिए भेज दिदा। और बरनबास और शाऊल ने अलग-अलग जातियाँ रे लोगां ने वचन री शिक्षा दिदी, और बोत सा लोगां प्रभु यीशु पे विश्वास किदो।