45. स्तिफनुस और फिलिप

पेलां मसीही अगुवां रे वच मे स्तिफनुस नाम रो एक पुरुष हो। और सब लोग वणांरो आदर करता हा। और पवित्र आत्मा वणांने बोत ही सामर्थ्य और बुद्धि प्रदान किदी ही। और स्तिफनुसे बोत ही चमत्कार भी किदा हा। और जेरां वणीं प्रभु यीशु पे भरोसो करवा रे बारा मे वणांने शिक्षा दिदी, तो बोत सा लोगां प्रभु यीशु पे विश्वास किदो हो।

एक दन, स्तिफनुस प्रभु यीशु रे बारा मे लोगां ने शिक्षा देई रेयो हो, पसे थोड़ाक असा यहूदी आया जणां प्रभु यीशु पे विश्वास नी किदो हो, पण वणां वणांरे हातीं वाद-विवाद करणों आरम्भ कर दिदो। और वा वणांपे बोत ही क्रोधित वेई ग्या, अणीं वाते पसे वा धार्मिक अगुवां रे कोडे ग्या और वणांरे बारा मे झूठ बोल्या। और वणां केयूं के, "मां स्तिफनुस ने मूसा और परमेश्वर रे बारा मे बुरी वात केतां हकां हुण्यो है!" अणीं वाते धार्मिक अगुवां स्तिफनुस ने गिरफ्तार कर लिदो और वणांने महायाजक और यहूदियां रा बिजां अगुवां रे हामे लेईन आया। और पसे और भी झूठा गवाह आया और वणां स्तिफनुस रे बारा मे झूठी गवाई दिदी।

महायाजकां स्तिफनुस हुं पुछयूं के, "कई या लोग थारे बारा मे सई केई रेया हीं?" पसे स्तिफनुसे महायाजक ने जवाब देवा रे लिए बोत सी वातां ने बोलनीं आरम्भ कर दिदी। और वणीं केयूं के अब्राहम रा समय हुं प्रभु यीशु रे समय तक परमेश्वरे इस्राएल रे लोगां रे लिए बोत सा अद्भुत काम किदा हीं। पण लोगां हमेशा परमेश्वर री अनाज्ञाकारिता किदी ही। और स्तिफनुसे केयूं के, "थां लोग परमेश्वर रे विरुद्ध हठीला और बलवो करवा वालां हो। और थां हमेशा पवित्र आत्मा ने अस्वीकार किदो, जिस्तर के आपणें बापदादां हमेशा पवित्र आत्मा ने अस्वीकार किदो हो और बोत सा परमेश्वर री ओर हुं बोलवा वालां लोग हा वणां हाते भी बुरो किदो है! क्योंकि थां मसीह ने मार डाल्यो!"

जेरां वणां धार्मिक अगुवां यो हुण्यो, तो वा अतरा क्रोधित वेई ग्या। के वणां आपणें कानां ने बंद कर लिदा और ऊँची आवाज मे चिल्लाया। और वा स्तिफनुस ने घसीटिन नगर हुं बाण्णे लेई ग्या और वणांने मार डालवा रे लिए वणांने भाटां मेल्या।

जेरां स्तिफनुस मरी रेयो हो, तो वो पुकार उठ्यो के, "हे यीशु, मारी आत्मा ने ग्रहण कर!" पसे वो आपणें घुटणां पे गिर पड्यो और फेर हुं पुकार उठ्यो के, "हे प्रभु, यो पाप वणांपे मत लगाजे।" पसे वो मरी ग्यो।

वणें दन, यरूशलेम मे रेवा वालां बोत सा लोगां प्रभु यीशु रा विश्वासियां ने सताणों आरम्भ कर दिदो, अणीं वाते विश्वासी लोग बिजां स्थानां मे भाग ग्या। पण अणांरे बावजूद भी, जटे भी वा ग्या वणां प्रभु यीशु रे बारा मे प्रचार किदो।

फिलिप नाम रो प्रभु यीशु रो एक विश्वासी हो। और जिस्तर के बिजां बोत सा विश्वासियां किदो हो वो भी यरूशलेम हुं भाग ग्यो। और वो सामरिया रा क्षेत्र मे परो ग्यो। और वटे वणीं लोगां मे प्रभु यीशु रे बारा मे प्रचार किदो। और बोत सा लोगां प्रभु यीशु पे विश्वास किदो और उद्धार पायो। एक दन, फिलिप रे कोडे परमेश्वर री ओर हुं एक स्वर्गदूत आयो और वणांहुं मंगरा मे जावा रे लिए, और एक सड़क पे चालवा रे लिए केयूं। पसे फिलिप वटे हुं परो ग्यो। और जेरां वो सड़क पे चालीं रेयो हो तो, वणीं एक व्यक्ति ने आपणें रथ मे जातां हकां देख्यो। और वो व्यक्ति कूश देश रो एक महत्वपूर्ण अधिकारी हो। पसे पवित्र आत्मा फिलिप हुं केयूं, के जाईन वणां व्यक्ति रे हातीं-हातीं चाल।

अणीं वाते फिलिप वणां रथ रे कोडे ग्यो। और वणीं हुण्यो के वो कूशी परमेश्वर रा वचन ने भणीं रेयो हो। ज्यो यशायाह लिख्यो हो वणांने वो भणीं रेयो हो के, "वा वणांने वध किदी जावा वालीं भेड़ रे समान लेई ग्या, और जिस्तर एक मेम्नो शान्त वे है, वणीं भी एक शब्द नी केयूं। और वणां वणांरे हातीं अनुचित व्यवहार किदो और वणांरो आदर नी किदो। पसे वणां वणांरो प्राण लेई लिदो।"

फिलिपे वणां कूशी हुं पुछयूं के, "ज्यो थूं भणीं रेयो है कई थूं वणांने हमझे भी है?" पसे वणीं कूशीए जवाब दिदो के, "नीं! क्योंकि जेरां तक कोई अणांने मने नी हमझावे, अतरे तक मुं अणांने नी हमझीं सकूँ हूँ। कृपा करिन मारे कोडे आविन बैठ। यशायाह यो आपणेंस बारा मे लिखी रेयो हो या पसे कणां बिजा व्यक्ति रे बारा मे?"

फिलिप रथ पे चढ़िन बैठ ग्यो। पसे वणीं वणां कूशी व्यक्ति ने वो वतायो ज्यो यशायाए प्रभु यीशु रे बारा मे लिख्यो हो। पसे फिलिपे परमेश्वर रे वचन रा बोत सा बिजां भागां री भी चर्चा किदी। और अणीं तरह हुं, वणीं वणां व्यक्ति ने प्रभु यीशु रे बारा मे शुभ संदेश हुंणायो।

फिलिप और कूशी चालतां हकां पाणीं रे कोडे आया। पसे वणीं कूशीए केयूं के, "देख! अटे पाणीं है! कई मुं अबार बपतिस्मा लेई सकूँ हूँ?" और वणीं सारथी हुं रथ ने रोकवा रे लिए केयूं।

अणीं वाते पसे वा पाणीं मे उतरी ग्या, और फिलिपे वणां कूशी ने बपतिस्मा दिदो। और जेरां वा पाणीं हुं बाण्णे आया, तो पवित्र आत्मा अचानक हुं फिलिप ने उठाईंन कणां बिजा स्थान मे लेई ग्यो। और वटे भी फिलिपे लोगां ने प्रभु यीशु रे बारा मे वताणों जारी राख्यो।

वो कूशी आपणें घर री यात्रा पे आगे बढ़ी ग्यो। और वो बोत ही प्रसन्न हो, के अबार वो प्रभु यीशु मसीह ने जाणतो हो।