19. भविष्यद्वक्ता

परबु सबु बेरा इसरायली मन लगे भविष्य वक्ता मन के पोटाय ते रेउआय। भविष्य वक्ता परबुर संदेस मन के सुनते रेउआत आउरी पाचे हाके लोक मन के सांगते रेउआत।

अबर अहाब इस्राएल राज्यर राजा रेउआय तो हाय बेरा एलियाह भविष्यवक्ता रेउआय। अहाब गोटक बुरा माने रेउआय। हाय झुटा बाल देवतार उपासना करायबा काचे लोक मन के विवस करी रेउआय। एकाचे एलिय्याह अहाब के बोलुआय कि परबु हाय लोक मन के दंडित करके जायते रेला। हाय हाके बोलुआय, ’’जेबे तक मुई बोरसा होयबा काचे ना बोली तेबे तक इस्राएलर राज्य ने बोरसा ना होए आउरी ओस बले ना घसरे।’’ए बीत गोट अहाब के अतक रिसा करी देउआय कि हाय एलिय्याह के मारी देबार निर्णय करूआय।

एकाचे परबु एलिय्याह के बोलू आय कि हाय झारे जाई करी अहाब ले लुकी रहो। एलिय्याह हाय झारे हाय सोता लगे जाउआय जोन ताने जीबा काचे परबु हाके बोली रेउआय। सबु सकारे आउरी सबु संज बरा, चेड़े मन एलिय्याह काचे रोटी आउरी माउस दरी करी आयते रेलाय। ए सबु बेरा, अहाब आउरी हातार सेना मन एलिय्याह के डगरते रेलाय, मांतरहाय मन हाके डगर के ना पारलाय।

बोरसा ना होयलार खिनिक मा बेरार पाचे हाय सोता सुखी जाउ आय। एकाचे एलिय्याह लगर गोटक देस ने जाउआय। हाय देस ने गोटक गरीब विधवा रेउआय जार गोटक बेटा रेउआय। तिकर लगे भात लगभग सरी जाई रेउआय कायकाचे कि हाय ताने काई फसल ना होई रेउआय। मांतरतेब ले बले, हाय बायले एलिय्याहर देख भाल करूआय, एकाचे परबु हातार आउरी हातार बेटार जरुरत के पूरा करूआय, ए लागी करी हातार आटार बर्तन आउरी हातार तेलर कुप्पी केबी बले खाली ना होउ आय। हाय सबु अकालर दोरान तिकर लगे भात रेउआय। एलिय्याह खिनिक मा बरस तक हाई ताने रेउआय।

साढ़े तीन बोरसर पाचे, परबु एलिय्याह के बोलुआय कि फिरले बोरसा करसी। हाय एलिय्याह के लेवटी करी इस्राएल राज्य ने जाई करी अहाब ले गोटाय के बोलुआय। एकाचे एलिय्याह अहाब लगे जाउआय। जेबे अहाब हाके दखुआय तो हाय बोलुआय, ’’अच्छा तुई आस, मुसीबत जनमायबा बीता!’’एलिय्याह जवाब देउआय, ’’मुसीबत जनमायबा बीता तो तुई आस! तुई यहोवा के छाड़ी देली आस। हाई सच्चा परबु आय, मांतर तुई बाल र उपासना करबी आस। अबर तोके इस्राएल राजर सबु लोक मन के कर्मेल डोंगरी ने दरी करी आनबार आय।’’

अतः सबु कर्मेल डोंगरी ने जाउआत। हाय माने मन बले आउआत जोन मन बोलते रेउआत कि हाय मन बालर संदेस मन के बोलबा आत। ए मन बालर भविष्य वक्ता मन रेउआत। हाय मन सबु 450 रेउआत। एलिय्याह लोक मन के बोलुआय, ’’कड़क दायले तोमी निजर मन के फिराय रेबास? अगर यहोवा परबु आय तो हातार आराधना करा! अगर बाल परबु आय तो हातार उपासना करा!’’

तेबे एलिय्याह बालर भविष्य वक्ता मनके बोलुआय, ’’गोटक बुइला के बली करी हातार माउस के जत्रादान होयबा काचे बेदी ताने सोंगा,मांतरजोय ना धरा। हातार बाद मुई बले अमति करबी, आउरी गोटक दूसरा बेदी ने हाय माउस के सोंगायबी। तेबे अगर परबु बेदी ताने जोय घसरायसी तो तोमी जानी जीबास कि हाई सच्चा परबु आय।’’ तेबे बालर भविष्य वक्ता मन गोटक बली के तियार करूआत मांतरजोय ना धराउ आत।

तेबे बालर भविष्य वक्ता मन बाल ले पारतना करूआत कि, हे बाल, हामोर सुन!’’सबु दिन हाय मन परतना करूआत आउरी चीचाउ आत एथानले बले हाय मन खुद के चाकू ले काटी होउआत, मांतरबाल जवाब ना देउआय, आउरी हाय कोनि जोय ना घसराउआय।

बालर भविष्य वक्ता मन बाल के पारतना करबा ने लगभग पूरा दिन बीतय देउआत। आखरी तक हाय मन पारतना करबा टा बंद ना करूआत। तेबे एलिय्याह दूसरा बुईलार माउस के परबुर बेदी ने सोंगाउआय। एतार पाचे, हाय लोक मन के पानीर बड़े बर्तन मनके हाय जत्रादान ताने उलद के बोलुआय जड़ दायले कि माउस, दारू, आउरी एथानले बले कि बेदीर लगर भुई पूरा तरह ले भीजी ना गला।

तेबे एलिय्याह पारतना करूआय कि, ’’हे यहोवा,अब्राहम, इसहाक, आउरी याकूबर परबु, हामके दखाव कि तुई इस्राएलर सच्चा परबु आस आउरी एटा कि मुई तोर सच्चा दास आय। मोके जवाब देस जोन थानले कि ए मन जानी जिबाय कि तुईच सच्चा परबु आस।’’

हड़कीच दाय, बादरी ले ओय घसरू आय आउरी हाय माउस, दारू, पोकना, भुई आउरी एथानले बले कि बेदीर लगर पानी के बले पोड़ाय देउआय। जेबे लोक मन एटा के दखु आत, हाय मन भुई ने घसरू आत आउरी बोलुआत, ’’यहोवा ही सच्चा परबु आय! यहोवा ही परबु आय!’’

तेबे एलिय्याह बोलुआय, ’’बालर गोटक बाले भविष्य वक्ता बाची करी जायके ना पारोत!’’ एकाचे लोक मन बालर भविष्य वक्ता मन के धरुआत आउरी हाय मनके हाय थानले अलग नेउआत आउरी हाय मन के मारी देउआत।

तेबे एलिय्याह अहाब राजा के बोलुआय, झोपके निजर घरे पोराव, काय काचे कि बोरसा होउआय बे। झोपके बादरी घना होई जाउआय, आउरी खुबे बोरसा चालू होई जाउआय। यहोवा हाय सुकला बीती के सराय ते रेउआय। एथानले दखा देउआय कि यहोवा ही सच्चा परबु आय।

जेबे एलिय्याह निजर काम के सराउ आय, तो परबु एलिशा नामर गोटक माने ने निजर भविष्यवक्ता होयबा काचे चुनु आय। परबु एलिशार जरिया ले बहुत चमत्कार करूआय। गोटक चमत्कार नामान संगे होउआय। हाय गोटक दुसमन सेनार सरदार रहूआ, मांतरहाके चामड़ीर गोटक बुरा रोग होईजाई रेउआय। नामान एलिशार बारे ने सुनि रेउआय, एकाचे हाय एलिशा लगे आउआय आउरी हाके ठीक करबा काचे अनुरोध करूआय। एलिशा नामान के बोलुआय कि जाई करी यरदन नदीर पानी ताने सात बार बुड़।

नामान रिसा होई जाउआय। हाय अमता करबा काचे मना करी देउआय, काय काचे कि एटा हाके भोकवा मनर काम लागूआय। मांतरपाचे हाय अपना मन के बदली देउआय आउरी जाई करी यरदनर पानी ने सात बार डूबकी लगाउ आय। जेबे आखरी बार हाय पानी ले बाहरे निस्कू आय तो परबु हाके ठीक करी देउआय।

परबु इस्राएलर लोक मन लगे दूसरा खुबे भविष्यवक्ता मन के पोटाउ आय। हाय सबु मन लोक मन ले मुरती मनर उपासना करबाटा बंद करी देबा काचे बोलूआत। एतार बजाय, हाय मनके एक दूसरा संगे न्यायपूर्वक व्यव्हार करबा राय आउरी एक दूसरार उपरे दया करबाराय। हाय भविष्य वक्ता मन लोक मन के चेतावनी देउआत कि हाय मनके बुरा काम करबाटा बंद करी देबाराय आउरी एतार बजाय परबुर गोट मनके पालन करबा राय। अगर हाय लोक मन अमता ना करबाय तो परबु हाय मन के दोसी मानी करी तिकर न्याय करसी, आउरी हाय मन के दंडित करसी।

खुबे बेरा, हाय मन परबुर आज्ञार पालन ना करूआत। अक्सर हाय मन भविष्यवक्ता मन संगे बुरा व्यवहार करूआत आउरी एथानले बले केबी – केबी हाय मन के मारी देउआत। गोटक बार, हाय मन यिर्मयाह भविष्य वक्ता के सुकला चुआ ताने डाली देउआत आउरी हाय ताने मोरबा काचे छाड़ी देउआत। हाय चुआर तले चिकल ने धसी जाउआय। मांतरतेबे राजा के हातार उपरे दया आई जाउआय आउरी हाय अपना सैनिक मन के आदेस देउआय कि यिर्मयाह के मोरबार पोयले हाय चुआ ले बाहरे झिकोत।

भविष्यवक्ता मन परबु बाटले बोलबाटा चालु सोंगाउआत भले ही लोक मन हाय मन के नफरत करला य। हाय मन लोक मन के चेतावानि देलाय कि हाय मन पश्चाताप ना करले परबु हाय मन के नास करसी। हाय मन लोक मन के एटा बले सुरता कराउआत कि परबु हाय मन लगे मसिह के बले पोटाय बार प्रतिज्ञा करला आचे।