2. पाप संसार ने आउआय

आदम आउरी हातार बायले सुन्दर बगीचा ने खुबे हरिक ने रेउआत। ए बगीचा के परबु तीकर काचे बनाय रेउआय। हाय मन फोटी ना पिन्दबा राय, मांतर हाय मन लाज महसूस ना करलाय, काय काचे की संसार ने पाप ना रेउआय। हाय मन अक्सर हाय बगीचा ने बुलते रेलाय आउरी परबु ले गोटायते रेलाय।

मांतर हाय बगीचा ने गोटक सांप रेउआय। हाय खुबे चालक रेउआय। हाय हाय बायले के पोचारू आय, ”काय सचमच ने परबु तोमके बोलला आचे कि ए बगीचार कोनी बले गचर पाक के ना खा?”

हाय बायले जवाब देउआय, ”परबु हामके बोलला आचे की हाय भले आउरी बुरा ज्ञानर गचर पाक के छाड़ी करी कोनी बले गचर पाक के कायके सकू। परबु हामके बोलला आचे की अगर तोमी ए पाक के खायबास या हाके छिंबास, तो तोमी मोरी जिबास।”

हाय सांप बायले के जवाब देला, ”एटा सच नुआय! तोमी न मोरास। परबु निजे जाने की जसन तोमी हाय पाक के खायबास, तोमी परबुर जसन होई जिबास आउरी हातार छोमे भले आउरी बुरा के समझ के मुरायबास।”

जेबे हाय बायले दकला की हाय गचर पाक कायबा काचे अच्छा आचे आउरी दकबा ने मनभाउ आय। हाय बले समझदार बनबार चाहते रेउआय, एकाचे हाय पाक के टुटाय करी काउआय। पाचे हाय निजर मुनुस के हाय पाक के देउआय, जोन हातार संगे रेउआय आउरी हाय बले काउआय।

हड़कीच दाय, तीकर आंकी खुली जाउआय, आउरी हाय मनके मालुम होयला की हाय मन नंगा रेउआत। हाय मन पोतर मनके गोटक संगे सिली करी तीकर फोटी बनाउआत आउरी निजर गागर के ढाकबार कोशिश करूआत।

तेबे मानर आउरी हातार बायले हाय बागीचा ने टहलबा दाय परबुर आवाज के सुनुआत। हाय मन दुनो परबु ले लुकुआत। तेबे परबु माने के आवाज देउआय, ”तुई कोंती आचिस?” आदम जवाब देला, ”मुई तोके बगीचा ने टहलबा दाय सुनली, आउरी मुई डरी गली, काय काचे की मुई नंगा रेली। एकाचे मुई लुकली।”

पाचे परबु पोचारला, ”तोके कोन सांगला की तुई नांगड़ा आचिस? काय तुई हाय पाक के खायली आस जाके कायबा काचे मुई मना करी रेली?” माने जवाब देला, ”तुई मोके जोन ए बायले देली आस हाई मोके हाय पाक के देला।” तेबे परबु बायले के पोचारला, ”तुई ए काय करली आस?” हाय बायले बोलला, ”सांप मोके बहकाय देला आचे।”

परबु सांप के बोलला, ”तुई शापित आस! तुई तोर पेटर बल ने हिंड बीस आउरी भुई के चाटबीस। तुई आउरी ए बायले गोटक दूसरा ले नफरत करबास, आउरी तोर बेटा आउरी हातार बेटामन बले गोटक दूसरा ले नफरत करबाय। ए बायलेर वंशज तोर मुंडी के रोमोंदसी, आउरी तुई हातार लेड़ी के डसबीस।”

तेबे परबु बायले के बोलला, ”मुई तोर पेटे हारिन होयबा बीती दुका के खुबे करबी। तुई निजर मुनुसर लालसा करबिस, आउरी हाय तोर उपरे राज्य करसी।”

परबु माने के बोलला, ”तुई तोर बायलेर सुनली आस आउरी मोर आज्ञा के ना मानलिस। एकाचे भुई शापित होयला आचे, आउरी तोके भोजन अकरायबा काचे कड़ा काम करबार जरुरत आचे। अबर तुई मोरी जिबिस, आउरी तोर गागर भुई ने मिली जायसी।” हाय माने निजर बायलेर नाम हव्वा सोंगायला, जार मतलब होउआय “जीवन देबा बीती”, काय काचे की हाय सबु लोक मनर आदिमाँ होयसी। आउरी परबु आदम आउरी हव्वा के पोसुर चामड़ी ले बनला बीती अंगरखा के पिन्दाउआय।

पाचे परबु बोलला, ”अबर भला आउरी बुरा के जानबा के माने हामर जसन होइ गला आचे, एकाचे हाय मनके हाय जीवनर गचर पाक के खायके ना देबार चाहिए की हाय मन सबु दाय काचे जीवत रहोत।” एकाचे परबु आदम आउरी हव्वा के बगीचा ले निकलाय देउआय। परबु हाय बगीचार ओलबा दुआरे ताकतबर सरगदूत मनके राका करबा काचे लगाय देला ताकि हाय जीवनर गचर पाक के कोनी खायके ना सकोत।