3. पुर

खुबे बेरार पाचे, संसार ने खुबे लोक मन रेयते रेलाय। हाय मन खुबे दुष्ट आउरी उपद्रवी होई जाई रेउआत। सबु अतक बुरा होई जाई रेउआय कि परबु आखिर निर्णय धरुआय कि गोटक बड़े पुर ले ए पूरा संसार के नाश करी देबी।

मांतर परबु नूह ले हरिक रेउआय। हाय गोटक धर्मी माने रेउआय, जोन दुष्ट माने मनर मजीगता रेउआय। परबु नूह के सांगू आय कि हाय गोटक बड़े पुर के आनुआय बे। ए कारण, हाय नूह के गोटक बड़े नाव के बनायबा काचे बोलुआय।

परबु नूह के गोटक डोंगा बनायबा काचे बोलुआय, जोन लगभग 140 मीटर लोम हो, 23 मीटर चौड़ा हो आउरी 13.5 मीटर डेंगर होयसी। नूह के हाके दारू ले बनायबार रेउआय आउरी हायती तीन तल, खुबे बाकरा, गोटक छत आउरी गोटक खिड़की बनायबार रेउआय। हाय डोंगा नूह, हातार परिवार, आउरी भुईर सबु परकार पोसु मनके पुर ले सुरक्षित सोंगायसी।

नूह परबुर आज्ञा के मानला। हाय आउरी हातार तीन बेटा मन अमता डोंगा बनाउआत जसन परबु हाय मनके सांगी रेउआय। कायकाचे हाय डोंगा खुबे बड़े रेउआय एटाकाचे हाके बनायबा काचे खुबे बोरस लागुआय। नूह लोक मनके आयबा बीती पुरर बारे ने चेतावनी देउआय आउरी हाय मनके परबु बाटे लेवटबा काचे बोलुआय, मांतरहाय मन हातार उपरे विश्वास ना करूआत।

परबु नूह आउरी हातार परिवार के निजर काचे आउरी पोसु मन काचे पुरला मा भात रुंडा करबा काचे आदेस बले देउआय। जेबे सबु तीयार होई जाउआय, तो परबु नूह के बोलुआय की अबर हाके, हातार बायले के, हातार तीन बेटा मन के, आउरी तीकर बायले मनके-कुल आठ झन के डोंगा ने जिबार बेरा रेउआय।

परबु सबु पोसु आउरी चेड़ेर नर आउरी मादा के नूह लगे पोटायला ताकि हाय मन डोंगा ने जायके सकोत आउरी पुर दाय सुरक्षित सोंगाया जा सकोत। परबु असन सबु परकारर पोसु मनर सात नर आउरी सात मादा मनके पोटायला जाके जत्रा चेगायबा काचे उपयोग करके सकोत। जेबे हाय मन हाय डोंगा ने खेटलाय तो परबु खुद डोंगार कोपाट के बंद करी देउआय।

तेबे बोरसा होयबा टा शुरू होयला, आउरी बोरसा होयते गला, होयते गला। ना रुकी करी चालीस दिन आउरी चालीस राती तक बोरसा होयते रेउआय। पूरा संसारर सबु चीज पानी ने बुड़ी जाउआय, अथानले बले डेंग ले डेंग डोंगरी बले।

सुकला भुई ने रेबा बीती सबु चीज मोरी जाउआत, मांतरजोन लोक आउरी पोसु डोंगा ने रेउआत हाय मन बाची जाउआत। हाय डोंगा पानी ने पोंरते रेउआय आउरी डोंगार भीतरर सबु चीज के बुड़बा ले सुरक्षित सोंगाउआय।

बोरसार ठेबलार पाचे, पांच मास तक हाय डोंगा पानी ने पोंरते रेउआय, आउरी हाय बेरार पाचे पानी कम होयते रेउआय। तेबे गोटक दिने हाय डोंगा गोटक डोंगरीर टिपे जाई करी टिकुआय, मांतरसंसार एबे बले पानी ले भरी रेउआय। तीन मासर पाचे, डोंगरीर टिप मन दखा देयके मुराउआय।

पाचे चालीस दिनर पाचे, नूह गोटक कावा के एटा दखबा काचे बाहरे पोटाउआय की काय पानी सुकला की नाइ। हाय कावा सुकला भुई के डगरायबा काचे एबाटे हायबाटे उड़ते रेउआय, मांतरअमता कोनी बले जागा ना मिलुआय।

फिर पाचे नूह गोटक कबूतरी के बाहरे पोटाउआय। मांतर हाके बले कोनी सुकला भुई ना मिलुआय, एकाचे हाय नूह लगे लेवटी करी आउआय। गोटक सपतार पाचे हाँय हाय कबूतरी के फिर ले पोटाउआय, आउरी हाय निजर चोंच ने जैतूनर गोटक नुआ पोतर के दरी करी लेवटु आय। पानी घटते रेउआय, आउरी बूटा मन फिर ले अकरते रेउआत।

नूह गोटक सपता आउरी टाकला आउरी तीसरा हार हाय कबूतरी के बाहरे पोटायला। ए बार, हाके ठेबबा काचे जागा मिलुआय आउरी हाय लेवटी करी ना आउआय। पानी सुकते रेउआय।

दुई मासर पाचे परबु नूह के बोलुआय, ”अबर तुई आउरी तोर परिवार आउरी सबु पोसु डोंगा ले निकली आसा। खुबे सारा पिला आउरी पिला झिला मनके जनम दियास। आउरी पृथ्वी ने भरी जा।”अतः नूह आउरी हातार परिवार डोंगा ले बाहरे निकली करी आउआत।

नूहर बाहरे आयलार पाचे, हाय गोटक बेदी बनाउआय आउरी जत्रा काचे उपयोग करके सकबा असन सबु पोसु मन थानले खिनिक मा के दरी करी जत्रा चेगाउ आय। परबु हाय जत्रा ले हरीक होउआय आउरी नूह आउरी हातार परिवार के आशीष देउआय।

परबु बोलुआय, “मुई किरया करबी आची की माने मनर द्वारा करबा बुरा कामर कारण मुई पाचे केबी बले भुई के शाराप ना दी”। मुई ना तो पुरर द्वारा संसार के नष्ट करबी, हालाँकि माने निजर पिला दायले पापी आय।

पाचे परबु निजर वचार चीनर रुप ने पोयला बादरी धनुष के बनाउआय। जेबे केबी बले बादरी ने बादरी धनुष दखा देउआय, तो परबु सुरता करसी कि हाय काय किरिया करला आचे आउरी अमता हातार लोक मन बले करबाय।