4. अब्राहम संगे परबुर बादा

बाढ़र खुबे बोरसर पाचे, संसार ने खुबे लोक मन रेयते रेउआत, आउरी हाय मन फिर ले परबु आउरी गोटक दूसरार विरुद्ध ने पाप करलाय, हाय मन सोबू गोटकीच बासा के गोटायते रेउआत, एकाचे हाय मन गोटक संगे रुंडा होयलाय आउरी गोटक नगर के बनाय के मुरायलाय। जसन परबु आदेस दी रेउआय, हातार अनुसार हाय मन सबु संसार ने ना फैललाय।

हाय मन घमंडी रेउआत, आउरी हाय मनके कमता जीवन जी बा राय ए बारे ने हाय मन परबु आदेसर पालन करबार ना चाहते रेउआत। एथानले बले हाय मन गोटक अमता मीनार के बनायबार शुरू करूआत जोन सरग तक खेटसी। परबु दखुआय की अगर हाय मन गोटक संगे मिली करी बुरा काम मनके करते रेबाय, तो आउरी बले खुबे असन पाप बीती काम के करके सकेत।

एकाचे परबु तीकर बासा के खुबे असन दूसरा बासा ने बदली देउआय आउरी हाय लोक मनके सबु संसार ने फैलाय देउआय। जोन नगर के हाय मन बनायबा टा शुरू करी रेउआत हाय बाबेल बोलाय होयला, जार मतलब आय “गड़बड़ी”।

खुबे बोरसर पाचे, परबु गोटक अब्राम नामर गोटक माने ले गोटाउआय। परबु हाके बोलुआय, ”निजर देस आउरी परिवार के छाड़ी करी हाय देस ने जा जोन टा के मुई तोके दखायबी। मुई तोके आशीष देबी आउरी तोर थानले गोटक बड़े जाती के बनायबी। मुई तोर नाम के महान बनायबी। जोन तोके आशीष देयसी मुई ताके आशीष देबी, आउरी जोन तोके श्राप देयसी हाके श्राप देबी। संसारर सबु कुल तोर द्वारा आशीष पायबाय।”

हाय निजर बायले सारै के धरुआय, निजर सबु सेवक आउरी निजर सबु सम्पति के बले धरुआय आउरी हाय देस ने, मतलब कानन देस ने जायते जाउआय जोन परबु हाके दखाय रेउआय।

जेबे अब्राम कानन खेटुआय तो परबु हाके बोलुआय, ”निजर चारो बाटे दख। मुई तोके ए सबु देस देबी आउरी तोर वंशज सबु दाय काचे एतार उपरे अधिकार सोंगायबाय।” तेबे अब्राम हाय देस ने बोसी गला।

मलिकिसिदक नामर गोटक माने रेउआय जोन सर्वोच्च परबुर याजक रेउआय। गोटक दिने जेबे अब्राम युद्ध करला र पाचे आयते रेउआय तो हाय आउरी अब्राम मिलुआत। मलिकिसिदक अब्राम के आशीष देउआय आउरी बोलुआय ”सर्वोच्च परबु जोन सरग आउरी पृथ्वीर मालिक आय हाय तोके आशीष दो।” पाचे अब्राम युद्ध ने जीतला बीती सबु चीज मनर दशमांश मलिकिसिदक के देउआय।

खुबे बोरस बितला, मांतर एबले बले अब्राम आउरी सारै के कोनी बेटा ना होई रेउआय। परबु अब्राम के गोटाउआय आउरी फिर ले प्रतिज्ञा करूआय। हाय ए प्रतिज्ञा करला की हातार गोटक बेटा जनमसी आउरी जसन बादरी ने तारा मन आचेत असनी हातार खुबे असन वंशज होयबाय। अब्राम परबुर प्रतिज्ञा उपरे विश्वास करूआय। परबु घोषणा करूआय की अब्राम गोटक धर्मी माने रेउआय काय काचे की हाय परबुर प्रतिज्ञा उपरे विश्वास करी रेउआय।

तेबे परबु अब्राम ले गोटक वाचा बाँधउआय। सादा रूप ले, गोटक वाचा दुई दलर मजीगता गोटक दूसरा काचे काम करबार गोटक समझौता होउआय। मांतर ए मामला ने, परबु अब्राम के ए प्रतिज्ञा तेबे करूआय, जेबे अब्राम सोयते रेउआय, मांतर तेबले बले परबुर आवाज के सुन के सकते रेउआय। परबु बोलुआय, ”मुई तोर गागर ले जनमाय करी तोर काचे गोटक निजर बेटा देबी। मुई तोर वंशज के ए कनान देस देबी आची।” मांतर एबले बले अब्रामर कोनी बेटा ना होउआय।