5. प्रतिज्ञार बेटा

अब्राम आउरी सारैर कनान खेटलार दस बोरसर पाचे, एबले बले तीकर कोनी बेटा ना रेउआत। एकाचे अब्रामर बायले सारैहाके बोलुआय, ”दख परबु एबले मोके बेटा ना देला आचे। आउरी मुई अबर बेटा जनमायबा काचे खुबे डोकरी होई गली आची। अबर सुन मोर दासी हाजिरा इ ताने आचे।

अतः अब्राम हाजिरा ले बिया करूआय। हाजिरा ले गोटक बेटा जनमु आय, अब्राम हातार नाम इश्माएल सोंगाउआय। मांतर सारै हाजिरा ले कुचर होयते रेउआय। जेबे इश्माएल तेरा बोरसर रेउआय, परबु अब्राम ले फिर ले गोटाउआय।

परबु बोलुआय, ”मुई सर्व-शक्तिमान परबु आय। मुई तोर संगे गोटक वाचा बाँधबी।” तेबे अब्राम भुई ताने घसरी करी दंडवत करूआय। परबु अब्राम के ए बले बोलुआय की, ”तुई सबु जातिर बुआ होयबिस। मुई तोके आउरी तोर वंशज के तीकर निज भुई होयबा काचे कनान देस देबी आउरी सबु दाय काचे तीकर परबु होयबी। तोके निजर घरानार सबु मानेर खतना करबा राय।”

तोर बायले सारैगोटक बेटा के जनम देयसी-हाय प्रतिज्ञार बेटा होयसी। हातार नाम इसहाक सोंगाव। मुई हातार संगे मोर वाचा के बनाय करी सोंगायबी आउरी हाय गोटक बड़े जाति बनी जायसी। मुई इश्माएल के बले गोटक बड़े जाति बनायबी, मांतर मोर वाचा इसहाक संगे रहसी।” तेबे परबु अब्रामर नाम बदली करी अब्राहम सोंगाय करी देउआय, जार मतलब आय “खुबे लोक र बुआ”। परबु सारैर नाम बदली करी सारा करी देउआय, जार मतलब आय “मूलमाता”।

हाय दिने, अब्राहम निजर घरानार सबु मानेर खतना करूआय। लगभग गोटक बोरसर पाचे अब्राहम 100 बोरसर रेउआय आउरी सारा 90 बोरसर रेउआय। तेबे सारा अब्राहमर बेटा के जनम देउआय। जसन परबु तीके बोली रेउआय हाय मन हातार नाम इसहाक सोंगाउआत।

जेबे इसहाक जुआन होउआय, तेबे परबु अब्राहमर विश्वासर परीक्षा करूआय। परबु बोलुआय, ”निजर गोटक लौता बेटा के धर, आउरी हाके मोर काचे जत्रार रूप ने चेगाय देस। ”फिर ले अब्राहम परबुर आज्ञा के मानुआय आउरी निजर बेटा के जत्रा करबा काचे तीयार करूआय।

जेबे अब्राहम आउरी इसहाक जत्रा चेगायबा जागा बाटे जायते रेउआत तो इसहाक पोचारूआय, ”हे बुआ, हामर लगे जत्रा काचे दारु तो आचे, मांतर जत्रा करबार मेमना कोनती आचे?” अब्राहम जवाब देउआय, ”हे मोर बेटा, परबु जत्रा करबा काचे मेमनार जुगाड़ करसी।”

जेबे हाय मन जत्रा चेगायबा जागा ने खेटलाय, तो अब्राहम इसहाक के बाँधी करी बेदी ताने सुआय देउआय। हाय निजर बेटा के मारबा काचे होई रेउआय की परबु बोलुआय, ”ठेबी जा! पिला के नुकसान ना खेटाव! अबर मुई जानी गली आची की तुई मोर भय मानुआस कायकाचे की तुई तोर गोटक बेटा के बले मोर थानले बाचाय करी ना सोंगायलिस।”

लगे अब्राहम गोटक मेंडा के दखुआय जोन झाड़ी ताने लटकी रेउआय। इसहाकर बदला ने जत्रा काचे परबु मेंडार जुगाड़ करूआय। अब्राहम हरिक-हरिक मेंडार जत्रा चेगाय देउआय।

तेबे परबु अब्राहम के बोलुआय, ”तुई मोर काचे सबु के देबा काचे इच्छा करी रेलीस, एथानले बले की निजर गोटक बेटा के बले। एकाचे मुई तोके आशीष देबार प्रतिज्ञा करबी आची। तोर वंशज बादरीर तारा मन ले बले खुबे होयबाय। कायकाचे की तुई मोर आज्ञा के मानली आस एकाचे मुई तोर परिवारर द्वारा संसारर सबु कुल मनके आशीष देबी।”