22. युहन्नार जनम

अतीत ने परबु निजर भविष्यवक्ता मन सगे बात करी रेउआय हाईटा काचे हाय लोक मन सगे गोटायके सकेते रेलाय मांतर हाय समय ले दरी करी आउरी 400 बोरसर बितोत ले हाय तीके ना गोटाउआय। तेबे परबु जकर्याह नामर भविष्यवक्ता लगे गोटक सरग दूत के पोटाउआय। जकर्याह आउरी हातार बायले एलिसिबा परबुर आदर करते रेउआत। हाय खुबे डोकरा होई रेउआत। आउरी हातार कोनि बले बेटा ना जनमी रेउआय।

हाय सरग दूत जकर्याह ले बोलला, ”तोर बायले के गोटक बेटा जन्म सी। तुई हातार नाम युहन्ना सोंगाव। परबु ताके पवित्र आत्मा ले भरी देयसी। आउरी युहन्ना लोक मन के मसीह के मानबा काचे तियार करसी। जकर्याह जवाब देला, ”मुई आउरी मोर बायले बेटा जन्माय बा काचे खुबे डोकरा आव! मुई कमता करी जानबी कि तुई मोर संगे सच बोलबी आस?’’

हाय सरग दूत जकर्याह के जवाब देउआय, ’’तोर लगे ए शुभ सन्देश के आनबा काचे मुई परबु बाटले आयली आची। काय काचे कि तुई मोर उपरे विश्वास ना करलीस, एकाचे बच्चा र जनम धरबा तक तुई बोलके ना सकबीस। ’’हड़कीच दाय,जकर्याह बोलके ना सकुआय। तेबे सरग दूत जकर्याह लगले चले जाउ आय। एतार पाचे जकर्याह घरे लेवटी करी आउआय आउरी हातार बायले पेटे हारनी होउआय।

जेबे इलीशिबा छय मासर पेटे रेउआय, तो हाई सरगदूत अचानक ले इलीशिबार लोक बाग ताने प्रगट होउआय, जार नाम मरियम रेउआय। मरियम कुंवारी रेउआय आउरी बिया होयबा काचे युसुफ़ नामर माने संगे हातार मांगनी होई रेउआय। सरगदूत बोलुआय, ’’तुई पेटे हारनी होयबीस आउरी गोटक बेटा के जनम देबिस। तोके हातार नाम यीशु सोंगायबा राय। हाय सर्व शक्तिमान र बेटा होयसी आउरी सदा काचे शासन करसी।’’

मरियम जवाब देउआय, ’’एटा कमता करी होयसी,कायकाचे कि मुई गोटक कुंवारी आय?’’हाय सरग दूत समझाउ आय, ’’पवित्र आत्मा तोर उपरे आयसी, आउरी परबुर सामर्थ तोर उपरे छाया करसी। ए काचे हाय पीला पवित्र होयसी, आउरी हाय परबुर बेटा होयसी।’’जोनटा हाय सरगदूत बोलुआय हातार उपरे मरियम विश्वास करूआय।

एटा होयलार तुरंत पाचे, मरियम जाई करी एलिशिबा ले मिलु आय। जसन मरियम हाके नमस्कार करूआय, एलीशिबार पीला हातार भीतरे उछलू आय। तिकर काचे परबु जोनटा के करी रेउआय हातार बारे ने हाय बायले मन गोटक संगे आनंदित होउ आत। एलीशिबा संगे तीन मास रेलार पाचे, मरियम घरे लेवटुआय।

एतार पाचे एलीशिबा निजर पीला के जनम देउआय। जकर्याह आउरी एलीशिबा हाय पीलार नाम युहन्ना सोंगाउ आत, जसन कि सरग दूत आदेस दि रेउआय। तेबे परबु जकर्याह के बोलबा ने सक्षम करूआय। जकर्याह बोलुआय, ’’परबुर स्तुति हो, काय काचे कि हाय निजर लोक मनर मदद करबाटा के सुरता सोंगाय ला आचे! हे मोर बेटा,तुई सर्वशक्तिमान परबुर भविष्य वक्ता होयबीस। तुई लोक मनके सांगबीस कि हाय मन कमता निजर पाप मन काचे छमा प्राप्त करके सकोत!’’