26. यीशु निजर सेवा के शुरू करूआय

शैतानर परीक्षा मनके मना करला र पाचे, यीशु लेवटी करी गलील ने आउआय। एटा हाई जागा रेउआय जोन ताने हाय रेयते रेउआय। पवित्र आत्मा हाके खुबे सामर्थ देयते रेउआय, आउरी यीशु गोटक जागा ले दूसरा जागा जाईकरी लोक मनके शिक्षा देउआय। सबु लोक मन हातार बारे ने अच्छा बात मन बोलुआत।

पाचे यीशु नासरत नगर ने जाउआय। जेबे हाय पिला रेउआय, तो हाय इ गाँव ने रेबा राय। सब्तर दिने, हाय आराधना करबा जागा ने जाउ आय। अगुआ मन हाके यशायाह भविष्य वक्तार संदेस बीती पुस्तक के देउआत। हाय मन चाहते रेउआत कि हाय हाय थानले पड़ो। अतः यीशु हाय पुस्तक के खोली करी हातार गोटक भाग के लोक मन काचे पड़ला।

यीशु ए परकार ले पड़ला, ’’परबु मोके निजर आत्मा के देला आचे कि मुई कंगाल मनके सुसमाचारर प्रचार करके सकबी। हाय मोके ए काचे पटायला आचे कि मुई कैदी मनके आजाद करबी, काना मनके दखबाटा देबी, जोन मनके दूसरा लोक मन कुचल बा आत हाय मन के छुटकारा देबी। इ बेरा आय, जेबे परबु हामर उपरे दया करसी आउरी हामर मदद करसी।’’

पाचे यीशु बोसला। सबु लोक मन हाके खुबे ध्यान ले दखते रेलाय। हाय मन जानते रेलाय कि पवित्रशास्त्रर जोन भाग के हाय एबे पड़ला हायटा मसीहर बारे ने रेला। यीशु बोलुआय, ’’जोन गोट के एबे मुइ तोमर काचे पड़ली, हायटा बिलकुल एबे घटित होयसी आचे।’’सबु लोक मन चकित होई जाउ आत। हाय मन बोलुआत, ’’काय ए युसूफर बेटा नुआय?’’

तेबे यीशु बोलुआय, ’’एटा सते आय कि लोक मन केबी बले हाय भविष्य वक्ता के ना अपनाउ आत जोन तिकर नगर ने बाड़ी रेउआय। एलिय्याह भविष्य वक्तार बेरा ने, इस्राएल ने खुबे असन विधवा मन रेउआत। मांतर परबु एलिय्याह के इसरायल ताने कोनी विधवार मदद करबा काचे ना पटाउआय। एतार बजाय, हाय एलिय्याह के कोनी दूसरा देसर विधवा लगे पटाउआय।’’

यीशु बोलबाटा जारी सोंगाउ आय, ’’आउरी एलिशा भविष्य वक्तार बेरा ने, इस्राएल ताने खुबे लोक मन चमड़ीर रोग ले पीड़ित रेलाय। मांतर एलिशा हाय मन थानले काकी बले चंगा ना करूआय। हाय केवल इस्राएलर दुसमनर सेनापति नामान के चंगा करूआय।’’मांतरजोन लोक मन यीशु के सुनते रेलाय हाय मन यहूदी रेलाय। एकाचे जेबे हाय मन हाके एटा बोलबा दाय सुनुआत तो हाय मन हातार उपरे रिसा होउ आत।

नासरतर लोक मन यीशु के धरुआत आउरी हाके आराधनर जागा ले ओड़गोड़ी करी बाहरे नेउआत। आउरी हाय मन हाके गोटक पोकनार टीपे नेउआत, ताकि हाके हाय थानले घसराय करी मारी देओत। मांतरयीशु भीड़ थानले चले जाउ आय आउरी नासरत नगर के छाड़ी करी चले जाउ आय।

पाचे यीशु सबु गलीलर जागा ने जाउ आय, आउरी बड़े भीड़ हातार लगे आउआय। हाय मन अमता खुबे लोक मन के आनुआत जोन मन बीमार आउरी विकलांग रेउआत। हाय मन थानले खिनिक काना रेउआत, आउरी खिनिक दूसरा खोड़या, भोयरा या गूंगा रेउआत।

एतार अलावा, असन खुबे लोक मनके यीशु लगे आनुआत जोन मनके दुष्टआत्मा मन दरी रेउआत। यीशु दुष्टआत्मा मनके तिकर थानले निकली जीबा काचे आदेस देउआय आउरी हाय मन निकलू आत। हाय दुष्टआत्मा मन अक्सर किरकिरु आत, ’’तुई परबुर बेटा आस! ’’भीड़र लोक मन चकित रेउआत, आउरी हाय मन परबुर स्तुति करूआत।

पाचे यीशु बारा माने मनके चुनु आय जाके हाय प्रेरित बोलुआय। ए प्रेरित मन हातार संगे यात्रा करूआत आउरी हातार ले शिक्षा पाउ आत।