30. यीशुर पांच हजार लोक के खाना खुआउ आय

यीशु निजर प्रेरित मनके प्रचार करबा काचे आउरी लोक मनके शिक्षा देबा काचे खुबे असन अलग – अलग गाँव ताने पटाउआय। जेबे हाय मन लेवटु आत जोन लगे यीशु रेउआय तो हाय मन हाके सांगूआत कि हाय मन काय करी रेउआत। तेबे यीशु हाय मनके झीलर दूसरा बाटे तार संगे गोटक शांत जागा ने जाई करी खिनिक बेरा आराम करबा काचे हाग देउआय। अतः हाय मन गोटक डोंगा ताने चेगुआत आउरी झीलर दूसरा बाटे चले जाउ आत।

मांतर हाय ताने खुबे लोक मन रेउआत जोन मन यीशु के आउरी हातार चेला मनके डोंगा ताने जीबा दाय दखी रेउआत। एटा जानी करी लोक मन बले झीलर दूसरा बाटे जीबा काचे झीलर रेटे–रेटे पोराउ आत आउरी हाय मन ले पोयले जाई करी खेटु आत। अतः जेबे यीशु आउरी हातार चेला मन खेटुआत तो इ लोक मनर गोटक बड़े समूह तीके पोयलेले हाय लगे टाकी रेउआत।

हाय भीड़ ने बायले आउरी बच्चा मनर गिनतीर बिना 5,000 ले खुबे माने मन रेउआत। यीशु हाय लोक मन उपरे खुबे तरस खाउ आय। यीशु काचे हाय लोगो मन हाय मेंडा मन जसन रेउआत जार कोनी धोरी ना रेउआत। एकाचे हाय तीके शिक्षा देउआय आउरी तिकर बीच ताने जोन मन बीमार रेउआत हाय मनके चंगा करूआय।

दिनर सरबा दाय, चेला मन यीशु के बोलुआत, ’’एबे देर होई गला आचे आउरी आसपास ने कोनी नगर बले निआय। ए लोक मनके विदा कर कि ए मन जाई करी खायबा काचे काई टा धरोत।’’

मांतरयीशु चेला मनके बोलुआय, ’’तोमी हाय मनके खायबा काचे काई टा दियास! ’’हाय मन जवाब देउआत,’’ हामी अमता ना करके सकबु? हामर लगे केवल पांचटा रोटी आउरी दुई ठन मछली आचे।’’

यीशु निजर चेला मनके बोलुआय कि हाय मन भीड़र लोक मनके चारा ताने पचास – पचासर रुंडा ताने बोसबा काचे बोलोत।

तेबे यीशु पांच रोटी आउरी दुई मछली के दरी करी सरग बाटे दखुआय, आउरी हाय भोजन काचे परबु के धनेवाद देउआय।

आउरी यीशु रोटी मनके टुटाय-टुटाय करी चेला मनके देयते जाउआय की हाय मन लोक मनके बांटोत, आउरी हाय दुई ठन मछली मन के बले हाय सबु ने बांटी देउआय। हाय लोक मनके देबा काचे निजर चेला मनके हाय गोंदा मनके देउआय। चेला मन हाय भोजन के बाटते रेउआत, आउरी हायटा केबी ना सरूआय! हाय लोक मन खाई करी तृप्त होई जाउआत।

एतार पाचे, चेला मन भोजन के रुंडा करूआत जाके ना खायी रेउआत आउरी हाय गोंदा ले भोरी होयला बारा टुकना के उठाउआत! हाय सबु भोजन हाय पांच रोटी आउरी दुई मछली ले आई रेउआय।