39. यीशुर उपरे मुक्द्दमा चलु आय

एबे एटा मजी रातीर बेरा रेउआय। हाय सैनिक मन यीशु के महायाजकर घरे नेउ आत, कायकाचे कि हाय मन यीशु ले सवाल करबार चाहते रहुआत। पतरस दूर ले तिकर पीछा करते रेउआय। जेबे सैनिक मन यीशु के घरे नेउ आत, तो पतरस बाहरे ठेबीकरी खुद के जोय ले गरम करते रहुआय।

घर भीतरे, यहूदी आगुआ मन यीशु उपरे मुकदमा चलाउ आत। हाय मन हातार विरूध ने झुटा बात मनके बोलबा काचे खुबे झुटा गवाह मन के दरी करी आनुआत। हालंकि, तिकर गोट एक दूसरा ले सहमत ना रेउआय, ए काचे यहूदी आगुआ मन ए साबित करके ना सकू आत कि हाय कोनी गोट ने दोसी आचे। यीशु काई ना बोलुआय।

आखरी ने महायाजक सीधा यीशु बातटे दखी करी बोलुआय, ’’हामके सांग कि काय तुई जीवित परबुर बेटा मसीह आस?’’

यीशु बोलुआय, ’’मुई आय,आउरी तोमी मोके परबु संगे बोसला दाय आउरी सरग ले आयबा दाय बले दखबास।’’महायाजक निजर फोटी के फाड़ला कायकाचे कि यीशु बोली रेउआय हाय हाय बात ने रिसा होई जाई रेउआय। हाय दुसरा अगुआ उपरे चिल्लाउ आय, ’’हांमके ए सांग बा काचे आउरी गवाहर जरुरत निआय कि ए माने काय करला आचे! तोमी खुद हाके ए बोलबा दाय सुनलास कि हाय परबुर बेटा आय। हातार बारे ने तोमर काय निर्णय आय?’’

सबु यहूदी अगुआ मन महायाजक के जवाब देउआत, ’’हाय मोरबार लायक आचे!’’ तेबे हाय मन यीशुर आंखी ताने फोटी के बंधी देउआत, हातार उपरे थुकू आत, हाके मारूआत, आउरी हातार मजाक उड़ाउ आत

आउरी पतरस, जेबे घरर बाहरे टाकी रेउआय। तेबे गोटक दासी टोकी हाके दखुआय। हाय हाके बोलुआय, ’’तुई बले तो यीशु संगे रेबा राय!’’ पतरस मना करी देउआय। पाचे, कोनी दूसरा टोकी ए बात के बोलुआय, आउरी पतरस फिर ले मना करी देउआय। आखरी ने खिनिक मा लोक मन बोलुआत, ’’हामी जानू कि तुई यीशुर संगे रेलीस काय काचे कि तोमी दुनो गालीलर आस।’’

तेबे पतरस बोलुआय, ’’यदि मुई ए माने के जानी आले परबु मोके श्राप दो!’’हड़कीच दाय पतरसर ए तरह ले कीरया खायलार पाचे, गोटक कुकड़ा डाकू आय। यीशु पीटी बाटे मुड़ी करी पतरस के दखुआय।

पतरस हाय थानले चले जाउ आय आउरी खुबे कांदु आय। हाई बेरा, यीशु के धारयबा बीता यहूदा दखु आय कि यहूदी अगुआ मन यीशु के मृत्यु दंड देला आचेत। यहुदा खुबे दुखी होउ आय आउरी जाई करी खुद के मारी देउआय।

एबे हाय देसर राज्यपाल पिलातुस रेउआय। हाय रोम काचे काम करते रेउआय। यहूदी अगुआ मन यीशु के हातार लगे दरी करी आनुआत। हाय मन चाहते रेउआत कि पिलातुस हाके मृत्यु दंड दो होरी हाके मारी दो। तेबे पिलातुस यीशु के पचारू आय, ’’काय तुई यहूदी मनर राजा आस?’’

यीशु जवाब देउआय, ’’तुई सही बोललीस। मांतरमोर राज ए पृथ्वीर नूआय। अगर होयता तो मोर दास मन मोर काचे युद्ध करताय। मुई पृथ्वी ने परबुर बारे ने सच सांगके आसली आची। सबु लोक मन जोन मन सच ले मया करूआत हाय मन मोर सुनुआत।’’पिलातुस हाके बोलुआय तो सच काय आय?’’

यीशु संगे गोटायलार पाचे, पिलातुस बाहरे भीड़ लगे जाई करी बोलुआय, ’’मुई असन कोनी कारण ना पायबी आची कि ए माने मारी देबार लायक आचे।’’मांतरयहूदी अगुआ मन आउरी भीड़ चिल्लाय करी बोल्लुआत, ’’हाके क्रुशू ने चेगाय दियास!’’पिलातुस जवाब देउआय,’हाय कई बले करबार दोसी नुआय। ’’मांतरहाय मन आउरी ऊँचा आवाज ले चिल्लाय के मुराउआत। तेबे पिलातुस तीसरी बार बोलुआय, ’’हाय दोसी नुआय!’’

पिलातुस डरी जाउ आय कि हाय भीड़ दंगा शुरु करी देयसी, एकाचे हाय निजर सैनिक मनर द्वारा यीशु के क्रुश ने चेगाय बा काचे मानु आय। रोमी सैनिक मन यीशु के कोड़ा मारुआत आउरी हाके राजसी फोटी पिन्दाउआत, आउरी हातार मुड़ी ताने कांटा ले बनला बीती मुकुट के सोंगाउ आत। तेबे हाय मन ए बोली करी हातार मजाक उड़ाय के मुराउ आत,’’दखा यहूदी मनर राजा!’’