40. यीशु के क्रुश ने चेगाउ आत

यीशुर मजाक उड़ाय लार पाचे,सैनिक मन हाके क्रूश ने चेगायबा काचे नेउआत। हाय मन हाय क्रूश के हाकिची उठाउआत जोन ताने हाय मोरु आय।

हाय सैनिक मन यीशु के हाय जागा ने आनु आत जोन टा, ’’खोपड़ी’’ बोलाय होउआय आउरी हातार हाथ आउरी गोड़ मनके क्रूश ताने ठोकी देउआत। मांतर यीशु बोलुआय, ’’हे बुआ ए मन के छमा कर, काय काचे कि ए मन ना जानेत कि काय करबा आत।’’हाय मन गोटक तख्ती बले हातार मुंडी उपरे टांगी देउआत। हाय ताने लिखी रेउआय, ”यहूदी मनर राजा।” पिलातुस हाय मनके ईटा लिखबा काचे बोली रेउआय।

तेबे सैनिक मन यीशुर फोटी काचे चिट डालुआत। जेबे हाय मन अमता करूआत तो हाय मन हाय भविष्यवाणी के पूरा करूआत जोन ताने बोली रेउआय, ’’हाय मन मोर फोटी के आपस ने बाटी देलाय, आउरी मोर फोटी काचे चिट डाललाय।’’

हाय ताने दुई ठन डाकू मन बले रेउआत, जाके सैनिक मन हाई बेरा क्रूश ने चेगाय रेउआत। हाय मन तीके यीशुर दुनो बाटे सोंगाउ आत। हाय थानले गोटक डाकू यीशुर मजाक उड़ाउ आय, मांतर दूसरा बोलुआय, ’’काय तुई ना डरिस कि परबु तोके दंड देयसी? हामी तो खुबे असन बुरा काम के करी दोषी ठहराया गलू आचू, मांतरए माने निर्दोस आय।’’फिर हाय यीशु के बोलुआय, ’’जेबे तुई तोर राज्य ने आयबीस तो कृपया करी मोके सुरता सोंगाव।’’यीशु जवाब देउआय, ’’आजीच तुई मोर संगे सरग लोक ने होयबीस।’’

यहूदी आगुआ मन आउरी भीड़र दूसरा लोक मन यीशुर मजाक उड़ाउ आत। हाय मन हाके बोलुआत, ’’अगर तुई परबुर बेटा आस, तो क्रूश ले तले उतरी आव आउरी खुद के बाचाव! तेबे हामी तोर उपरे विश्वास करबू।’’

तेबे हाय सबु देस ने बादरी पूरा तरह ले करिया होई जाउ आय, भले ही हाय दिनर मजिगतार बेरा रेउआय। एटा पेज बेरा समय ने करिया होई रेउआय आउरी तीन घंटा तक अमतीच रेउआय।

तेबे यीशु हागदी करी बोलुआय, ’’पूरा होयला! हे पिता मुई मोर आत्मा तोर हाथ ने देबी आची।’’तेबे हाय अपना मुड़ी के झुकाउ आय आउरी निजर प्राण के त्यागी देउआय। जेबे हाय मोरू आय तो गोटक भूकम्प आउआय। हाय परदा फाटी जाउ आय जोन ता परबुर उपस्थिति ले लोक मनके अलग करबाराय उपर ले तले बाटे फाटी करी दुई गोंदा होई जाउ आय।

निजर मृत्युर दवारा, यीशु लोक मन काचे परबु लगे आयबा काचे बाट के खोली देउआय। जेबे यीशुर निगरानी करबा बीता गोटक सैनिक जोन बले होई रेउआय ए सबु के दखु आय तो हाय बोलुआय,’’निश्चित रूप ले ए माने निर्दाश रे। ए परबुर बेटा रेला।’’

तेबे युसुफ़ आउरी निकुदेमुस नामर दुई ठन यहूदी अगुआ मन आउ आत। हाय मन विस्वास करते रेउआत कि यीशु ही मसीह आय। हाय मन पिलातुस ले यीशुर गागर के मंगू आत। हाय मन हातार गागर के फोटी ले गुड़ाउआत। तेबे हाय मन हाके गोटक पोकना थानले काटी करी बनाय ला काबर ने नेउआत आउरी हातार भीतरे सोंगाउ आत। तेबे हाय मन हाय कबरर दुआर के बंद करबा काचे गोटक बड़े पोकना के लुड़काय देउआत।