41. परबु यीशु के मोर ला थानले जीयाउ आय

सैनिक मन द्वारा यीशु के क्रूश ने चेगाय लार पाचे, यहूदी अगुआ मन पिलातुस के बोलुआत, ’’हाय झुटा, यीशु बोली रेला कि हाय तिन दिनर पाचे मोरला थानले जी उठसी। काकी बले ए निश्चित करबा काचे कबरर निगरानी करके पड़सी कि हातार चेला मन हातार गागर के चोरी करी ना नेओत। अगर हाय मन अमता करबाय तो हाय मन बोलबाय कि हाय मोरला थानले जी उठला आचे।’’

पिलातुस बोलुआय, ’’खिनिक मा सैनिक मन के निया आउरी जसन तोमी करके सकास अमति कबरर निगरानी करा।’’एकाचे हाय में कबरर ओलाबा बीती दुआरर पोकना ताने गोटक मोहर के लगाय देउआत। हाय मन ए निश्चित करबा काचे हाय ताने सैनिक मन के बोसाय बले देउआत कि कोनी बले हातार गागर के ना चोरके सकोत।

यीशुर मोरबा दिन सब्तर दिन रेउआय। कोनी बले सब्तर दिन ने काम करके ना सकते रेउआत, एकाचे यीशु र मित्र मन थानले कोनी बले कबर ने ना आयी रेउआत। मांतरसब्तर पाचेर दिने, सकारपार, खिनिक मा बायले मन यीशुर कबर ने जीबा काचे तिआर होउआत। हाय मन हातार गागर ने आउरी बले मसाला मनके लागाय बार चाहते रेउआत।

हाय बायले मनर खेटबार पयले, कबर ने गोटक बड़े भुकंप होउ आय। सरग ले गोटक सरग दूत आई करी हाय पोकन के लुड़काय देउआय जोन कबरर ओल्बा बीती दुआर के ढाकी रेउआय आउरी हाय हाय ताने बोसू आय। ए सरग दूत उजर जसन चमक ते रहुआय कबर ताने जोन सैनिक मन रहुआत हाय मन हाके दखुआत। हाय मन अतक डरी जाउ आत कि मोरला लोक जसन भुई ताने घसरी जाउ आत।

जेबे हाय बायले मन कबर ताने खेटुआत तो हाय सरग दूत हाय मनके बोलुआय, ’’ना डरा। यीशु ए ताने नीआय। हाय मोरला थानले जी उठला आचे, जसन कि हाय बोली रेला कि हाय जी उठ्सी! कबर ने डगरा आउरी दखा।’’हाय बायले मन कबरर भीतरे आउरी जोन ताने यीशुर गागर के सोंगाय रेउआत हाय ताने डगराउ आत आउरी दखुआत कि हातार गागर हाय ताने ना रेउआय!

तेबे सरग दूत हाय बायले मनके बोलुआय, ’’जाई करी चेला मनके सांगा, ’यीशु मोरला थानले जी उठला आचे आउरी हाय तोमर छोमे – छोमे गलील ने जायसी।’’’

हाय बायले मन अचंभित होउ आत आउरी खुबे हरिक होउ आत। हाय मन चेला मनके ए शुभ संदेस के सुनाय बा काचे पोराउआत।

जेबे हाय बायले मन चेला मन के ए शुभ संदेस के सांगबा काचे बाटे रेउआत, तो यीशु हाय मनके दखा देउआय। हाय मन हातार गोड ताने घसरु आत। तेबे यीशु बोलुआय, ’’ना डरा। जाई करी चेला मनके गलील ने जीबा काचे बोला। हाय मन मोके हाय ताने दखबाय।