42. यीशु सरग ने लेवटु आय

जोन दिने परबु यीशु के मोरला थानले जिन्दा करी रेउआय, हातार दुई ठन चेला मन लगर गोटक गाँव ने जायते रेउआत। हिंडबा दाय जोन टा यीशु संगे होई रेउआय। हातार बारे ने गोटाय रे रेउआत, हाय मनके आशा रेउआय कि हाय मसीह रेला, मांतरतेबले बले हाय मार डाला गला। अबर हाय बायले मन बोलबा आत कि हाय फिर ले जी उठला आचे। हाय मन ना जानते रहुआत कि काय गोट ने विस्वास करबा राय।

यीशु हाय मन लगे आई करी तिकर संगे हिंडबार शुरू करला, मांतर हाय मन हाके ना चिताय लाय। हाय पचारू आय कि हाय मन काय बारे ने गोटाय ते रेलाय। हाय मन हाके पिछला दिनर यीशु संगे होयला बीती सबु घटना के सांग लाय। हाय मन बिचारेला य कि हाय मन कोनि अलग माने संगे गोटाय ते रेलाय जोन ना जानते रे कि यरूशलेम ने काय होई रेला।

तेबे यीशु हाय मन के समझाउ आय कि परबुर वचन मसीहर बारे ने काय बोलसी आचे। खुबे पयले, भविष्य वक्ता मन बोली रेलाय कि बुरा लोक मन मसीह के दुःख देबाय आउरी मारी देबाय। मांतरभविष्य वक्ता मन ए बले बोली रेलाय कि हाय तीसर दिन ने जी उठसी।

जेबे हाय मन हाय नगर ने खेटु आत जोन ताने हाय दुई झन मन ठेबते रेउआत, तेबे तक लगभग संज होई रेउआय। हाय मन यीशु के तिकर संगे ठेबबा काचे हागदेउआत,अतः हाय तिकर संगे गोटक घरे जाउ आय। निजर संज बेरार भात खायबा काचे हाय मन बोसूआत। यीशु गोटक रोटी के दरी करी हातार काचे परबुर धनेवाद करूआय, आउरी पाचे हाके टुटाउ आय। अचानक ले हाय मन जानूआत कि हाय यीशु आय। मांतरहड़कीच दाय, हाय तिकर आँकी छोमले गायब होई जाउ आय।

हाय दुई झन मन एक दूसरा के बोलुआत, ’’हाय यीशु रेला! एकाचे जेबे हाय हामके परबुर वचन के समझाय रे तो हामी खुबे हरिक रु!’’हड़कीच दाय हाय मन निकली करी वापस यरूशलेम ने जाउ आत। जेबे हाय मन खेटु आत तो हाय मन चेला मनके सांगूआत, ’’यीशु जिन्दा आचे! हामी हाके दखलु आचु!’’

जेबे चेला मन बोलते रेउआत, तो अचानक ले हाय बाकरा ताने यीशु मसीह तिकर संगे दखा देउआय। हाय बोलुआय, ’’तोमके शांति मिलो!’’चेला मन सोचुआत कि हाय कोनी भुत आय, मांतर यीशु बोलुआय, ’’तोमी काय काचे डरबा आस? तोमी एटा काय काचे ना सोचास कि एटा सचमुच ने मुई आय, यीशु आय? मोर हाथ आउरी गोड़ के दखा भुत मन लगे अमता गागर ना रेउआय जसन मोर लगे आचे।’’ए दखायबा काचे कि हाय कोनी भुत नुआय, तो हाय खायबा काचे काई मांगू आय। हाय मन हाके माचर गोंदा देउआत, आउरी हाय हाके खाउ आय।

यीशु बोलुआय, ’’मोर बारे ने परबुर वचन जोन टा बले बोलुआय हाय होयसी। मुई तोमके सांगीरी कि एतार होयबा टा जरुरी आय।’’तबे यीशु हाय मनके परबुर वचन के अच्छा ले समझाउ आय। हाय बोलुआय, ’’खुबे पोयले भविष्यवक्ता मन लिखी रेलाय कि मुई मसीह के दुःख उठाय के पड़सी, मोरके पड़सी आउरी पाचे तीसरा दिन ने मोरला थानले जी उठ के पड़सी।’’

‘’हाय भविष्य वक्ता मन ए बले लीखी रेलाय कि मोर चेला मन परबुर वचनर घोषणा करबाय। हाय मन सबु के पश्चाताप करबा काचे सांगबाय। यदी हाय मन अमता करबाय तो परबु तिकर पाप के छमा करसी। मोर चेला मन ए समाचार के प्रचार करबा टा यरूशलेम ले शुरु करबाय। तेबे हाय मन सबु जागा सबु जाती मन ताने जिबाय। तोमी लोक मन सबु बात आउरी कामर गवाह आस जोन टा के मुई करी रेली, आउरी हाय सबुर बले जोन टा मोर संगे होयला।’’

अगला चालीस दिनर पाचे, यीशु निजर चेला मनके कई बार दखा देउआय। गोटक हार तो हाय गोटकी बेरा ने 500 ले खुबे झन के दखा देउआय! हाय निजर चेला मनके कई तरीका ले साबित करूआय कि हाय जिन्दा आचे, आउरी हाय तीके परबुर बारे ने शिक्षा देउआय।

यीशु निजर चेला मनके बोलुआय, ’’परबु मोके सरग आउरी पृथ्वीर सबु लोक उपरे शासन करबार अधिकार देला आचे। एकाचे अबर मुई तोमके बोलबी आची कि : जाईकरी सबु जातीर लोक मनके चेला बना। अमता करबा काचे, तोमके हाय मनके बुआ, बेटा आउरी पवित्र आत्मार नाम ले बपतिस्मा देयके पड़सी। जोन बले मुई तोमके आज्ञा देबी आची हाय सबु गोट मनके मानाबाटा बले तोमके हाय मन के सिखाय के पड़सी। सुरता सोंगा, मुई सबु दाय तोमर संगे रेबी।’’

यीशु मोरला थानले जी उठलार चालीस दिनर पाचे, हाय निजर चेला मनके बोलुआय, ’’जेबले मोर बुआ तोमके सामर्थ ना दे तेबे तक यरुशलेम ने ठेबी रा। हाय तोमर उपरे पवित्र आत्मा के पटायबार द्वारा असन करसी।’’तेबे यीशु सरग ने चले जाउ आय, आउरी गोटक बादरी हाके तिकर दखबा थानले लुकाय देउआय। सरग ने यीशु सबु चिज उपरे शासन करबा काचे परबुर बुजनी हाथ बाटे बोसूआय।