43. कलीसियार शुरु होउआय

यीशु सरग ने लेवटलार पाचे, चेला मन यरूशलेम ने ठेबलाय जसन कि यीशु हाय मन के करबा काचे आदेस दि रेला। हाय थानर विश्वासी लोक मन लगातार गोटक संगे पारतना करबा काचे रुंडा होयते रेलाय।

सबु बोरस, फसहर परब के 50 दिनर पाचे, यहूदी लोक मन पिन्तेकुस्त नामर गोटक जरुरी दिन के बनायते रेउआत। पिन्तेकुस्त हाय बेरा रेउआय जेबे यहूदी लोक मन गेंहूर कटाई के बनाय ते रेलाय। सबु संसारर यहूदी लोक मन पिन्तेकुस्तर दिन के गोटक संगे बनायबा काचे यरूशलेम ने आई रेलाय। ए बरस, पिन्तेकुस्त बनायबार बेरा यीशर सरग ने गलार लगभग गोटक सपतार पाचे आउआय।

जोन बेरा सबु विश्वासी मन गोटक लगे रुंडा होई रेलाय, तो जोन घर ने हाय मन रेउआत अचानक ले हाय जोर लर हवा चलबार आवाज ले भोरी जाउ आय। तेबे जोय असन दखबा बीती काय आले सबु विश्वासीर मुंडी उपरे दखा देउआय। हाय मन सबु पवित्र आत्मा ले भोरी जाउआत आउरी दूसरा भासा मन ताने परबुर स्तुति करूआत। एटा हाय भासा मन रेउआय जोन टा के बोलबा काचे तीके पवित्र आत्मा सक्षम करूआय।

जेबे यरूशलेम ने रेबा बीती लोक मन हाय कोलार के सुनुआ, तो हाय मन भीड़ होई करी ए दखके आउ आत कि काय होयते रेला। हाय मन विश्वासी मन के परबुर करला बीती बड़े – बड़े कामर घोषणा करबादाय सुनुआत। हाय मन चोकि जाई रेउआत काय काचे कि हाय मन हाय काम मनके के निजर भासा के सुनते रेउआत।

एथानले खिनिक मा लोक मन बोलुआत कि हाय चेला मन नसा ने आचेत। मांतर पतरस ठीआ उठू आय आउरी आय मनके बोलुआय, ’’मोर गोट के सुना! हाय मन नसा ने नियात! एतार बजाय, जोन टा तोमी दखु आस कि एटा हाई टा आय जोन टा के योएल भाविस्यवक्ता बोली रे कि होयसी : परबु बोलला कि अंतर दिन ने, मुई निजर आत्मा के उलद बी।’’

‘’हे इसरायली माने मन, यीशु गोटक अमता माने रेला जोन ए दखायबा काचे कि हाय कोन रे खुबे असन अनोखा काम मनके करी रेला। हाय परबुर समर्थ ले खुबे असन अद्भुत काम मनके करी रेला। तोमी ए जानास, काय काचे कि तोमी ए काम मनके दखला आस। मांतरतोमी हाके क्रूश ने चेगाय देलास !’’

‘’ यीशु मोरी गला मांतरपरबु हाके हाय मोरला थानले जिन्दा करी देला। ए हाय गोट के पूरा करी देला जाके गोटक भविष्यवक्ता लिखी रेला:’ तुई निजर पवित्र झन के कबर ने सड़के ना दिस।’ हामी गवाह आव कि परबु यीशु कि फीर ले जिन्दा करी देला।’’

‘’परबु पिता अबर यीशु के निजर बुजनी बाटे बोसाय करी हाके आदर देला आचे। आउरी यीशु हामर काचे पवित्र आत्मा के पटायला आचे जसन हाय किरया करी रेला हाय पोटायसी। पवित्र आत्मा ही हाय काम मनके होयके देयसी आचे जोन टा के तोमी दखबा आस आउरी सुनबा आस।’’

‘’ तोमी हाय माने, यीशु के क्रूश ने चेगाय देलास। मांतरनिश्चित रुप ले जाना कि परबु यीशु के सबु उपरे परभू आउरी मसीह दुनो ठहरायला आचे!’’

पतरस सुनबा लोक मन हातार बोलला बीती गोट ले भीतरे तक हाली जाई रेलाय। एकाचे हाय मन पतरस आउरी चेला मनके पचारू आत, ’’हे भाई मन, हामके काय करबार चाहिए?’’

पतरस हाय मनके जवाब देउआय, ’’तोमी मन थानले सबु निजर पाप मन काचे पश्चाताप करा ताकि परबु तोमोर पाप के छमा करो, आउरी यीशु मसीहर नाम ले बपतिस्मा धरा। तेबे हाय तोमके वरदानर रुप ने पवित्र आत्मा बले देयसी।’’

पतरस बोलुआय हातार उपरे लगभग 3,000 लोक मन विस्वास करूआत आउरी यीशुर चेला बनूआत। हाय मन बपतिस्मा धरुआत आउरी यरूशलेमर कलिस्यार हीस्सा बनी जाउ आत।

जेबे प्रेरित मन हाय मनके शिक्षा देउआत तो विश्वासी मन लगातार सुनुआत। हाय मन लगातार मिलते रहुआत आउरी गोटक संगे भात खायते रेउआत, आउरी हाय मन अक्सर एक दूसरा काचे पारतना करूआत। हाय मन मीली करी परबुर स्तुति करूआत आउरी जोन टा बाले तिकर लगे रेउआय हाय मन एक दूसरा संगे बाटा करूआत। नगरर सबु माने मन तिकर काचे अच्छा विचार सोंगायते रेलाय। सबु दिना, खुबे ले खुबे लोक मन विश्वासी बनते गलाय।