45. स्तिफनुस आउरी फिलिप्पुस

पयला मसीह अगुआ मनर मजी गता स्तिफनुस मानर गोटक माने रेउआय। सबु लोक मन हातार आदर करबाराय। पवित्र आत्मा हाके खुबे सामर्थ आउरी बुद्धि दि रेउआय। स्तिफनुस खुबे चमत्कार करी रेउआय। जेबे हाय यीशु उपरे भरोसा करबार बारे ने तिके शिक्षा देयते रेउआय तो खुबे असन लोक मन हातार उपरे विस्वास करूआत।

गोटक दिने, स्तिफनुस यीशुर बारे ने शिक्षा देयते रेउआय, आउरी खिनिक मा अमता यहूदी मन आउआत जोन मन यीशु उपरे विस्वास ना करी रेउआत आउरी हातार संगे वाद – विवाद करबा टा शुरु करी देउआत। हाय मन खुबे रिसा होई जाउ आत, एकाचे हाय मन धार्मिक अगुआ मन लगे जाउ आत आउरी हातार बारे ने झूट बोलुआत। हाय मन बोलुआत, ’’हामी स्तिफनुस के मूसा आउरी परबुर बारे ने बुरा गोट के बोलबा दाय सुनलु आचू!’’ एकाचे धार्मिक अगुआ मन स्तिफनुस के गिरफ्तार करूआत आउरी हाके महायाजक आउरी यहूदीर दूसरा अगुआ मनर छोमे दरीकरी आनुआत। आउरी बले झूटे गवाह मन आउ आत आउरी हाय मन स्तिफनुसर बारे ने झूट बोलुआत।

महायाजक स्तिफनुस के पचारू आय, ’’काय ए लोक मन तोर बारे ने सच बोलबा आत?’’स्तिफनुस महायाहक के जवाब देबा काचे खुबे असन गोट मनके बोलबा टा शुरू करी देउआय। हाय बोलुआय कि अब्राहमर बेराले यीशु मसीह बेरा तक परबु इसरायली लोक मन काचे खुबे असन अनोखा काम मनके करला। मांतरसबु बरा लोक मन परबुर आज्ञा के ना मानलाय। स्तिफनुस बोलुआय, ’’तोमी लोक मन परबुर विरुद्ध ने हठीला आउरी बलवा करबा लोक आस। तोमी सबु हार पवित्र आत्मा के अस्वीकार करलास, जसन कि हामर पूर्वज मन सबु हार पवित्र आत्मा के अस्वीकार करी रेलाय आउरी सबु हार हातार भविष्य वक्ता मन के मारी रेलाय। मांतरजोन टा हाय मन करी रेलाय हातार तुलना ने तोमी आउरी बले बुरा करला आस! तोमी मसीह के मारी देलास!’’

जेबे हाय धार्मिक अगुआ मन एटा के सुनुआत, तो हाय मन अतक रिसा होई जाउ आत कि हाय मन निजर कान मनके बंद करी देउआत आउरी जोर ले किरकिरु आत। हाय मन स्तिफनुस के ओड़गोड़ी करी नगर ले बाहरे नेउआत आउरी हाके मारबा काचे पोकना मारूआत।

जेबे स्तिफनुस मोरते रेउआय, हाय हाग देउआय, ’’हे यीशु, मोर आत्मा के ग्रहण कर! तेबे हाय मांडी खुटा देउआय आउरी फिर ले हाग देउआय, ’’हे परबु ए पाप के तिकर उपरे ना लगाव।’’ तेबे हाय मोरी जाउ आय।

हाय दिने, यरूशलेम ने रेबा खुबे लोक मन यीशुर अनुआयी मनके सतायबा टा शुरू करूआत, एकाचे विश्वासी लोक मन दूसरा जागा ने पोराउ आत। मांतर एतार बावजूद बले, जोन ताने बले हाय मन जाउ आत हाय ताने यीशुर बारे ने प्रचार करूआत।

फिलिप्पुस नामर गोटक विश्वासी रेउआय। जसन कि खुबे दूसरा विश्वासी मन करी रेउआत हाय बले यरूशलेम ले पोरारु आय। हाय सामरियार जागा ने जाउ आय। हाय ताने हाय लोक मनके यीशुर बारे ने सांगुआय। खुबे असन लोक मन हातार उपरे विश्वास करूआत आउरी उद्धार पाउआत। गोटक दिने, फिलिप्पुस लगे परबु बाटले गोटक सरगदूत आउ आय आउरी हाके झारे जिबा काचे, आउरी बाटे हिंडबा काचे बोलुआय। फिलिप्पुस हाय ताने चले जाउ आय। जेबे हाय बाट ने हिंडते रेउआय, तो हाय गोटक माने के निजर रथ ने जीबा दाय दखुआय। हाय माने कूश देसर गोटक महत्वपूर्ण अधिकारी रेउआय। पवित्र आत्मा फिलिप्पुस के बोलुआय कि जाई करी हाय मानेर संगे – संगे हिंड।

एकाचे फिलिप्पुस रथ लगे जाउ आय। हाय सुनुआय कि हाय कूशी परबुर वचन के पड़सी आचे। जोन टा के यशायाह भविष्यवक्ता लिखी रेला हाय हाके पड़ते रेला। हाय पड़ते रेला, ’’हाय मन हाके वध करबा मेंडा असन नेलाय, आउरी गोटक मेमना जसन शांत रेउआय, हाय बले गोटक शब्द ना बोलुआय। हाय मन हातार संगे अनुचित व्यवहार करूआत आउरी हातार आदर ना करूआत। हाय मन हातार जीव के धरुआत।’’

फिलिप्पुस हाय कूशी के पचारू आय, ’’जोन टा के तुई पड़बी आस काय तुई हाके समझबी आस?’’ हाय कूशी जवाब देउआय, ’’नाई। जेबे तक कोनी मोके ना समझाएत, तेबे तक मुई एके ना समझ के सकी। किरपा करी मोर लगे आई करी बोस। यशायाह एटा निजर बारे ने लिखते रे कि कोनी दूसरार बारे ने?’’

फिलिप्पुस रथ ने चेगी करी बोसुआय। तेबे हाय हाय कूशी माने के हायटा के सांगू आय जोन टा के यशायाह यीशुर बारे ने लिखी रेला। फिलिप्पुस परबुर वचनर खुबे असन दूसरा भागर बले चर्चा करूआय। ए तरह ले, हाय हाय माने के यीशुर बारे ने शुभ संदेस सुनाउ आय।

फिलिप्पुस आउरी हाय कूशी माने हिंडी करी पानी लगे आउ आत। हाय कूशी बोलुआय, ’’दख! एलगे पानी आचे! काय मुई एलगे बपतिस्मा धरके के सकी?’’ आउरी हाय सारथी के रथ के ठेबाय के बोलुआय।

अतः हाय मन पानी ने जाउ आत, आउरी फिलिप्पुस हाय कूशी माने के बपतिस्मा देउआय। जेबे हाय मन पानी ले बाहरे आउ आत, तो पवित्र आत्मा अचानक ले फिलिप्पुस के उठाय करी कोनी दूसरा जागा ने नेउआय। हाय ताने फिलिप्पुस यीशुर बारे ने सांगबा टा जारी सोंगाउ आय।

हाय कूशी निजर घरर सफ़र ने आगे बड़ ला। हाय हरिक रेउआय कि हाय अबर यीशु के जानते रेउआय।