49. परबुर नुआ वाचा

गोटक सरगदूत जूआन बायले मरीयम ले बोलुआय कि हाय परबुर बेटा के जनम देयसी। हाय ऐबे कुआरी रेउआय, मांतर पवित्र आत्मा हातार लगे आउआय आउरी आय पेटे हारनी होउ आय। हाय गोटक बेटा के जनम देउआय जार नाम हाय यीशु सोंगाउ आय। एकाचे, यीशु परबु आउरी माने दुनो आय।

यीशु खुबे जादू करूआय जोन टा दखाउ आय कि हाय परबु आय। हाय पानी ने हिंडूला आउरी आंधी के शांत करला। हाय खुबे बीमार लोक मनके चंगा करला आउरी खुबे लोक मन थानले दुष्टआत्मा मनके निकलायला। हाय मोरला लोक मनके जिन्दा करी देला, आउरी हाय पांच रोटी आउरी दुई मछली ले 5,000 लोक मनके खुआयबा काचे भरपुर भोजन ने बदली देला।

यीशु गोटक महान शिक्षक बले रेउआय। जोन टा बले हाय सीखायला, हाय हाके सिद्ध संगे सिखायला। जोन टा हाय लोक मनके करबा काचे बोलुआय हाय टा हाय मनके करबार चाहिए काय काचे कि हाय मापररु बेटा आय। उदाहरण कचे हाय सीखायला कि तोमके दूसरा लोक मन संगे हाई रीती ले मया करबार जरूरत आचे जसन तोमि खुद के करूआस।

हाय ऐ बले सीखायला कि तोमके सबू वस्तु ले खुबे आउरी निजर सम्पति ले बले खुबे परबु के मया करबा राय।

यीशु बोलला कि संसार ने काई बले चीज के पायबा ले खुबे अच्छा आय परबुर राज्य ने होयबाटा। हातार राज्य ने तोमके ओल्बा काचे जरुरत आचे कि परबु तोमके तोमर पाप ले बाचाओ।

यीशु बोलला कि खिनिक मा लोक मन हाके ग्रहण करबाय। परबु हाय लोक मनके बाचायसी। मांतर दूसरा लोक मन हाके ग्रहण ना करबाय। हाय ऐ बले बोलला कि खिनिक मा लोक मन अच्छा भुई जसन आत, काय काचे कि हाय मन यीशुर बारे ने शुभ सन्देश के स्वीकार करूआत, आउरी परबु हाय मनके बाचाउ आय। मांतर खिनिक मा लोक मन बाटर कड़ा भुई जसन आत। परबुर वचन बीज जसन बाट ने घसरू आय, मांतर हाय ताने काई बले ना अकरु आय। ऐ लोक मन यीशुर बारे ने सन्देश के अस्वीकार करी देउआत। हाय मन हातार राज्य ने ओल्बा काचे मना करी देउआत।

यीशु सीखायला कि परबु पापी मनले मया करूआय। हाय हाय मनके क्षमा करबार चाहसि आचे आउरी तीके निजर बेटा बनायबार चाहसी आचे।

यीशु ऐ बले सांगी रेला कि परबु पाप ले नफरत करूआय। काय काचे कि आदम आउरी हव्वा पाप करूआत, एकाचे हातार सबू वंशज मन बले पाप करूआत। ऐ संसार ने रेबा सबू लोक मन पाप करूआत आउरी परबु ले दूर आचेत। सबू लोक मन परबुर दुसमन आत।

मांतर परबु ऐ संसार ने रेबा बीती सबू माने संगे ऐ रीती ले मया करला : हाय निजर गोटक बेटा के दि देला ताकि परबु हाय मनके दण्ड ना दे जोन मन हातार उपरे विश्वास करूआत।

तोमि मोरबार योग्य आस कायकाचे कि तोमि पाप करला आस। तोम के परबुर रिसा होयबाटा उचित आय, एतार अपेक्षा, हाय यीशु उपरे रिसा होयला। हाय यीशु के क्रूसर मृत्यु दि करी दण्ड देला।

यीशु केबी बले पाप ना करला, मांतर हाय परबु के हाके दण्ड देयके देउआय। हाय मोरी जिबा टा स्वीकार करूआय। ऐ रीती ले, तोमर पाप के आउरी संसार ने रेबा लोक र सबूर पाप के उठाय नेबा काचे हाय गोटक सिद्ध जत्रादान रेउआय। यीशु खुद के परबु काचे जत्रादान करी देउआय, एकाचे परबु कोनी बले पाप के, एथानले बले कि भयंकर पाप मनके बले क्षमा करूआय।

भले ही तोमि अच्छा ले अच्छा काम करूआस, तो एतार द्वारा परबु तोमके ना बाचाये। हातार संगवारी बनबा काचे अमता कायी बले निआय जोन टा के तोमि करके सकास। एतार अपेक्षा तोमके विश्वास करबा राय कि यीशु ही परबुर बेटा आय, आउरी हाय तोमर बदला ने क्रूश ने मोरी गला, आउरी ऐ बेले कि परबु हाके फिर ले जिन्दा करी देला। अगर तोमि एताने विश्वास करबास, तो परबु तोमर पापर क्षमा देयसी।

मापरू हाय सबू लोक के बाचायसी जोन यीशु उपरे विस्वास करुआत आउरी हाके निजर परबू स्वीकार करुआत। मांतर हाय तीके ना बाचाये जोन हातार उपरे विस्वास ना करुआत। एटा कोनी मायने ना सोंगाउ आय कि तोमि धनी आस या गारीब आस, माने हो या बायले, डोकरा हो या जुआन हो, या तोमि कोनती रेउ आस। परबु तोमके मया करुआय आउरी चाहुआय कि तोमि यीशु उपरे विस्वास करा।

यीशु तोमके हाग देयसी आचे कि हातार उपरे विश्वास करा आउरी बपतिस्मा धरा। काय तोमि विश्वास करूआस कि परबुर गोटक बेटा, यीशु मसीह आय? काय तोमि विश्वास करूआस कि तोमि गोटक पापी आस आउरी एटा बले कि तोमि परबु द्वारा दण्डित किया जिबार योग्य आस? काय तोमि विश्वास करूआस कि तोमर पाप के मिटायबा काचे यीशु क्रूश ने मोरला ?

अगर तोमि यीशु उपरे जोन हाय तोमर काचे करला आचे हातार उपरे विश्वास करूआस, तो तोमि गोटक मसीह आस! शैतान निजर अंधकारर राज्य ने अबर तोमर उपरे शासन ना करूआय। अबर परबु निजर प्रकाशर राज्य ने तोमर उपरे शासन करूआय। हाय तोमके पाप करबा ले रोकी देला आचे जाके तोमि करते रेलास। हाय तोमके गोटक नुआ उचित जीवन देला आचे।

अगर तोमि गोटक मसीह आस तो जोन यीशु करला आचे हातार कारण परबु तोमर पाप के क्षमा करी देला आचे। अब परबु गोटक दुसमनर अपेक्षा तोमके गोटक अच्छा संगवारी मानु आय।

अगर तोमि परबुर संगवारी आस आउरी परबु यीशुर सेवक आस तो तोमि हाय बाट मनर पालन करबार इच्छा करबास जोन टा यीशु तोमके सिखाउ आय। भले तोमि गोटक मसीह आस, शैतान ऐबे बले पाप करबा काचे तोमर परीक्षा करसी। मांतर परबु सबू हार हाय करुआय जोन हाय बोलुआय कि हाय करसी। हाय बोलसी आचे कि अगर तोमि निजर पाप के मान बास, तो हाय तोमके क्षमा करी देयसी। हाय तोमके पापर विरुद्ध ने लड़बा काचे ताकत देयसी।

परबु तोमके पारतना करबा ने आउरी हातार वचन के पड़बा काचे बोलसी आचे। हाय तोमके दूसरा विश्वासी मनर संगे मिली करी हातार आराधना करबा काचे बले बोलसी आचे। तोमके दूसरा लोक मनके बले सांगबा काचे कि हाय तोमर काचे काय करला आचे। अगर तोमि ऐ सबू काम के करबास, तो तोमि हातार गोटक अच्छा संगवारी बनी जिबास।