48. यीशु ही प्रतिज्ञा करला बीती मसीह आय

जेबे परबु संसार के बनायला तो सबू अच्छा रेला। कोनि पाप ना रेला। आदम आउरी हव्वा गोटक दूसरा संगे माया करते रेलाय, आउरी हाय मन परबु संगे बले माया करते रेलाय। कोनी बीमारी या मोरबाटा ना रेला। परबु अमती संसार के मोन करते रेला।

शैतान सांपर जरिया ले बगीचा ने हव्वा ले गोटाउआय, काय काचे कि हाय हाके धोका देबार चाहते रेला। तेबे हव्वा आउरी आदम परबुर विरुद्ध ने पाप करूआत। काय काचे कि हाय मन पाप करी रेलाय एकाचे पृथ्वीर सबू लोक मन मोरु आत।

काय काचे कि आदम आउरी हव्वा पाप करी रेउआत, एकाचे खिनिक आउरी बले बुरा होउआय। हाय मन परबुर दुसमन बनी गलाय। जार लागी, तेबले सबू लोक मन पाप करला आत। सबू लोक मन जनमला दायले परबुर दुश्मन आत। परबु आउरी लोक मनर मजीगता शांति ना रेला। मांतर परबु शांति स्थापित करबार चाहते रेला।

परबु प्रतिज्ञा करुआय कि हव्वा र गोटक वंसज शैतान र मुंडी के कुचलसी। हाय इ बोले बोलुआय कि शैतान हातर लेढ़ी के डससी। दूसरा सब्द ने शैतान मसीह के मारसी, मांतर परबु हाके फिर ले जिंदा करी देयसी। एतार पाचे, मसीह शैतान र शक्ति के सबू हार काचे सराय देयसी। खुबे बोरस र पाचे, मापरू दखायला कि हाय मसीह यीशु आय।

मापरू हाय बाड़ ले निजर परिवार के बाचाउ आय जाके हाय आनबा काचे रेउआय। नूह ले गोटक नाव बनायबा काचे बोलुआय कि हाय ऐ प्रकार ले परबु हाय लोक मनके बाचयला जोन मन हातार उपरे विश्वास करते रेलाय। ऐ प्रकार ले, हाय मन सबू परबु द्वारा मारी देबार योग्य रेउआत काय काचे कि हाय मन पाप करी रेउआत। मांतर परबु हाय मनके बाचय बा काचे यीशु के पोटाउ आय जोन मन हातार उपरे विश्वास करू आत।

सैकड़ो बोरस ले, याजक मन परबु काचे जत्रादान चेगाय ते रेलाय। एटा दखायते रेला कि लोक मन पाप करी रेलाय, आउरी एटा कि हाय मन परबुर द्वारा मारी देबार योग्य रेलाय। मांतर हाय जत्रादान तिकर पाप मनर क्षमा ना करके सकि रेउआत। यीशु सबू ले बड़े याजक आय। हाय हायटा करूआय जोन टा कोनी याजक करके ना सकते रेउआत। हाय हाय गोटक जत्रादान होयबा काचे खुद के दि देउआय जोन सबूर पाप के मिटाय के सकते रेला। हाय स्वीकार करूआय कि परबु हाय सबु लोक मन काचे हाके दण्डित करो। ऐ कारण ले, यीशु सिद्ध महायाजक रेउआय।

परबु अब्राहम के बोलुआय, ’’मुई तोर द्वारा संसारर सबू कुल मनके आशीष देबी।’’यीशु इ अब्राहम र वंशज रेउआय। परबु अब्राहमर जरिया ले सबू कुल के आशीष देउआय, काय काचे कि जोन मन यीशु उपरे विश्वास करूआत परबु हाय सबू के पाप ले बाचाउ आय। जेबे ऐ लोक मन यीशु उपरे विश्वास करूआत, तो परबु हाय मनके अब्राहमर वंशज मानुआय।

परबु अब्राहम के बोलुआय कि निजर सगा बेटा के, हातार काचे जत्रादान करी दो। मांतर पाचे परबु इसहाकर पालटा ने जत्रादान करबा काचे गोटक मेमना देउआय। हामी सबू निजर पाप मन काचे मारी देबार योग्य रेलू! मांतर परबु हामर जागा ने मोरबा काचे यीशु के जत्रादानर रूप ने देला। ऐ कारण ले हामी यीशु के परबुर मेमना बोलुआव।

जेबे परबु मिस्र ने आखरी विपत्ति के पोटाउ आय तो हाय सबू इसरायली परिवार के बोलुआय कि हाय मन गोटक मेमनार जत्रा करोत। हाय मेमना ने कोनी दोष ना रेबार चाहिए। तेबे निजर चोखटर उपरे आउरी रेटे हाय मनके हातार लहू के लगाय बार रेउआय। जेबे परबु हाय जत्रादान के दखु आय तो हाय तिकर घर मनले आगे बड़ी जाउ आय आउरी तिकर पहिलोठा बेटा मनके ना मारूआय। जेबे एटा होउ आय तो परबु एके फसहर परब बोलला।

यीशु फसहर परबर मेमना जसन आय। हाय केबी बले पाप ना करूआय, एकाचे हातार ताने काई बले गलत ना रेउआय। हाय फसहर परबर बेर मोरुआय। जेबे कोनी यीशु उपरे विश्वास करूआत, तेबे यीशुर लहू हाय मानेर पापर किमत के चुकाउ आय। एटा असन आय जसन कि परबु हाय मानेर लगले आगे बड़ी गला, काय काचे कि हाय हाके दण्ड ना देयते रेउआय।

परबु इसरायली लोक मन संगे गोटक वाचा बांधला, काय काचे कि हाय असन लोक मन रेउआत जोन मनके परबु निजर होयबा काचे चुनी रेउआय। मांतर अबर परबु गोटक अमता वाचा बांधू आय जोन कि सबू काचे आय। अगर कोनी बले जातिर कोनी बले माने ऐ नुआ वाचा के स्वीकार करूआय, तो हाय परबु लोक मन ताने शामिल होई जाउआय। हाय अमता एकाचे करूआय काय काचे कि हाय यीशु उपरे विश्वास करूआय।

मूसा गोटक भविष्यवक्ता रेउआय जोन परबुर वचन के बड़े सामर्थ ले प्रचार करी रेउआय। मांतर यीशु अबर सबू भविष्यवक्ता मनले सबू ले बड़े आय। हाय परबु आय, एकाचे जोन टा बले हाय करला आउरी बोलला हाय टा परबुर काम आउरी वचन रेला। एकाचे पवित्र -शास्त्र यीशु के परबुर वचन बोलू आय।

परबु राजा दाउ द ले प्रतिज्ञा करी रेउआय कि राजार रूप ने हातार गोटक वंशज परबुर लोक मन उपरे सदा काचे शासन करसी। यीशु परबुर बेटा आउरी मसीह आय, एकाचे हाय राजा दाउ दर वंशज आय जोन सदा काचे राज्य करके सके।

दाउ द तो इस्राएलर राजा रेउआय, यीशु सबू जगतर राजा आय! हाय फिर ले आयसी आउरी सदा काचे न्याय आउरी शांति संगे निजर राज्य ने शासन करसी।