47. फिलिप्पी ने पौलुस आउरी सीलास

जेबे शाउ ल सबु रोमी साम्राज्य ने यात्रा करूआय तो हाय निजर रोमी नाम ‘’पौलुस’’ अर उपयोग करबा टा शुरू करी देउआय। गोटक दिने, पौलुस आउरी हातार संगवारी सीलास फिलिप्पी नगर ने यीशुर बारे ने शुभ संदेस सुनायबा काचे जाउ आत। हाय मन नगरर बाहरे नदीर रेटे गोटक जागा ने जाउ आत जोन ताने लोक मन पारतना करबा काचे रुंडा होई रेउआत। हाय मन हाय ताने लुदिया नामर गोटक बायले ले मिलु आत जोन गोटक व्यापारी रेउआय। हाय परबु ले मया करते रेउआय आउरी हातार आराधना करते रेउआय।

परबु लुदिया के यीशुर बारे ने सन्देश ताने विश्वास करबा काचे सक्षम करूआय। पौलुस आउरी सीलास हाके आउरी हातार परिवार के बपतिस्मा देउआत। हाय पौलुस आउरी सीलास के निजर घरे ठेबबा काचे हाग देउआय, एकाचे हाय मन हाय ताने ठेबु आत।

पौलुस आउरी सीलास लोक मनके अक्सर हाय जागा ने मिलते रेउआत जोन ताने यहूदी लोक मन पारतना करबा राय। रोजे दिना जेबे हाय मन हाय ताने जायते रेलाय तो गोटक दासी टोकी जोन दुष्ट आत्मा द्वारा नियंत्रित रेउआय। हाय मनर पीछा करबा राय। ए दुष्ट आत्मार जरिया ले हाय लोक मनके भविष्य सांगबा राय, एकाचे हाय भविष्य सांगबा बीतीर रुप ने निजर मालिक काचे खुबे धन कमायते रेला।

तिकर जीबा दाय ए दासी टोकी किरकिरबा राय, ’’ए माने मन परम प्रधान परबुर सेवक मन आत। ए मन तोमके उद्धार पायबार बाट सांगबा आत!’’ हाय सबु दिना अमति करते रेला जार लागी पौलुस नाराज होई जाउ आय।

आखरी ने, गोटक दिने जेबे हाय दासी लड़की चिचाय के मुराउ आय, तो पौलुस हातार बाटे पलटी करी हातार भीतरर दुष्ट आत्मा के बोलुआय, ’’यीशुर नाम ले एथार थानले निकली जा।’’हड़कीच दाय हाय दुष्ट आत्मा हाके छाड़ी देउआय।

हाय दासी टोकीर स्वामी मन खुबे रिसा होई जाउ आत। हाय मन जानी जाउ आत कि बिना दुष्ट आत्मार हाय टोकी लोक मनर भविष्य के सांगके ना सके। एतार मतलब रेला कि लोक मन अबर हातार स्वामी मनके पोयसा ना देत कि हाय हाय मनके भविष्य सांगसी कि तिकर संगे काय होयसी।

एकाचे हाय दासी टोकीर स्वामी मन पौलुस आउरी सीलास के रोमी अधिकारी लगे नेउआत। हाय मन पौलुस आउरी सीलास के पेटु आत, पाचे हाय मनके जेल ने डाली देउआत।

हाय मन पौलुस आउरी सीलास के जेलर गोटक जगा ने सोंगाउआत जोन ताने खुबे सिपाही रेउआत। एथानले बले हाय मन तिकर गोड़ मनके गचर बड़े गोंदा ताने जोड़ी देउआत। मांतरपौलुस आउरी सीलास मोजी रातीर बेरा, परबुर स्तुतिर गीत गायते रेउआत।

अचानक ले, गोटक भयानक भूकम्प होउ आय! जेलर सबू दुआर खुली जाउ आय, आउरी सबू कैदी मनर जंजीर मन खुली करी घसरी जाउआय।

तेबे दरोगा चेतु आय। हाय दखुआय कि जेलर सबू दुआर मन खुली गला आचे। हाय सोचु आय कि सबू कैदी मन बाची करी पोरायलाय। हाय डरी जाई रेउआय कि हाय मनर पोराय लार लागी करी रोमी अधिकारी मन हाके मारी देबाय, एकाचे हाय खुद के मारी देबा काचे तियार होउआय! मांतरपौलुस हाके दखी करी चिचाउ आय, ’’ठेब! खुद के नुकसान ना पहुँचाव। हामी सबू इताने आचू।’’

हाय दरोगा थर थरते पौलुस आउरी सीलास लगे आयिकरी पचारू आय,’’उद्धार पाय्बा काचे मुई काय करबी? ’’पौलुस जवाब देउआय, ’’परबु यीशु उपरे विश्वास कर तो तुई आउरी तोर घराना उद्धार पायसी।’’हाय दरोगा पौलुस आउरी सीलास के निजर घरे नेउआय आउरी तिकर घाव मनके धोउ आय। पौलुस तिकर घरर सबू लोक के यीशुर बारे ने शुभ सन्देश के सुनाउ आय।

दरोगा आउरी हातार परिवार यीशु उपरे विश्वास करूआत, एकाचे पौलुस आउरी सीलास हाय मनके बपतिस्मा देउआत। तेबे दरोगा पौलुस आउरी सीलास के भात खुआउ आय, आउरी हाय मन गोटक संगे हरिक होउआत।

दूसरा दिने नगरर अगुआ मन पौलुस आउरी सीलास के जेल ले आजाद करी देउआत आउरी फिलिप्पी ले जिबा काचे बोलुआत। पौलुस आउरी सीलास लुदिया आउरी खिनिक दूसरा संगवारी मन सगे मिलुआत आउरी हातार पाचे नगर ले निकली जाउआत। यीशुर बारे ने सन्देश फैलते गला, आउरी कलीसिया बाड़ते गला।

पौलुस आउरी दूसरा मसीही अगुआ मन खुबे नगरर यात्रा करूआत। हाय मन लोक मनके यीशुर बारे ने शुभ सन्देश सुनाउ आत। हाय मन कलीसियार विश्वासी मनके उत्साहित करबा ने आउरी हाय मनके शिक्षा देबा काचे खुबे पत्र लिखुआत। एथानले खिनिक मा पत्र बाइबलर पुस्तक बनी गलाय।