7. मापरू याकूब के आशीष देला

जेबे हाय पिला मन बड़े होउआत तो याकूब के घरे रेबाटा अच्छा लागुआय, मांतर एसाव के पोसु मनर शिकार करबाटा भायला, मांतर इसहाक एसाव ले मोया करते रेउआय।

गोटक दिने जेबे एसाव शिकार करी लेवटी आउआय तो हाके खुबे भूक लागूआय। एसाव याकूब के बोलुआय, ”जोनटा के तुई बनायली आस हाय थानले खिनिक मा मोके देस।” याकूब जवाब देउआय, ”पोयले मोके ए प्रतिज्ञा कर की पहलौठा होयबार कारण ले सबु चीज जोन तोके मिलबार चाहिए, हाय सबु के मोके देबीस।”अतः एसाव हाय सबु चीज के याकूब के देबार प्रतिज्ञा करी देउआय। तेबे याकूब हाके खिनिक मा भात देउआय।

इसहाक एसाव के आशीष देबार चायते रेउआय, मांतर एतार पोयले की हाय अमता करता, रिबका आउरी याकूब, इसहाक संगे धोका करूआत। हाय मन याकूब के एसाव होयबार दिखावा करूआत। इसहाक डोकरा रेउआय आउरी अबर दखके ना पारते रेउआय। एकाचे याकूब एसावर फोटी के पिंदी करी आउरी बकरीर खाल के निजर टोडरी आउरी हाथ ताने गुड़ाउआय।

याकूब इसहाक लगे आउआय आउरी बोलुआय, ”मुई एसाव आय। मुई एकाचे आयली आची की तुई मोके आशीष देस।” जेबे इसाहक बकरीर बाल के महसूस करूआय आउरी फोटी के सुन्घुआय, तो हाय सोचुआय की हाय एसाव आय आउरी हाके आशीष देउआय।

एसाव याकूब संगे नफरत करूआय कायकाचे की याकूब हातार पोयला बेटा होयबार अधिकार के आउरी हातार संगे हातार आशीष के बले दरी रेउआय। अतः हाय तीकर बुआर मोरला र पाचे याकूब के मारी देबार योजना बनाउआय।

मांतर रिबका एसावर योजना के सुनुआय। एकाचे हाय आउरी इसहाक याकूब के तीकर लोक बाग संगे रेबा काचे खुबे दूर पोटाय देउआत।

याकूब खुबे बोरस तक रिबकार लोक बाग मन संगे रेउआय। हाय बेरार दाय हाय बिया करूआय आउरी बारा बेटा आउरी गोटक बेटी के जनमाउआय। परबु हाके खुबे धनी बनाय देउआय।

बीस बोरस ले कनान देस ने निजर घर ले दूर रेलार पाचे, याकूब निजर परिवार, निजर सेवक, आउरी निजर पोसु मनर सबु रासी संगे हाय ताने वापिस लेवटला।

याकूब ए काचे खुबे डरी रेउआय कायकाचे की हाय सोचते रेउआय की एसाव एबे बले हाके मारी देबार चायते रहसी। एकाचे हाय उपहारर रूप ने पोसु मनर रासी के एसाव लगे पोटाउआय। जोन सेवक मन हाय रासी मनके दरी करी जाई रेउआत हाय मन बोलूआत, ”तोर दास याकूब, ए पोसु मनके तोके देयसी आचे। हाय झोपके आयसी आचे।”

मांतर अबर एसाव याकूब के नुकसान खेटायबार ना चायते रेउआय। एतार बजाय, हाय हाके गोटक हार फिर ले दखी करी खुबे हरिक रेउआय। हातार पाचे याकूब कनान ने शांति ले रेउआय। पाचे इसहाक मोरी जाउआय आउरी याकूब आउरी एसाव हाके पाहटुआत। वाचार प्रतिज्ञा जोन परबु अब्राहम संगे करी रेउआय हाय अबर इसहाक ले याकूब लगे खेटुआय।