9. परबु मूसा के हाग देउआय

यूसुफर मोरला र पाचे हातार लोक बाग मन मिस्र ने रेयते रेउआत। हाय आउरी तीकर वंशज खुबे बोरस तक मिस्र ने रेउआत आउरी हाय मन खुबे असन पिला – झिला जनमाउ आत। हाय मन इसरायली बोलाय होयलाय।

कई सौ बोरसर पाचे, इसरायली मनर गिनती खुबे बड़ी गला। आउरी मिस्री लोक अबर ए गोटर आभारी ना रेउआत की तीकर मदद करबा काचे यूसुफ खुबे करी रेउआय। हाय मन इसरायली मन ले डरी गलाय कायकाचे की हाय मन गिनती ने तीकर ले खुबे रेउआत। एकाचे हाय बेरा मिस्र ने शासन करबा बिता फिरौन इस्राएली मनके मिस्री मनर दास बनाय देउआय।

मिस्री मन इसरायली मनके खुबे असन इमारत आउरी एथानले बले की खुबे नगर के बनायबा काचे मजबूर करूआत। हाय खुबे काम तीकर जीवन के बड़े दुःखदाई बनाय देउआय, मांतर परबु हाय मनके आशीष देउआय आउरी हाय मनर खुबे पिला झिला होउआत।

फिरौन दखुआय की इसरायली मनर पिला झिला खुबे होयबा आत, एकाचे हाय निजर लोक मनके इसरायली मनर सबु नर पिला के नील नदी ने पोकाय करी मारबा काचे आदेस देउआय।

गोटक विशेष इसरायली बायले गोटक पिला के जनम देउआय। हाय आउरी हातार मुनुस जतक हाय मनके होयके सकला हाय पिला के लुकाय करी सोंगाउआत।

जेबे हाय पिलार माँ बुआ हाके आउरी खुबे लुकाय के ना सकेत, तो हाके मोरबा थानले बाचायबा काचे गोटक पोंरबा बीती टुकना ने नील नदीर रेटे सरकंडोर मजीगता सोंगाय देउआत। हातार बड़े भोइन ए दखबा काचे हातार राका करूआय की हातार संगे काय होयसी।

फिरौनर बेटी हाय टुकना के दखी करी हातार भीतरे ओंजारू आय। जेबे हाय गोटक पिला के दखुआय तो हाके निजर पिलार रूप ने धरुआय। हाय गोटक इसरायली बायले के हाके दूध पियायबा काचे काम ने सोंगाउआय, ना जानी करी की हाय पिलार माँ हाई आय। जेबे हाय पिला अतक बड़े होयला की अबर हाके निजर माँर दूध पिबार जरूरत निआय, तो हाय फिरौनर बेटी के लेवटाय देउआय, हातार नाम मूसा रेउआय।

गोटक दिने, जेबे मूसा बड़े होई रेउआय, तो हाय दखुआय की गोटक मिस्री गोटक इसरायली के पेटसी आचे। मूसा निजर संगर इसरायली के बचायबार प्रयास करूआय।

जेबे मूसा सोचु आय की हाके कोनी ना दखेत तो हाय मिस्री माने के मारी देउआय आउरी हातार लास के दफनाय देउआय। मांतर मूसा जोन टा के करी रेउआय हाके कोन आय आले दखी रेउआय

फिरौन के पता चलु आय की मूसा काय करला आचे। हाय हाके मारबार प्रयास करूआय, मांतर मूसा मिस्रर झारे पोराउआय। फिरौनर सैनिक मन हाके हायती डगराय के ना पारुआत।

मिस्र ले दूर झारे मूसा गोटक धोरी बनी गला। हाय ताने हाय गोटक बायले ले बिया करूआय आउरी दुई ठन बेटा जनमाउआय।

मूसा निजर सतरार मेंडा मनर रासीर राका करबाराय। गोटक दिने, हाय गोटक पोड़बा बीती झाड़ी के दखुआय जोन लाकड़ी ना होई करी पोड़ते रेउआय। हाके दखबा काचे हाय झाड़ीर लगे गला। जेबे हाय हातार लगे रेउआय तो परबु हाके गोटाउआय। हाय बोलुआय, ”हे मूसा, निजर जूता के उतराय देस। तुई गोटक पवित्र जागा ने ठीया आचिस।’

परबु बोलुआय, ”मुई मोर लोक मनर दुःख के दखली आची। मुई तोके फिरौन लगे पोटायबी ताकि तुई इसरायली मनके मिस्रर गुलामी ले निकलाय करी आनबीस। मुई हाय मनके कनान देस देबी, हाय देस जोन टा के मुई अब्राहम, इसहाक आउरी याकूब ले प्रतिज्ञा करली आची।”

मूसा पोचारूआय, ”अगर लोक मन जानबार चायबाय की कोन मोके पोटायला आचे तो मुई काय बोलबी?” परबु बोलुआय, ”मुई जोन आय सो आय। तीके बोला, ’मुई आय’ मोके तोमर लगे पोटायला आचे।’ हाय मनके ए बले बोला, ’मुई तोमर पूर्वज अब्राहम, इसहाक आउरी याकूबर परबु आय।’ मोर नाम सदार आय।’’

मूसा डरते रेउआय आउरी फिरौन लगे ना जिबार मोन करते रेउआय कायकाचे की हाय सोचला की हाय अच्छा ले गोटायके ना पारसी, एकाचे परबु मूसार भाई हारून, के हातार मदद करबा काचे पोटाउआय।