10. दस बिपति

परबु मुसा आउर हारून के गोट सांगला कि फिरौन हटीला होई जायसी। जड़क दाय हाय मन फिरौन लगे गलाय तेबे आय मन बोललाय, ‘’इसराइलर परबु बोलसी आचे, ’मोर लोक मनके जायके दियास!’’ मांतर फिरौन हायमनर ना सुनुआय आउरी इसरायली मनके जीबा काचे छाड़बार पाल्टा हाय मनके आउरी हरबर काम करबा काचे कट करुआय।

फिरौन हाय मनके जायके देबा काचे बार बार माना करते रेला, ईटाकाचे परबु मिस्र ताने दस भयंकर विपति पटाउआय। ई बिमारी मनर लागी, परबु फिरौन के दकाउआय कि हाय फिरौन आउरी मिस्रर देवता मनले कुबे ताकतवर आय।

परबु नील नदी के लोउ ने बदली देउआय, मांतर फिरौन एबे बले इसरायली मनके जायके ना देउआय।

परबु सबु मिस्र ने बेन्ड्का पटाउआय। फिरौन बेन्ड्का मनके दूर भागाय्बा काचे मूसा ले बिनती करुआय। मानतर सोबू बेन्ड्का मन मोरला र बाद, फिरौन अपना मन के कठोर करी देउआय आउरी इसरायली मनके मिस्र ले निकली जायके ना देउआय।

हाईटा काजे परबु कूटकि मनर विपति पोटाउआय। एतार पाचे डासो र विपति पटाउआय। फिरौन मूसा आउरी हारून के हागदेउआय आउरी हायमनके बोलुआय कि अगर हायमन हाय विपति के थेबायबाय तेबे इस्रायली मन मिस्र के छाड़ी करी जायके सकेत। जड़कदाय मूसा परतना करुआय तो परबु मिस्र थानले डान्सो के गुचाय देउआय। मांतर फिरौन अपना मन के कठोर करी देउआय आउरी हाय मनके आजाद होइकरी जायके ना देउआय।

एतार पाचे, परबु मिस्री मनर सबु पालतू पोसु मनके बीमार होइकारी मोरी जायके देउआय। मानतर फिरोनर मन कठोर होई जाई रेउआय आउरी हाय इसराएली मनके जायके ना देउआय।

तेबे परबु मूसा के फिरोनर छोमे हवा ने लाकड़ी पोकायबा काचे बोलुआय। जेबे हाय अमता करुआय तो मिस्रर लोक मनर त्वचा ने फोड़ा मन निकली आसुआय, मानतर इस्रायली मनके कायीच ना होउआय। परबु फिरोनर मन के कठोर करी देउआय, आउरी फिरौन इसरायली मनके आजाद होयिकारी जायके न देउआय।

एतार पाचे, परबु ओला गसराउआय आउरी मिस्रर फसल के नसाय देउ आय आउरी जोन कोनी पुनि बाहरे निक्लुआत हयमनके मारी देउ आय। फिरौन मूसा आउरी हारून के हगदेउआय आउरी हांयमनके बोलुआय, ’’मुई पाप करली आची। तोमी जयके सकास।’’ अतः मूसा पारतना करुआय कि, बादरी थानले ओला घसरबाटा थेबो।

मानतर फिरौन आउरी पाप करुआय आउरी अपना मन के कठोर कारी देउआय। हाय इसरायली मनके आजाद होईकरी जायके ना देउआय।

अतः परबु मिस्र ताने थापा मनर दल के आयके देउआय। ए थापा मन सबु फसल मनके खायी देउ आत जोनटा के ओला मन नास करी रहुआत।

पाचे परबु अनदार करी देउआय जोनटा तीन दिन तक रहुआय। ए बीती अतक अंदार रहुआय कि मिस्रर लोक मन घर ले निकल के ना पारुआत। मानतर जोन बाटे इस्रायली मन रहुआत हायबाटे उजर रेउआय।

ए नों विपतिर बाद बले, फिरौन इसरायली मनके आजाद करबा काचे मना करी देउआय। फिरौन ना सुनी रहुआय एकाचे परबु आकरी विपति के पटायबार योजना बनाउ आय। एटा फिरोनर मनके बदली देयसी।